1 Pantsiku ya kuyamba ya mdzinga madandakweca, akazi adakondzekera bzakununchira aciyenda nabzo kuthenje.
2 Ndipo iwo adagumana cimwala cikhadakunkhulizidwa paphangapo.
3 Tsono pomwe adapita m'mwemo alibe kuciwona citanda ca Mbuya Jezu.
4 Na kubva mantha na bzimwebzo ndipo adawoneka amuna awiri akhadabvala bzakuyetima.
5 Pamwepo iwo adatsulima na mantha. Na tenepo amunawo adawabvundza aciti: “ Thangwe ranyi muli kunyang'ana munthu wa moyo pakati paanyakufa?
6 Tsono iye ali lini muno. Wamuka. Kumbukirani ninga momwe iye adakuuzirani kale pomwe iye akhali kuGalileya kuti: .
7 'Mwana wa Munthu an'dzaperekedwa m'manja mwa anyakuphonya. Ndipo an'dzakhomereredwa acidzamuka pantsiku yacitatu yace.
8 Pamwepo ndipo iwo adadzakumbukira mafala yaceyo.
9 Pomwe iwo adabwerera kuthenjeko adawafotokozerambo bzentsenebzo atumiki khumi na m'bodzi na wanthumbo winango omwe akhanawo pabodzi.
10 Ndipo iwo akhali: Maliya Madalena, Juwana, na Maliya mai wa Tiyago. Ndipo na winango omwe akhanawo pabodzi adawatawirirambo kuna Atumikiwo.
11 Tsono iwo alibe kubvuma. Thangwe mafala yawoyo yakhali ninga yakunama.
12 Na tenepo Pedru adalamuka acithamanga kuthenjeko. Pomwe adakasondzokera iye adawona machiriya yokha yadagwezeka. Ndipo iye adabwerera kumui acidabwa na bzomwe bzidacitikabzo.
13 Pantsiku imweyo ateweri wace awiri akhayenda kumui wa Mausi omwe ukhana mtantho wa nthawe ziwiri zakufamba kucokera kuJeruzalema.
14 Ndipo iwo akhafamba acimbalewa bzomwe bzidacitikabzo.
15 Pomwe iwo akhaganizana ndipo Jezu adawafenederera acimbayenda nawo pabodzi.
16 Tsono iwo akhadakhala ninga ana khungu kuti asaye kumuzindikira.
17 Ndipo iye adawabvundza kuti: “Kodi muli kufamba mucilewa ciani?” Pamwepo iwo adaima acitsulima na manyazi.
18 Ndipo m'bodzi wawo dzina lace Kiriyopa adamubvundza kuti: “Kodi iwepo ndiwe wekha mulendo muJeruzalema muno omwe un'dziwa lini bzomwe bziri kucitika ntsiku zino?
19 Ndipo iye adawabvunza kuti: “Bziponi?” Pamwepo iwo adamutawira kuti: “Bza Jezu wa kuNazalee. Nakuti iye akhali mpolofetapolofeta wa mafala na bzakucita bza mphambvu kuna Mulungu, na wanthu wentse.
20 Tsono akulu-akulu wa azibaba wa ntsembe na atongi wathu adamupereka acimumanga mulandu wakumphesa, ndipo adamukhomerera.
21 Tsono ife ndiye tikhakhulupira kuti iye angadapulumuse Jirayeri. Na tenepo lero ni ntsiku yacitatu kucokera ntsiku yomwe bzidacitika bzimwebzi.
22 N'cadidi kuti akazimbo winango adatidabwisa pomwe iwo adayenda kuthenje kumadandakweca.
23 Tsono iwo alibe kukawona citanda ca Jezu. Pomwe iwo adabwerera adadzalewa kuti adakagumana na anjo. Ndipo iwo adalewa kuti Jezu ana moyo.
24 Na tenepo andzathu omwe tikhanawo adayendambo kuthenjeko acikawona cadidi ninga momwe adalewera akaziwo. Tsono iwo alibe kukamuwonadi Jezuyo.
25 Ndipo Jezu adawauza aciti: “Nandi madzengamwe! Kodi thangwe ranyi muli kuwuma mitima na bzomwe apolofeta adalewa!
26 Kodi mukhadziwa lini kuti Krixtu an'dzabonera? Ndipo akamala acitambira bwino ufulu bwace.
27 Ndipo iye adawapfundzisa Bzakunembedwa bza nkhani yace kuyambira Mozeji na mpaka Apolofeta wentse
28 Pomwe adafika pafupi na mui omwe iwo akhayendayo, Jezu adacita ninga akhafuna kupitirira.
29 Ndipo iwo adamungingimira kwene-kwene aciti: “Khalani pano na ife. Thangwe dzuwa liri kudoka. Nakuti kuli kun'cita m'dima. Na tenepo iye adapita acikhala nawo.
30 Pomwe iye adakhala patsantsali la kudyera, adatenga mkate aciusimba ndipo aciubedula aciwapasambo.
31 Pamwepo ndipo iwo adapenya acimuzindikira tsapano. Na iyembo acinyangaliriratu pakhana iwopo.
32 Ndipo iwo adabvundzana aciti: “Ndipopo tikhapsa mitima pomwe akhatipfundzisa Bzakunembedwa munjira pale!”
33 panthawe imweyo ndipo iwo adaguduka aciyenda kuJeruzalema. Na tenepo kumweko adakaguma atumiki winango khumi na m'bodzi akhadakoncezana pabodzi na wanthu winangombo,
34 acimbalewa kuti: “N'cadidi Mbuya adamuka. Nakuti Simau adamuwonadi.
35 Ndipo iwo adawafotokozerambo bzentse bzomwe bzidacitika munjira, ndipo iwo adamuzindira Mbuya pomwe iye akhabedula mkate.
36 Pomwe iwo akhalewa bzimwebzo, ndipo Jezuyo adabwera pakhana iwopo, aciwauza kuti: “Ntendere ukhale na imwe.”
37 Ndipo iwo adadzidzimuka acibva mantha. Nakuti akhakumbuka kuti ali kuwona kazukwa.
38 Ndipo iye adawabzundza kuti: “ Thangwe ranyi muli kubva mantha? Thangwe ranyi muli kuzeza-zeza m'mitima mwanumu?”
39 Onani manja yanguya na minyendoi kuti ndine-panodi. Phatani mubve! Nakuti kazukwa alibe thupi ayai mafupa. Tsono ine ndinabzo.
40 Pomwe adamala kulewa bzimwebzo ndipo iye adawalatiza manja na minyendoyo.
41 Tsono iwo alibe kubvuma na kukomedwa. Na tenepo adasusumwa ndipo Jezu adawabvundza kuti: “Kodi muna cakudya pano?”
42 Ndipo iwo adamupasa cibai ca ntsomba ya kuwocha.
43 Ndipo iye adadya, iwo aciwona na maso.
