Luka 1:1-53

¹Tool mai Tiopilus, nga be awete pong nen, muku ngan di tooltool alunu la titouo baedi be tiwodo betanga ke so tina le imot yo Maro iyei a pombe kataunu yam nga.

²Ngan nen le tiwodo betanga tina yo tilongo ye di tooltool yo kulkulunu yege, ngan di tapdi tikamata so tina ngan kanono moolmool ye matadi, inbe tikaua urata ye a tiraia bingi ki paidi nga.

³Ngan tina au tauk i ator panin di tooltool tina a tipagalangau dook ye so tina ngan punu, ngan la akamata ngan dook mata ke be au lapau awodo betanga galangana pong ye so tina yo pombe nga.

⁴Le awodo rau i pong a be nen ngan kukinkati ngan lom galanga nen, betanga yo tipatomonai ong ye nga, ngan moolmool le imot.

⁵Ye kene yo Erot iyei tool kuto mai a matan kala tana mai Yudia ye in nga, ngan tool atu ke paroranga  so pang Maro, in ene la Sakaria i. Ya in iyepe ye budanga atu ke di tooltool ke paroranga so pang Maro yo tiweta ye Abia i. Ngan iye rimana yo Ilisapet, ngan Aron di sasa ki.

⁶Inbe yaru ngan tiyei dada dook mata tarantatu ye Maro matana. Inbe titoo noonoongoo le ger ke Maro nga le imot, le tiyepe le taukadi busunu ye matana.

⁷Bong yaru taukadi natudi, yesoo Ilisapet ipassui tiap le iye Sakaria tiyepe tiyepe a tiyei konga konga oo.

⁸Ye kene atu in Sakaria iye di diene tooltool ke paroranga so yo tiyepe ye budanga ke Abia nga, ngan lal kidi be tilo tiyei urata kidi ye bareme mai ke sungunu. Ngan le Sakaria ilo bareme mai ke sungunu lono be lo iyei urata ki ke paroranga so pang Maro.

⁹Motong la titoo momo kidi ke be tikatte madamada a be nen ngan tipuske sei tool ke paroranga so, be ole ilo idaun so kini ki dook mata ben kai meu kulini in pang Maro i. Ngan le Sakaria tani, in ya la madamada ipaposi be ilo bareme mai ke sungunu lono i.

¹⁰Ngan ye kene yo Sakaria lo idaun so ke paroranga pang Maro ye in nga, ngan di tooltool alunu la tigaua ke bareme diki ki a tipattarau nga.

¹¹Sakaria ilo, motong la bangabangana ke Tool Mai atu pombe pang ye le ikodo ke kookoowoo yo be tidaun so kini ki dook mata ye i, in madini oonoo.

¹²Ngan yeisa be Sakaria ikamata bangabangana ke Maro tani, motong le itakrai inbe itattadai welewele.

¹³Bong ngan bangabangana tani iwete panga nen, “Sakaria, kin kutattadai be! Maro ilongo pataraungu kiong oo. Le rimam Ilisapet ole ipasuiu kase tamoto pong. Lo ngan be kusu ene ye Yowan.

¹⁴Ong i ole lom dook mata a lom ponana ye mai san, inbe di tooltool alunu ole lodi ponana ye kene yo be tinana ipasuiu ye i,

¹⁵yesoo ya in ole Maro ikamata ben tool ene mai. Inbe ya in o ke be iyin ooroo wain surunu le ran medana tiap. Inbe kene yo iyepe tinana kapono lono ye in nga, ngan ole Maro Amunu Silene ipaponi.

¹⁶Inbe ole ilon di tooltool alunu ke Isrel a nen ngan tiportak lodi a timulu pang ye Maro yo Tool Mai kidi i.

¹⁷Inbe ya in ole Maro Amunu Silene ikaua gurana mai panga dawa ben ke Ilia, a imuku pang Tool Mai. Inbe ole ilon di tooltool maimai a tiportak lodi, a be nen ngan lodi mai san pang di natudi mulu. Inbe ya in ole ilon di tooltool ke sak noonoongoo, a be nen ngan titoo ger dook mata kidi tooltool yo noonoodi nga. Inbe ole ilon di tooltool a tikarata lodi le dook mata, inbe tinama Tool Mai yo be pombe i.”

