Luka 1:1-53

¹Tago mangoro dia tar tumu ra varvai ure ra lavur magit di kapupi ia pire dat,

²da diat dia ga gigira papa ra vunapaina ma dia ga tultul ta ra tinata, dia ga tul tar diat ta vevet,

³damana iau ga nuk ia ba i boina ba iau bula ina tumu mal tar ia tam, Teopilo ra luluai, tago iau ga vakilang vanavana ra nga i ra lavur magit par papa amana,

⁴Upi una nunure ra dovotina ure ra lavur magit di ga tovo u tana.

⁵Ta ra kilala kai Erodes, a King kai ra Iudaia, tika na tena tinabar i ki abara a iangina Sakaria, a vuna tena tinabar Abia; ma kana taulai a iangina Elisabet, a bul mur tai Aron.

⁶Dir a ura tena takodo ta ra mata i God, dir murmur bulu ra lavur vartuluai par ma ra lavur varkurai bula, kai ra Luluai.

⁷Ma pa ta natu i dir, tago Elisabet i biu, ma dir a ura patuana.

⁸Io, ba i papait boko ra papalum kai ra tena tinabar ta ra mata i God, ta ra e na papalum kai kana vuna tarai,

⁹ma varogop ma ra mangamangana iat ta ra papalum kai ra tena tinabar, kana ra tiniba pi na ruk ta ra pal na vartabar kai ra Luluai upi na tun ra magit i ang na katkat.

¹⁰Ma ra kor na tarai par dia araring ra pia ta ra pakana bung di tuntun ra magit i ang na katkat tana.

¹¹Ma tika na angelo kai ra Luluai i tur pa pirana ta ra papar a lima tuna ta ra uguugu na magit i ang na katkat.

¹²Ba Sakaria i gire, i lavur nuknuk tana, ma i burut muka.

¹³Ma ra angelo i tatike tana: Sakaria, koko una burut, di tar valongore kaum niaring, ma kaum taulai, Elisabet, na kava natum, ma una tar ra iangina ba Ioanes.

¹⁴Una ga ma una gugu boko; ma mangoro bula diat a gugu tago da kava.

¹⁵Tago na ngala ta ra mata i ra Luluai, pa na mome ra vain ba ra tava i dekdek, ma na buka ma ra Takodo na Tulungen papa ta ra bala i nana.

¹⁶Ma na ben vatalil mangoro na natu i Israel tadav ra Luluai kadia God.

¹⁷Na lua tana ma ra mangamangana kai Elias, ma ta ra dekdekina bula; na vamaram tar ra bala i ra umana patuana tadav ra umana natu i diat; ma na ben ra lavur tena niol tadap ra kabinana kai ra lavur tena takodo, upi na mal pa ra tarai kai ra Luluai.

¹⁸Sakaria i tir ra angelo: Ava laka ra magit ina nunure go tana? Tago iau a patuana, ma i manga muka ra kilala kai kaugu taulai.

¹⁹Ma ra angelo i tatike tana: Iau Gabriel, iau vala turtur ta ra mata i God; di ga tulue iau upi ina ve u, ma upi ina kap go ra bo na varvai piram.

²⁰Io, pa una tata muka, una papaua ka tuk ta nam ra bung da pait ot pa go ra lavur magit tana, tago pa u nurnur ta kaugu tinata, nina da pait ot pa ia boko ta kana kilala.

²¹Ma ra tarai dia ungung pa Sakaria, dia kakaian tago i ki vailik ta ra pal na vartabar.

²²Ba i tar irop, i mama tata pa diat; dia nunure ba i tar gire ra ninana ta ra pal na vartabar; ma i tututu ka ta diat, ma i bombom uka.

²³Ba i tar par kana e na balaguan, i talil mulai ra kubana.

