Nok 1:1-53

¹Teop: —Hõmã tikmũ'ũn te hãpxopmã ka'ok pẽnãhã', tu' pẽnã hãmãxap, tu nõm hãpxopmã'ax 'ãktux,

²ha tik xop te nõm hãm'ãktux kax'ãmi tappet tu',

³yĩy 'ãte mõ'kupix punethok, tu hãm'ãpak, tu' yĩkopit, nũy nõmhã yũmmũg max, tu hãmpe'paxex, hu: Yã' 'ãte hãpxopmã'ax xohix kax'ãmi', tu tappet tu kax'ãmi', nũy xa mõ'kutnã',

⁴xa 'ãkuxa yũm ka'ok, nũy hãpxopmã'ax kopa' yũm ka'ok, tikmũ'ũn te xa nõm yũmmũgãhã'.

⁵Hõmã 'Enot te hãpxexka Yonex yõg tikmũ'ũn xat, 'ĩhã Yakanit xip, tu 'Amit xop yõg 'ãmanex, 'ũxetut 'ãxet'ax 'Iyamet, ha 'Iyamet pa 'ãmãnex kutok hex.

⁶Yã' max Yakanit xi' xetut, tu hãpxopmã max, ha Topa te' pẽnãhã', tu' xat, ha' yĩpkox pip xi' xetut, 'ũmĩynãg hu' mĩy,

⁷pa 'Iyamet ka'ok, tuk-tok 'ohnãg, 'ũk-tok pip 'okpa kutut 'Iyamet xi' yĩpxox.

⁸'Ãmnĩy 'ũm 'ĩhã Yakanit te 'ãmãnex yõg hãm hã' hãm, tu Topa pet kopa' hãm, ha 'Amit yõg xop xohix hãm, ha nõm xop te mõ' xap yõn, tu' xap tu' yũmmũgãhã', ha' xut Yakanit, nũy hãm, 'ũnõy yãnãn tu',

⁹pu mĩm xax 'ũm puk, nũy haxyã, xix mĩm hep 'ũm puk, nũy Topa pu' haxyã', ha Yakanit te Topa pet xexka ha' mõ'nãhã',

¹⁰ha Yoneo yõg tikmũ'ũn tek-nĩhã' pip hãptopa', tu Topa pu hãm'ãktux pax, 'ĩhã 'ãmãnex xop te mĩm hep puk, mĩmpe yĩmũ' yũm ha' puk, nũy Topa pu' haxyã'.

¹¹Hãpxip 'ohnãg 'ĩhã Yakanit te pexkox yõg nũ'kutnã'ax pẽnãhã, ha mĩmpe puk'ax yĩka' xip, 'ũyĩp xe'e hã' xip,

¹²ha' kuxãnõg, tu' kuxa te' yẽy,

¹³pa nõm nũ'kutnã'ax te: —'Ãkuxanõg hok, nũy 'ãka'ok. Topa te 'õg hãm'ãktux'ax 'ãpak, ha 'ãxetut te 'ãk-tok pit put putup, ha xate' xuxet'ax mĩy putup Yoãm.

¹⁴'Ãk-tok put 'ĩhã 'ãkuxa hittup putup, ha tikmũ'ũn hittup putup kamah,

¹⁵yã Topa te 'ãk-tok pit xexka mĩy putup, 'ũtut tex kopa' xip 'ĩhã Topa Koxuk te 'ãk-tok ka'ogãp-tup, yĩy xupyãg xat hok puyĩy xo'op hok,

¹⁶tu 'Iyaet yõg tikmũ'ũn punethok mõgãp-tup, tu 'Iyaet yõg Topa ha mõgãp-tup.

¹⁷Yã Topa te 'ãk-tok nũ'kutnãp-tup tikmũ'ũn hah, pu yãy pupi hãm'ãktux. Hõmã mõnãyxop hittap 'Enit te Topa pupi hãm'ãktux, tu' ka'ok, ha kaxiy 'ãk-tok ka'ok putup, tu' tak xop pu: “'Ãpu, yãyhãhup,” kaxĩy, puk-tok tu gãy kuxyã', nũy nõm putup pax 'ũxeheh, ha 'ãk-tok te' yĩpkox 'ohnãg xop pu hupmãp-tup, pu hãmpe'paxex, nũy yãy hãmyoa', 'Iyaet yõg tikmũ'ũn xat'ax nũn ha hãmyoa'. Kaxĩy.