¹⁸Bangabangana ke Maro iwete nen a imot, motong la Sakaria tani iwete panga nen, “Ai, nga ole lok galanga belei, be betanga kiong i moolmool nga? Yesoo, au i ayei konga, inbe rimak ngan iyei konga lapau oo.”

¹⁹Motong la bangabangana tani ke Maro in iraua betanga ki nen, “Au i Gabrel! Inbe kanakana ngan akodo dama ke Maro. Ngan Maro ya taunu la iwangau be si akaua bingi dook mata i pong i.

²⁰Bong nga yelei, ong i kutara lom medana ye betanga kiau tiap, too? Ngan nen le nookoot nga ole mem modo le ke be kuwetewete tiap a kuyepe nen le ilo ye lal yo Maro ya taunu itaru be ole so tani in kanono pombe moolmool ye i.”

²¹Ngan nen le ye kene tani in di tooltool budanga mai tina yo tigaua a tinama Sakaria ke diki nga, ngan tinam kaiye le nga lodi kau urata nen, “Tiap, nga yelei a le isi tarai tana tiap nga.”

²²Motong la yeisa be ipas a isi tana, ngan men modo le ke be iwetewete pang di tiap, bong ipas le iyei tomomai pang di ye baene leu. Le nga lodi tar be o ikamata so sa bareme mai ke sungunu lono, ngan la le ke be iwetewete tiap a iyepe nen leu nga.

²³Ngan lal ke Sakaria yo be iyei urata ke paroranga so ngan lo imot, motong la imulu pang malala ki.

²⁴Le nga tiyepe le mooloo tiap, inbe rimana Ilisapet in kapono le ipa mallangana tiap, bong ipas le iyepe rumu lono leu ye taudu limi.

²⁵Motong la Ilisapet tani iyei ne, “So i, Tool Mai la lono pau a iyeii pau i. Le nookoot nga ke be moomook mulu ye di tooltool matadi tiap.”

²⁶Ye kene yo Ilisapet kapono a iyepe le taudu limi be atu iman a ila ye in nga, ngan Maro iwanga bangabangana ki yo ene Gabrel in a idu pang ye malala mai yo ene Nasaret i. Ngan malala tani, in iken ye tana mai Galili.

²⁷Bangabangana tani in be idu pang ye garup nene atu yo ene Madia i. Ngan garup nene tani in titarkala pang tamoto yo ene Yosep i. Ngan Yosep tani in Dawiti yo muku ngan iyei tool kuto mai i, in sasa ki.

²⁸Le nga bangabangana tani in idu pombe pang ye Madia, motong la iwete lo ponana ki panga, inbe iwete nen, “Tool Mai iyepe yong, le iyeie urata dook mata san pong.”

²⁹Bong Madia ilongo betanga ki tina, ngan lon sarere mai san. Inbe ikapye be lon kaua urata ye soo betanga tina yo iwete nga, ngan lono ki belei?

³⁰Motong la bangabangana iwete panga nen, “Madia, kin kutattadai be. Maro lono pong mai san a iyeie urata dook mata pong.

³¹Le kulongo, ong i ole kapom ye kase tamoto atu. Le ye kene yo be kupasuiu ye in nga, ngan ole kusu ene ye Yesu.

³²Ya in ole ene mai, inbe ole tiweta be ya in Maro yo iyepe ete, in natunu. Inbe Tool Mai Maro ole itaru a iyei tool kuto mai a ikolo sasa ki yo Dawiti i.

³³Inbe ya in ole iyei tool kuto mai a matan kala Yakop di sasa ki le ikenen leu a ila. Moolmool, ya in ole iyei tool kuto mai le ikenen leu le taukan motingi.”