²⁴Ta nam ra e, Elisabet, kana taulai, i lalau pa ra bul, ma i paraparau ra ilima na gai, i tatike:

²⁵Ra Luluai i tar pait ra dari tagu ta nam ra e i gire ung iau tana, upi na tak vue kan iau nam ra magit iau kaina tana pire ra tarai.

²⁶Ba i tar laptikai kana gai God i tulue ra angelo Gabriel ta ra pia na pal Galilaia, a iangina Nasaret,

²⁷tadav ra inip na vavina, nina Iosep, a bul mur tai David, i ga vapopoe bat ia; a iang i nam ra inip na vavina Maria.

²⁸I ruk pirana, ma i tatike: Una gugu, u ti doan muka, ra Luluai i ki piram.

²⁹Ma i manga lavur nuknuk ta go ra tinata, ma i nuknuk ra balana ba ra varvagai ava go?

³⁰Ma ra angelo i tatike tana: Maria, koko una burut, tago God i gugu muka tam.

³¹Valongore! Una lalau pa ra bul, una kava natum, a tutana, ma una tar ra iangina ba Iesu.

³²Ma na rararang, ma da vatang ia ba Natu i ra Ngala Muka; ma ra Luluai God na tul tar tana ra kiki na king kai tamana David;

³³na kure vatikene ra kuba i Iakob; kana varkurai pa na ga mutu.

³⁴Maria i biti tai ra angelo: Na dave go, tago pa amir la ma ta tutana?

³⁵A angelo i tatike tana: A Takodo na Tulungen na ki tam, ma ra dekdek i ra Ngala Muka na vamalur u, ma da vatang nam ba una kava boko ba ra tena gomgom, Natu i God.

³⁶Ma gire, niurum Elisabet, ia ra tubuan na vavina, ma di ga vatang ia ma ra biu, ma go i tar lalau pa bula ra bul, a tutana, ma i tar laptikai kana gai.

³⁷Tago pa ta tinata kai God ba na bilua.

³⁸Maria i tatike: Iau go kari iau a tultul kai ra Luluai, da pait ia tagi da kaum tinata. Ma ra angelo i vana kan ia.

³⁹Ta nam ra e, Maria i tut, ma i vana lulut ta ra gunan i lualuana ta ra pia na pal kai Iuda;

⁴⁰ma i ruk ta ra kuba i Sakaria ma i vage pa Elisabet.

⁴¹Ba Elisabet i valongore ra tinata na varvagai kai Maria, a bul i ruarua ra balana; ma Elisabet i buka ma ra Takodo na Tulungen;

⁴²ma i manga tatike dari: U kaka, u ti doan ta diat ra vaden par, ma na doan bula nam una kava boko.

⁴³Ma ia laka iau, upi na i kaugu Luluai na vana piragu?

⁴⁴Ba iau valongore ra nilaim ta ra varvagai, a bul i gugu, ma i ruarua ra balagu.

⁴⁵Ma nina i tar nurnur, i ti doan, tago da pait ot pa nam ra lavur magit ra Luluai i ga tatike tana.

⁴⁶Ma Maria i tatike: A tulungeagu i pite pa ra Luluai.

⁴⁷A tulungeagu i gugu tai God, kaugu Tena Valaun.

⁴⁸Tago i tar gire ung kana tultul na vavina vakuku; tago papa gori ra lavur taun tarai diat a vatang iau ba iau doan.

⁴⁹Tago nina i dekdek muka, i tar pait kapi ra umana ngala na magit i tagu; ma i gomgom ra iangina.

⁵⁰Ma kana varmari i tadav ra lavur taun tarai mutu, dia ru ia.

⁵¹I ga ve tar ra ongor ma ra limana; i tar re varbaiane diat dia kolakolo ma ra nuknuk i ra bala i diat.

⁵²I tar vairop vue ra umana king, ma i tar vangala ra umana luveana.

⁵³I tar tabar vamaur pa diat dia mulmulum ma ta bo na magit; ma i tar tul vamulmulum vue ra umana tadar.