¹⁸Ha Yakanit te: —'Ĩntu'. 'Ãtep yũmmũg'ah. 'Ũgkuxa yũm 'ohnãg hãm'ãktux kopah. 'Ũgkuxa te xa tu' pa yũm ka'ok, 'ũgkutut xik xetut hah. Kaxĩy.

¹⁹Ha nõm nũ'kutnã'ax te: —'Ũgmũn Gamineo. Topa keppak xip, tu Topa puk hãm, ha xa nũgkutnãhã', 'ũyĩy xa hãmyũmmũgã', tu xa hãm'ãpak max 'ãktux,

²⁰pãyã xate 'ãtu 'ãpa yũm ka'ok, tu kuxa yũm 'ohnãg. Xapi 'ãyĩy hok, tu mõktu 'ãxetut te 'ãk-tok put, yĩy ta 'ãyiy'ax 'ũxeheh, ta tu 'ãte' koit 'ohnãg hah. Kaxĩy. Tu' mõg pexkox ha' put pu'.

²¹Ha tikmũ'ũn te hãptopa' pip, tu Yakanit hip, tu' hip, tu xe' hip, pa' nũn 'ohnãg, ha' yẽy.

²²Ha ta Yakanit te Topa pet xexka kopa' xip, tu hãptopa' mõg, tu' yõyxõg ka'ok, tu' yĩy tapax 'ohnãg, ha tikmũ'ũn te: —'Ũpẽnã', Yakanit te Topa pet kopa' xip, 'ĩhã hãm yãy koxuk pẽnãhã'. Kaxĩy. Ha' yĩm xix, 'ũyĩy hok tu'.

²³Tu 'ãmãnex yõg hãm'ax kux, tu ta' mõg, tu mõktu yãy pet tu' xupep.

²⁴Hãpxip kutõgnãg 'ĩhã' xetut te kopak-tok yũm, tu mẽy te 5 hã' yãy pet kopa' xip, tu hãpkumep 'ohnãg, tu:

²⁵—Hõmã 'ãte yãyhãhup, 'ũgkutok 'ohnãg tu', pa Topa tek pẽnãhã', tuk kuxa ka', tu yõgnũ yãyhãhup nõah, yã hõnhãk kutok yũm 'ũgkopah. Kaxĩy.

²⁶Tuk-tok xuk mẽy te 6 'ĩhã Topa te nũ Gamineo kutnãhã', tu hãpxexka Ganinet yõg kõmẽn Nãyane tu nũ'kutnãhã', ha ta' nũn pexkox yõg nũ'kutnã'ax, tu nũktu Nãyane tu' xupep,

²⁷tu 'ũn yãyta hok ha' mõg, ha' xuxet'ax Mãnix, tu mõnãyxop Namix xop yõg Yoye mũtik yãytap-tup, pãyã' hok yũm.

²⁸Ha Gamineo te Mãnix pet ha mõ'nãhã', tu: —'Ãneo. Topa te xa hãmmaxnãhã', tu nũ mũtik tihi'. Kaxĩy.

²⁹Pa Mãnix kuxãnõg, tu yãy pu hãm'ãktux, hu: Putep mũn 'ãktux nõ'õm? Kaxĩy.

³⁰Ha nũ'kutnã'ax te: —Mãnix, Topa te xa hãmmaxnãhã', yĩy 'ãkuxãnõg hok.

³¹Xate 'ãk-tok pit put putup, tu' xuxet'ax mĩy putup Yeyox.

³²Ha tikmũ'ũn xohix xat putup, yã' xuxet'ax nõy te: Topa Xe'ẽgnãg kutok pit. Kaxĩy. Hõmã mõnãyxop Namix te tikmũ'ũn xat, ha kaxĩy 'ãk-tok te tikmũ'ũn xat putup,

³³tu mõnãyxop hittap Yako mõkputox xat putup, tu hãmyãxatamuk xohix hã tikmũ'ũn xat putup mõg kuma' mõg, 'ap xat kux putup'ah Yeyox. Kaxĩy.

