Lukas 1:1-53

¹Masra Teofilus, Furu sma ben pruberi kba fu skrifi den sani san ben psa na un mindri,

²soleki fa den sma di ben si ala den sani sensi na a bigin èn di ben panya a boskopu, ben ferteri wi.

³Ma baka di misrefi go ondrosuku fin'fini fa ala sani ben waka sensi na a bigin, mi prakseri tak' a bo bun fu skrifi den sani soleki fa den ben psa, poti ini wan buku gi yu.

⁴Mi e du disi fu yu kon si tak' den sani san den ben leri yu, na tru.

⁵Ini den dei di Herodes ben de kownu fu Yudea, wan Dyudomri ben de di ben nen Sakarias. A ben de fu a grupu fu Abia. En frow Elisabet ben de wan bakapikin fu Aaron.

⁶Den tu sma disi ben bun ini Gado ai, èn den ben hori densrefi na ala den komanderi fu Gado èn na san A ben wani tak' sma mus du. No wan sma ben man taki takru fu den.

⁷Ma den no ben abi no wan pikin, bika Elisabet no ben man kisi pikin, èn den ala tu ben kon owru kba.

⁸Now a ben de a ten tak' Sakarias ben mus du en wroko leki domri gi Gado, fu di a grupu fu en ben mus du a wroko a pisten dati.

⁹Dan soleki fa a gwenti fu den domri ben de, den ben hari lot fu luku suma ben mus go na ini a Santa Presi fu Masra fu go bron switismeri. Di den hari a lot, a sori tak' na Sakarias ben mus go.

¹⁰A yuru di a switismeri ben e bron, ala den sma ben de na prasi e begi.

¹¹Dan wan engel fu Masra sori ensrefi na Sakarias. A engel ben tnapu na a let'sei fu a altari pe a switismeri ben e bron.

¹²Di Sakarias si a engel, a skreki èn a kon frede.

¹³Ma a engel taigi en taki: “Sakarias, no frede. Gado yere yu begi. Yu frow Elisabet o kisi wan manpikin èn yu mus kari en Yohanes.

¹⁴Yu o breiti èn prisiri nanga en, èn furu sma o prisiri tak' a kon gebore.

¹⁵Bika a o de wan prenspari man fu Masra. A no mus dringi win noso sopi. Na ini en mamabere srefi a o furu nanga a Santa Yeye.

¹⁶A o meki furu sma fu Israel drai kon baka na Masra den Gado.

¹⁷A o waka na Masra fesi tapu a srefi fasi èn nanga a srefi krakti fu Elia. A o meki tak' pratifasi no de moro na mindri pikin nanga den bigisma fu den. A o meki sma di tranga yesi, bigin libi leki den sma di bun ini Gado ai. Na so a o meki a folku klari gi Masra.”

¹⁸Dan Sakarias aksi a engel taki: “Fa mi o sabi tak' a sani disi o psa? Bika mi owru kba, èn mi frow de tapu yari.”

¹⁹Dan a engel piki en taki: “Mi na Gabriyel, a wan di e tnapu krosbei fu Gado. Na En seni mi kon na yu fu ferteri yu a bun nyunsu disi.

²⁰We luku, den sani san mi taigi yu, o psa na a ten di Gado poti. Ma fu di yu no bribi san mi taigi yu, yu o babaw. Yu no o man taki te leki a dei tak' den sani disi psa.”

²¹A pisten dati den sma ben de na prasi e wakti Sakarias. Den ben ferwondru tak' Sakarias tan so langa ini a Santa Presi.

²²Di Sakarias kon na dorosei, a no ben man taki nanga den. So den sma kon ferstan tak' Gado ben sori en wan sani ini a Santa Presi. A meki wantu beweigi nanga en anu èn a tan babaw.

²³Di a ten kon kba san a ben mus du en wroko, a drai go baka na en oso.

²⁴Baka den dei dati en frow Elisabet hori bere. Feifi mun langa a no ben kmopo na ini en oso fu sma si en.