³⁴Motong la Madia itoro bangabangana ke Maro tani in nen, “Ona, au i garup nene, inbe aye tamoto sa ampa pitiap. E so i nga ole pombe pang yau belei?”

³⁵Ngan bangabangana iraua betanga ki nen, “Maro Amunu Silene ole isi yong, inbe Maro yo iyepe ete i, in gurana ki ole si idukong. Le kase tani yo Maro ipootoo panga ya taunu a kapom ye i, in ole di tooltool tiweta be ya in Maro Natunu.

³⁶Inbe kumata, tinam oom Ilisapet yo iyei kolman, inbe tiwete be tau pasuiungu ki i, in nookoot nga kapono a iyepe ye taudu limi be atu oo.

³⁷Ngan nen, yesoo so sa yo be Maro isak ye a be iyei tiap, ngan tiap.”

³⁸Motong la Madia tani in iyei ne, “Au i ben kapraingi ke Tool Mai. Le so yo kuwete pau ye, in be iyeii a pombe pang yau, ngan dook mata.” Motong la bangabangana ke Maro iyege sila iyepe, inbe imulu a ilo.

³⁹Ye kene tani in Madia ikarata so ki tina ngan le imadit a ipa tarai a ilo pang ye malala mai atu yo iken ye kawal ke tana mai Yudia i.

⁴⁰Ngan ipa le lo pombe, motong la ilo rumu lono ke Sakaria lo ikamata Ilisapet, ngan le iwete lo ponana ki panga.

⁴¹Ye kene yo Ilisapet ilongo lo ponana ke Madia yo iweta panga i nga, ngan le natunu yo iken kapono lono i, in ipulles, inbe Maro Amunu Silene isi ipapono Ilisapet tani.

⁴²Ngan nen le koonoo le mai nen, “Maro iyei urata dook mata pong le kullos di diem garup kapala nga le imot. Inbe iyei urata dook mata pang kase yo be kupasuiu i, in lapau.”

⁴³Motong la Ilisapet tani in iwete mulu nen, “Ngan dook mata, bong au i tool dook mata belei a le Tool Mai kiau tinana i be ise pang yau nga?

⁴⁴Kulongo, kene yo kuwete lo ponana kiong pau a alongo ye i nga, ngan le kase mitiap tani yo iken kapok lono i, in lon ponana lapau le ipulles.

⁴⁵Ong i, Maro iyei urata dook mata pong, yesoo betanga yo Tool Mai iwete pong nga, ngan kutara lom medana ye be ole kanono pombe pang yong moolmool.”

⁴⁶Motong la Madia iyei ne, “Au i agaua lok le imot be ayitmaka Tool Mai ene.

⁴⁷Inbe lok mai i le imot lon ponana mai san pang Maro yo ipamulau ye so dook tiap tani yo be igarungau i.

⁴⁸Au i garup sokorai ben kapraingi ki leu, bong ya in lon tutau mai san. Le pang dama ni nga, ngan ole di tooltool le imot tikamatau, ngan ole tiwete be Maro la iyei urata dook mata pau i.

⁴⁹Ngan ya in gurana ki mai san, le iyeie so maiyoko dook mata pau be ilonau ye. Inbe Maro ya taleu in iyepe le taukan busunu, le ayitmaka ene.

⁵⁰Ya in tool ke be ilele lono ye di tooltool le imot yo titattadaii a tiraua panga nga, ngan la ilon di tooltool yo nookoot tiyepe nga, inbe ole ilon di tooltool kapala yo be pang dama ni ngan pombe nga.

⁵¹Ngan ya taunu in iyei urata maimai nga ye baene. Le di tooltool yo lodi tar di be di tapdi nga edi maimai nga, ngan igiri di a tikoo.

⁵²Inbe irautoo di tooltool maimai yo tiyei kuto maimai nga, inbe iyitmak di tooltool yo taukadi edi nga.

⁵³Inbe ikap so dook mata alunu pang di tooltool yo tikana pitolo nga, bong di tooltool yo ballingadi nga, ngan inganga di le tipa baedi koonoo a tila.