³⁴Pa Mãnix te: —'Ĩntu'. 'Ãtep yũmmũg'ah. 'Ũgkutok put te xĩy? Yãk hok yũm. 'Ãte tik 'ũm mũtik 'ũgnõm 'ohnãg. Kaxĩy.

³⁵Ha nõm nũ'kutnã'ax te: —Topa Koxuk ka'ok, tu 'ãk-tok putnãp-tup, 'ĩhã hok yũm, yĩy 'ãk-tok max xe'ẽgnãg, yã Topak-tok xe'ẽgnãg.

³⁶Yũmmũg. 'Ãxape Iyamet kutut, tuk-tok te' kopa' yũm, ha mẽy te 6 'ũk-tok xuk, 'ũk-tok nõm hãmãxap xuk.

³⁷Topa te hãpxopmã'ax xohix. Kaxĩy.

³⁸Ha Mãnix te: —Hamũn. 'Ãte Topa puk kopaxux hãk xip, tu nũk xup, tu Topa tu hãpxopmãhã'. Xate hãm'ãktux max. Kaxĩy. Ha pexkox yõg nũ'kutnã'ax mõg.

³⁹'Ãmnĩy kutõgnãg 'ĩhã Mãnix yok, tu ta' mõg mõ'ka'ok, tu hãpxexka Yonex yõg kõmẽn tu' mõg, tu hãm xanep tu' mõg,

⁴⁰tu mõktu Yakanit pet tu' xupep, tu mõ'nãhã', tu 'Iyamet pu 'ãneo,

⁴¹ha' xupak, tuk-tok te' tut tex kopa' hittup, tu yãy xit,

⁴²ha 'Iyamet yĩy ka'ok, hu: —Topa te 'ũn xop pu hãmmaxnãhã', ha xa hãmmaxnã xexkah. Xate 'ãk-tok put putup, ha Topa te nõm pu hãmmaxnãp-tup kamah.

⁴³Tik tek xat mũk tut nũn. Putep tuk ha 'ãnũn? 'Ap yũmmũg'ah 'ãte pute 'ũm. 'Ũgkuxa te' yẽy.

⁴⁴'Ãte xa hãpxe'e 'ãktux: 'Ãte 'õg 'ãneo 'ãpak, 'ĩhãg kutok tek tex kopa' kuxa hittup, tu yãy xit.

⁴⁵Topa te hãm'ãktux, ha 'ãkuxa yũm ka'ok, hu' hip, pu Topa hãpxopmã', ha 'ãkuxa hittup. Kaxĩy.

⁴⁶Ha Mãnix te: —'Ũgkuxa te 'ã Topa xexka 'ãktux,

⁴⁷tuk koxuk te Topa tu' hittup kamah, hak hĩnnãhã', tuk pẽnã max,

⁴⁸'ĩhãk mũn kutõgnãg, yã Topa hã kãmãnat hex, yĩy tikmũ'ũn xohix te hãm'ãktux putup mõ'kuma' mõg, hu: “Topa te Mãnix pu hãmmaxnãhã'.” Kaxĩy.

⁴⁹Ha Mãnix te xe': —Topa ka'ok xe'ẽgnãg, tu tek mũn pu hãpxopmãhã', yã Topa max xe'ẽgnãg,

⁵⁰tu yãy yõg tikmũ'ũn kuxa ka', nõm xop yĩpkox pip Topa pu', ha tikmũ'ũn kuxa ka', xik-tok xop, xik mõkputox kuxa ka' Topa te', nõm xop yĩpkox pip Topa pu' kuxa ka',

⁵¹ha hãpxopmã max xe'ẽgnãg, tu' gãy nãm xop hã hãpxummãhã', nõm xop te hãmpe'paxex, hu: “'Ũgmũn xexkah.” Kaxĩy.

⁵²Topa te' xexka xop xupepmãhã, puk-tõgnãg xop yãyhã tu xexkah,

⁵³ha' hok xop pu hãpxop punethok popmãhã', tup-texop xexka pu hãpxop popmã 'ohnãg, tu': “Mõg, mõg!” Kaxĩy. Tu' xupepmãhã'.