²⁵Elisabet taki: “Disi na san Gado du gi mi ini a ten di A sari mi. A puru a syen na mi tapu san mi ben abi mindri den sma.”

²⁶Di Elisabet ben abi siksi mun bere, Gado seni a engel Gabriyel go na a foto Nasaret ini a distrikti Galilea.

²⁷A ben mus go na wan yongu uma di noiti no ben sribi nanga wan man ete. Soleki fa a pramisi ben de, dan Yosef bo trow nanga en. Yosef ben de wan bakapikin fu kownu David, èn a yongu uma ben nen Maria.

²⁸Di Gabriyel go ini a oso fu Maria, a taki en odi. Dan a taigi en taki: “Masra de nanga yu, èn a blesi fu Masra de na yu tapu.”

²⁹Di Maria yere san a engel taki, a skreki tak' a bruya. A aksi ensrefi san a odi disi wani taki.

³⁰Dan a engel taki: “Maria, no frede. Bika Gado sori yu En bun-ati.

³¹Luku. Yu o hori bere, dan yu o kisi wan manpikin. Yu mus kari en Yesus.

³²A o de wan prenspari man, èn den o kari En a Manpikin fu a Moro Hei Gado. Masra Gado o meki A tron kownu na a presi fu En afo David.

³³A sa de a kownu fu a folku Israel fu têgo, èn noiti a tiri fu En o kba.”

³⁴Dan Maria taigi a engel taki: “Fa dati kan? Bika noiti ete mi sribi nanga wan man.”

³⁵Dan a engel piki en taki: “A Santa Yeye o kon na yu tapu, èn a krakti fu a Moro Hei Gado o saka kon tapu yu. Dat'ede den sa kari a santa pikin di o gebore a Manpikin fu Gado.

³⁶Luku, Elisabet a famiri fu yu, owru kba. Ma en srefi de nanga bere fu kisi wan manpikin. Den ben taki a no man kisi pikin, ma na siksi mun kba di a abi bere.

³⁷Bika noti no de san Gado no kan du.”

³⁸Dan Maria taki: “We, mi de na Masra anu. Meki ala sani psa nanga mi soleki fa yu taki.” Dan a engel gwe.

³⁹Baka dati Maria teki pasi go es'esi na wan foto san de ini den bergi fu a distrikti Yudea.

⁴⁰A go na Sakarias oso, dan a gi Elisabet odi.

⁴¹Di Elisabet yere a odi fu Maria, a pikin dyompo ini en bere. Ne Elisabet kon furu nanga a Santa Yeye,

⁴²dan a taki nanga tranga sten taki: “Fu ala den uma di de, Masra blesi yu moro wan fu den, èn a blesi fu Masra de tapu a pikin ini yu bere.

⁴³Ma fa mi du feni a bun disi, tak' a m'ma fu a Mesias kon luku mi?

⁴⁴Bika luku, di mi yere a odi fu yu, a pikin dyompo fu prisiri ini mi bere.

⁴⁵A blesi fu Gado de na yu tapu fu di yu bribi tak' a sani san Masra taigi yu, o psa.”

⁴⁶Dan Maria taki: Nanga mi heri ati mi e opo a nen fu Masra,

⁴⁷èn nanga ala sani san de na ini mi, mi e prisiri nanga Gado, mi Ferlusuman.

⁴⁸Bika A prakseri mi, aladi mi na a moro lagi knekti fu En. Luku, bigin fu now ala sma o taki tak' blesi de na mi tapu.

⁴⁹Bika Gado di abi Makti, du bigi sani gi mi èn a nen fu En santa.

⁵⁰A e sori sari-ati na ala den sma di e lespeki En, den sma di e libi nownow nanga den di o libi bakaten.

⁵¹Nanga a makti fu En, A du bigi wroko. A tyari bruya kon ini den prakseri fu den sma di abi bigimemre.

⁵²A meki den bigiman fu kondre lasi den makti, èn A opo den sma di trawan no e teri.

⁵³Den sma nanga angribere A gi nofo fu nyan, ma den guduman A seni gwe nanga soso anu.