लूका 24:30-49

³⁰येशू थेनीगदेदेन छ्‌याम सोल छ्‌योइबारी धन्‍छ्‌याजी। जमाहेन्‍से येशूसे गेङ छ्‌यारी थोसी धन्‍यवाद पिन्‍सी गेङ क्‍युइसी थेनीगदेदा पिन्‍जी।

³¹जमाहेन्‍से थेनीगदेसे येशूदा ङोसेजी। तर थेनोन धुइरी थेनीगदेसे येशूदा थेरी आम्राङ्‌नी।

³²ओच्‍छे थेनीगदेसे “येशू य्‍हाङदेन छ्‌याम ग्‍यामरी ताम लबान परमेश्‍वरला बचन घोना लबा धुइरी य्‍हाङला सेम गाते ताङ्‍बा मुबा” भिसी ह्राङ ह्राङ न्‍हङरी ताम लजी।

³³जमाहेन्‍से तुरुन्‍तन थेनीगदे यरूशलेमपट्टि निजी। थेरी धोमा थेनीगदेसे च्‍युक गिक चेलागदेदेन छ्‌याम पोप तसी चिबा म्‍हिगदेसे,

³⁴“प्रभु सिबाग्‍याम सोबादेन सिमोन मुबा ग्‍लारी फेप्‍बा ताम चा पक्‍कान हिन्‍ना चीम” भिसी ताम लसी चिबा स्‍याप्‍जी।

³⁵जमाहेन्‍से थेन्‍नीसेएनोन ग्‍यामरी तबा तामदेन प्रभुसे गेङ क्‍युइबा धुइरी थेन्‍नीसे प्रभुदा ङोसेजी भिबा ताम थेरी मुबागदेदा पाङ्जी।

³⁶थेनीगदेसे चु ताम लबान लबा धुइरी येशू थेनीगदेला ङाच्‍छा राप्‍जी, ओच्‍छे “एनीगदेदा शान्‍ति तगै” भिसी सुङ्जी।

³⁷तर येशूदा म्राङ्सी, “चु म्‍हङ कि तिग” भिसी थेनीगदे लोङ्सी आत्‍यब तजी।

³⁸जमाहेन्‍से येशूसे थेनीगदेदा “एनीगदे तिग्‍दा सेमरी शङ्का लसी लोङ्‌बा?

³⁹एनीगदेसे ङाला यादेन काङरी थुर्सी च्‍यागो, ङानोन हिन्‍ना। तिग्‍दा भिसम म्‍हङला स्‍यादेन नख्रु आत, तर ङाला मी मुला” भिसी सुङ्जी।

⁴⁰चुह्रङ् सुङ्माहेन्‍से येशूसे थेनीगदेदा ह्राङला छ्‍यादेन स्‍य्‍हाप उन्‍जी।

⁴¹जमाहेन्‍से थेनीगदे ताङ्सी उदेक तसी अझ येशूला ताम विश्‍वास आलनी। जमाहेन्‍से येशूसे थेनीगदेदा “एनीगदेदेन छ्‌याम तिगै चबा स्‍हे मुला?” भिसी ङ्‌योइमा,

⁴²थेनीगदेसे दुम्‍बु गिक तार्ङाला स्‍या येशूदा पिन्‍जी।

⁴³थे तार्ङाला स्‍या तासी येशूसे थेनीगदेलान ङाच्‍छापट्टि छ्‌योइजी।

⁴⁴जमाहेन्‍से येशूसे थेनीगदेदा “ङाला बारेरी परमेश्‍वरसे मोशादा पिन्‍बा ठिमरी, अगमवक्तागदेसे भ्रिबा किताबगदेदेन व्‍हाइला किताबरी भ्रिबा जम्‍मान ताम पूरा तबा मुला। चु ताम एनीगदेदेन छ्‌याम मुबा धुइरीन ङाइ एनीगदेदा पाङ्बा मुबा” भिसी सुङ्जी।

⁴⁵जमाहेन्‍से येशूसे थेनीगदेदा परमेश्‍वरला बचन घोखम्‍बा ज्ञान पिन्‍जी।

⁴⁶ओच्‍छे येशूसे थेनीगदेदा चुह्रङ् भिसी सुङ्जी, “थार्बा पिन्‍बा ख्रीष्‍टसे दुख नातोःला ओच्‍छे सोमरेमाकुनु थे सिबाग्‍याम सोला,

⁴⁷थेला मिनरी ह्राङ ह्राङला पाप ख्‍लासी परमेश्‍वरपट्टि दोःजी भिसम पापला दोष मेटब तला। चु ताम यरूशलेमहेन्‍से जम्‍मान य्‍हुलला म्‍हिगदेदा थेःना लतोःला भिसी परमेश्‍वरला बचनरी भ्रिबा मुला।

⁴⁸तिग्‍दा भिसम चु जम्‍मान ताम म्राङ्बा एनीगदेन हिन्‍ना।

⁴⁹च्‍यागो, ङाला आबासे पिन्‍ना भिसी कबुल लबा शक्ति ङाइ एनीगदे मुबा ग्‍लारी पुइखला। थेतबासेलमा तोरग्‍याम शक्ति आयाङ्‌तेधोना एनीगदे चु शहररीन चिउ।”