Isanquienare Irocashi 24:30-49

³⁰Impoiji itsipatavacaajeitaca, yoajeitaca. Impoiji yaaquero Jesoshi tanta, ipasonquitiri Tasorentsi, impoiji ipajeitaqueri itsipapee.

³¹Irosati iquenqueshireantanaja, iojeitavajiri. Impoiji imapocanaja Jesoshi, ipeanaja.

³²Icantavacaajeitanaca: —Tempa ocameetsatasanotaque icantaqueeri anta avotsiqui. Oshequi aquenqueshiretaquero, aquimoshireventasanotaquero.

³³Irosati ijajeitantanaja, ipiajeitanaja Jerosarequi. Ineapaaqueri yora iroamereni Jesoshi, icarataji 11, itsipajeitacari itsipapee quemisantatsiri, yapatojeitaca.

³⁴Icantajeitavaqueri yora savicajeitatsiri: —Quearioteemi: itinaasanotanaja Avincatsarite. Ineaqueri Shimo.

³⁵Irosati icamantantapaacari: —Aisati narori, noneajeitaqueri anta avotsiqui, cameetsa catsini yoametaquena, iro cantaincha te nioveteariji. Impoiji anta novancoqui icarajaquero tanta, ipaquenaro, irosati niotantajari.

³⁶Ari ainirojeitatsi iriori anta pancotsiqui, iquenquetsatavacaajeitaca, irosati imapocantapaajari Jesoshi, icatiimojeitapaajari nianqui. Icantapaajiri: —Pinquimoshirejeitanaque, maaroni.

³⁷Yoajeitanaqueri cavaco, te iriojeitavaqueriji, ijitashijeivetavacari camaari. Itsaroajeitanaque.

³⁸Isampitapaaqueri: —¿Paita pitsaroacantanari? ¿Paita pitseencajeitantanari?

³⁹Pamenajeitero naco aisati noiti oqueanaquena quiravo. Narotaque pocajantsiri. Jentsite, pimpamijeitena piojeitantenari. Pineaquena, otimi novatsa aisati notonqui, te nonquempeteariji camaari.

⁴⁰Irosati yonijantajeitacari iraco aisati iiti.

⁴¹Iro cantaincha tequera irishiretasanoteari itinaanaja. Iquimoshirejeivetaca, iro cantaincha itseencashirejeitaque. Icantiri Jesoshi: —¿Timatsimpa avajeiteari?

⁴²Ari ipavaqueri shima shincorentsi,

⁴³yoacari. Iriorijei yamenashejeitaqueri, sorerere.

⁴⁴Impoiji icantajeitaqueri: —Tempa chapinqui nocamantaquempi: “Oshequi nonquematsicataquearo, iroyeetena. Aitaque omoncarataquea maaroni isanquenatacotitaquenaniri Moishishini, aisati yora quenquetsatacaantatsiniri, aisati yora pampoyeaventajeitiriniri Tasorentsi”. Meeca moncarataca.

⁴⁵Impoiji yoametasanojeitaqueri ocantayetiri Sanquenarentsi,

⁴⁶icantajeitaqueri: —Tempa ocanti Sanquenarentsi: “Incamaque Quirishito, oncarate mava quitaiteri ari intinaanaje aisati.

⁴⁷Inquenquetsatacoyeeteri maaroni quipatsipeequi, irijivate aca Jerosarequi: inquemacojeitaqueri maaroni atiri. Incamantajeiteri atiri: ‘Pinquenqueshirejeitanaquea, pojocajeitajero caari cameetsatatsi pantajeitiri. Paventeari Tasorentsi iroavisacotantempiri’ ”.

⁴⁸Ari pineajeitaquero meeca omoncarataca isanquenatacotitaquenaniri peerani.

⁴⁹Meeca nontianquempiro icashiacaaquempiri Apa: ompocashitempi Ishire, quiso oajeitantempiri. Pisavicavaqueta aca nampitsiqui irosati ompocanteari. Impoiji irimatacaajeitempi Tasorentsi pantajeitantearori paitapeerica incoacaayempiri.