LUKA 24:1-43

¹Pantsiku ya kuyamba ya mdzinga madandakweca, akazi adakondzekera bzakununchira aciyenda nabzo kuthenje.

²Ndipo iwo adagumana cimwala cikhadakunkhulizidwa paphangapo.

³Tsono pomwe adapita m'mwemo alibe kuciwona citanda ca Mbuya Jezu.

⁴Na kubva mantha na bzimwebzo ndipo adawoneka amuna awiri akhadabvala bzakuyetima.

⁵Pamwepo iwo adatsulima na mantha. Na tenepo amunawo adawabvundza aciti: “ Thangwe ranyi muli kunyang'ana munthu wa moyo pakati paanyakufa?

⁶Tsono iye ali lini muno. Wamuka. Kumbukirani ninga momwe iye adakuuzirani kale pomwe iye akhali kuGalileya kuti: .

⁷'Mwana wa Munthu an'dzaperekedwa m'manja mwa anyakuphonya. Ndipo an'dzakhomereredwa acidzamuka pantsiku yacitatu yace.

⁸Pamwepo ndipo iwo adadzakumbukira mafala yaceyo.

⁹Pomwe iwo adabwerera kuthenjeko adawafotokozerambo bzentsenebzo atumiki khumi na m'bodzi na wanthumbo winango omwe akhanawo pabodzi.

¹⁰Ndipo iwo akhali: Maliya Madalena, Juwana, na Maliya mai wa Tiyago. Ndipo na winango omwe akhanawo pabodzi adawatawirirambo kuna Atumikiwo.

¹¹Tsono iwo alibe kubvuma. Thangwe mafala yawoyo yakhali ninga yakunama.

¹²Na tenepo Pedru adalamuka acithamanga kuthenjeko. Pomwe adakasondzokera iye adawona machiriya yokha yadagwezeka. Ndipo iye adabwerera kumui acidabwa na bzomwe bzidacitikabzo.

¹³Pantsiku imweyo ateweri wace awiri akhayenda kumui wa Mausi omwe ukhana mtantho wa nthawe ziwiri zakufamba kucokera kuJeruzalema.

¹⁴Ndipo iwo akhafamba acimbalewa bzomwe bzidacitikabzo.

¹⁵Pomwe iwo akhaganizana ndipo Jezu adawafenederera acimbayenda nawo pabodzi.

¹⁶Tsono iwo akhadakhala ninga ana khungu kuti asaye kumuzindikira.

¹⁷Ndipo iye adawabvundza kuti: “Kodi muli kufamba mucilewa ciani?” Pamwepo iwo adaima acitsulima na manyazi.

¹⁸Ndipo m'bodzi wawo dzina lace Kiriyopa adamubvundza kuti: “Kodi iwepo ndiwe wekha mulendo muJeruzalema muno omwe un'dziwa lini bzomwe bziri kucitika ntsiku zino?

¹⁹Ndipo iye adawabvunza kuti: “Bziponi?” Pamwepo iwo adamutawira kuti: “Bza Jezu wa kuNazalee. Nakuti iye akhali mpolofetapolofeta wa mafala na bzakucita bza mphambvu kuna Mulungu, na wanthu wentse.

²⁰Tsono akulu-akulu wa azibaba wa ntsembe na atongi wathu adamupereka acimumanga mulandu wakumphesa, ndipo adamukhomerera.

²¹Tsono ife ndiye tikhakhulupira kuti iye angadapulumuse Jirayeri. Na tenepo lero ni ntsiku yacitatu kucokera ntsiku yomwe bzidacitika bzimwebzi.

²²N'cadidi kuti akazimbo winango adatidabwisa pomwe iwo adayenda kuthenje kumadandakweca.

²³Tsono iwo alibe kukawona citanda ca Jezu. Pomwe iwo adabwerera adadzalewa kuti adakagumana na anjo. Ndipo iwo adalewa kuti Jezu ana moyo.

²⁴Na tenepo andzathu omwe tikhanawo adayendambo kuthenjeko acikawona cadidi ninga momwe adalewera akaziwo. Tsono iwo alibe kukamuwonadi Jezuyo.

²⁵Ndipo Jezu adawauza aciti: “Nandi madzengamwe! Kodi thangwe ranyi muli kuwuma mitima na bzomwe apolofeta adalewa!

²⁶Kodi mukhadziwa lini kuti Krixtu an'dzabonera? Ndipo akamala acitambira bwino ufulu bwace.

²⁷Ndipo iye adawapfundzisa Bzakunembedwa bza nkhani yace kuyambira Mozeji na mpaka Apolofeta wentse

²⁸Pomwe adafika pafupi na mui omwe iwo akhayendayo, Jezu adacita ninga akhafuna kupitirira.

²⁹Ndipo iwo adamungingimira kwene-kwene aciti: “Khalani pano na ife. Thangwe dzuwa liri kudoka. Nakuti kuli kun'cita m'dima. Na tenepo iye adapita acikhala nawo.

³⁰Pomwe iye adakhala patsantsali la kudyera, adatenga mkate aciusimba ndipo aciubedula aciwapasambo.

³¹Pamwepo ndipo iwo adapenya acimuzindikira tsapano. Na iyembo acinyangaliriratu pakhana iwopo.

³²Ndipo iwo adabvundzana aciti: “Ndipopo tikhapsa mitima pomwe akhatipfundzisa Bzakunembedwa munjira pale!”

³³panthawe imweyo ndipo iwo adaguduka aciyenda kuJeruzalema. Na tenepo kumweko adakaguma atumiki winango khumi na m'bodzi akhadakoncezana pabodzi na wanthu winangombo,

³⁴acimbalewa kuti: “N'cadidi Mbuya adamuka. Nakuti Simau adamuwonadi.

³⁵Ndipo iwo adawafotokozerambo bzentse bzomwe bzidacitika munjira, ndipo iwo adamuzindira Mbuya pomwe iye akhabedula mkate.

³⁶Pomwe iwo akhalewa bzimwebzo, ndipo Jezuyo adabwera pakhana iwopo, aciwauza kuti: “Ntendere ukhale na imwe.”

³⁷Ndipo iwo adadzidzimuka acibva mantha. Nakuti akhakumbuka kuti ali kuwona kazukwa.

³⁸Ndipo iye adawabzundza kuti: “ Thangwe ranyi muli kubva mantha? Thangwe ranyi muli kuzeza-zeza m'mitima mwanumu?”

³⁹Onani manja yanguya na minyendoi kuti ndine-panodi. Phatani mubve! Nakuti kazukwa alibe thupi ayai mafupa. Tsono ine ndinabzo.

⁴⁰Pomwe adamala kulewa bzimwebzo ndipo iye adawalatiza manja na minyendoyo.

⁴¹Tsono iwo alibe kubvuma na kukomedwa. Na tenepo adasusumwa ndipo Jezu adawabvundza kuti: “Kodi muna cakudya pano?”

⁴²Ndipo iwo adamupasa cibai ca ntsomba ya kuwocha.

⁴³Ndipo iye adadya, iwo aciwona na maso.