San Lucas 24:30-49

³⁰Uan ihcuac ocatca inuan icah in mesa ya tlacuasqueh, oquian in pan uan omotlasohcamat inauactzinco Dios, occocoton uan oquinmactih.

³¹Ihcuacon omotlapohqueh nimixtololouan uan oquixmatqueh nic yen Jesús. Pero yeh niman opoliu imixpan uan acmo oquitaqueh.

³²Uan ocmosepaniluayah: —¿Xamo otmachilayah itlah itich in toyolo quen otechualnonotztaya itich in ohtli uan otechahsicamatiltaya tlen quihtoua in Teotlahtolamatl?

³³Sanniman omoquitzteuqueh uan omocuipqueh oyahqueh Jerusalén. Ompa oquimahsitoh onichicautoyah in mahtlactlanse teotlatitlanten, uan nocsiquin tlen ompa inuan ocatcah.

³⁴Uan non onichicautoyah oquimiluihqueh: —¡In toTecotzin milauac yomoyancuicayolitih, uan omonextih inauac in Simón!

³⁵Ihcuacon non omen oquinnonotzqueh tlen oquinpanoc itich in ohtli, uan quen oquixmatqueh Jesús ihcuac occocoton in pan.

³⁶Oc ocmononotztoyah nochi non, ihcuac Jesús omonextih intlahcoyan yehuan, uan oquimiluih: —¡In seuilistli mai namouantzin!

³⁷Yehuan omomohtihqueh uan omohcamiquiah, ocyoluayah oquihitztoyah se ehecatl.

³⁸Pero yeh oquimiluih: —¿Tleca namonmomohtiah, uan tleca namonyolometih?

³⁹Ixquimonitacan nomauan uan nocxiuan. Yeh nehua. Ica namomauan ixconmachilican uan ixconitacan, se ehecatl amo icpia itlalnacayo dion iomiyo, quemeh neh nannechonitah inpia.

⁴⁰Ihcuac ohcon oquimiluih, oquinnextilih nimauan uan nicxiuan.

⁴¹Pero quen simi opactoyah uan oc ocmotetzauihtoyah, ayamo ocniltocayah. Ica non oquimiluih: —¿Nanconpiah nican itlah tlacual?

⁴²Yehuan ocmactihqueh tzocotzin pescado tlicoicusic uan siqui nicutli.

⁴³Yeh oquian uan oquicuah ompa imixpan.

⁴⁴Uan Jesús oquimiluih: —Nochi nin tlen yopanoc, yehua tlen yonnamechonnonotz ihcuac oc namouan oncatca. Onnamechoniluih nic ocpiaya tlen mochiuas nochi tlen ihcuiliutoc de neh itich nitlahcuilol Moisés, itich nintlahcuiloluan in teotlanauatanih uan itich in Salmos.

⁴⁵Ihcuacon oquintlapouilih nimahsicamatilis uan ohcon oquichiu macahsicamatican in Teotlahtolamatl,

⁴⁶uan oquimiluih: —Ohcon ya ihcuiliutoc uan ohcon omonic: In Cristo Temaquixtani tlahyouis, uan yancuicayolis itich miquilistli ipan yeyi tonal.

⁴⁷Uan noiuqui ihcuiliutoc: Ica nitoocaatzin motematiltis nic moniqui semoyolcuipas uan catqui tetlapohpoluilis den tlahtlacol, uan non peuas motematiltis nican Jerusalén, uan satepan ic nouiyan itich nochi in tlalticpactli.

⁴⁸Uan yen namehuantzitzin naquin onanconitaqueh nochi uan naquin nancontematiltisqueh.

⁴⁹Ixconmatican, neh incualtitlanis namotich tlen Dios omoyectencau. Ica non, oc xonican nican Jerusalén, ixconchiacan manamechonquenti Dios in chicaualis tlen ualeua iluicac.