Luk 24:30-49

³⁰Asa o qoyemboro newero kunditero enendo bret siyoro puriŋo yero romboŋero yunaró.

³¹Ŋunde tiní, toŋeyari hiyóqiní, Yesu iŋo inariyó. Ŋunde tiní waka ta toŋiní qenewero mepémo kini.

³²Tiní epe mito-mito tariyó, “Hamó, nore khewore maheyaro sokome koro mande rondaqe nimironíqo, newondenari ura!”

³³Ŋunde yero waka ta otoqoro Yerusalem uyaro iŋo-iŋo rewero uni 11 ŋuya topoyemboya kopaŋgurí quno ŋuno uyaririyó.

³⁴Unipare ŋundo ŋande yimiraŋgurí, “Hamó horé, Uni Parámi ŋuko pitu otoqoro Saimonko tunoqa!”

³⁵Ko enepa naŋge o kheko tunoqa ŋuro yimirariyó. Ko ŋande yariyó, “Bret ŋu romboŋe nunoníqota nore qene iŋaro,” yariyó.

³⁶Asa irisa ŋuya yeyuriqo, Yesu keweroyemo ŋuno kaŋero ŋande yaró, “Newonde ime yuri.”

³⁷Yiní qenero yukuworo, kapo ka, ye iŋoro sasaro parámi taŋgurí.

³⁸Ko ŋande yimiraró, “Do karo yukuwoteŋgo? Do karo newondeye wimbo-wimbo yote?

³⁹Khe kandene qenoyi. Kapoko suŋgí, wimbí moré kini.”

⁴⁰Ŋunde yero khí kandí se witú yereró.

⁴¹Witú yiriní qenero niŋgu-niŋgu tero iŋondata parámi taŋgurí, quko iŋondutu hamó kama taŋgurí. Ŋunde ŋuroko ŋande yimiraró, “O newero qu kape ŋana?” yaró.

⁴²Yiní sono qare ka sombé qaŋgurí mu inaŋgurí.

⁴³Ŋu re toŋeyemo naró.

⁴⁴Asa ŋande yimiraró, “No yeya yoranowó quno ŋuno ŋande yimiranowó: mande kumi Moses koro Hutuŋo Mande ŋuya Ye-ye Unindoro mandeye ŋuya Hariri Yambo ŋuya ŋuno neneŋo nakayáŋaŋgurí, ko mande soso ŋu mepémo tunoqeweya.”

⁴⁵Ŋunde yeroqo samaka yiriní mande murí mande sokomeko ŋuno nakayáŋaŋgurí ŋu iŋoyi tondaŋaró.

⁴⁶Ko ŋande yimiraró, “Komo suki sokomeko ŋuno ŋande nakayáŋaŋgurí, ko Kristo ŋundo kowe surumí koroworo naru kapusayómo ŋuno uni tapu koŋgo otoqoweya.

⁴⁷Otoqoníqo, kumimbo eneŋo owímo uni wini soso keweroyemo ŋande yesowowaŋgo, ko uni kato oteteye piyimi ŋuro newonde surumí tero newonde rohoréŋo tiníqo, Anutuko quhuríye se rotoweya. Asa yendo Yerusalem ŋano kho kimani tero

⁴⁸o soso ŋaro yesowowaŋgo.

⁴⁹Iŋoyi. Komo Awando mande kusiyoro o meté ka re yunowero yaró. No o meté ŋu rewe yeno maheweya ŋu. Quko yendé parámimo ŋano yurika wimbu kore koŋgo saŋayemo umbuweya.”