Ruk 1:1-53

¹Iyayapan obiren dividivi me nu yapunup anotumat atuwa gigirumawa amatog teeme.

²Me dividivi mu barauya aig onne gunup. Iyayapan mu amatonewa gumbe yangowo yauyawa sira gae anotumat igiyawa desiromit tetan oya nau eme.

³Ne gaibu amatonewa gumbe yaimoyai dividivi yaug anona. Meoya Teopiras, apan kokawa oraiwa, genan yunat tetanwa me oraimina anoeni.

⁴Me gumbe ge yaug anoa dividivi wait toyau geniyawa me natawa.

⁵Judia kin Erod kumive, pirisi iviwa me Jakaraya wakene. Me Abaija dam meuma desiroma. Me biviwa Erisabet gaibu me Aaron dam gumbe yaig onnewa.

⁶Duwam mame mu God yangave oraimina eme. Mu Ayapan gwangwaneba undagit yaimoyai amareme.

⁷Mu ud onan. Kuiyawa Erisabet me agara vesin, sira mu duwam aita gudne.

⁸Jakaraya dam meuma nau gumbe, meoya God namive me pirisi nau meuma aivi.

⁹Pirisi nauwawa gwangwan gumbe, me kae bumpa gumbe wagomiyaya. Meve me Ayapan temporu danave unig aine yoma tayapama okettan oya.

¹⁰Me yoma tayapama okeriviwa, iyayapan obiren daieve agoniyag nun veme.

¹¹Ayapan aneyaeba me gumbe uwane, sira iyakaisi kem meuma yoma tayapama yutanwa apa yokene.

¹²Meve Jakaraya me yaunewa, me terag a ane.

¹³Aneya me gumbe wane, “Jakaraya a den a. Nun geumawa God anone. Ge biyuk Erisabet utugwa ud apan baraugempe. Ge iviwa ug yuwa me Jon.

¹⁴Me degadega gumbe gungap, sira iyayapan obiren degadega ape kuiyawa me yaitanwa oya,

¹⁵Kuiyawa me Ayapan namive kokawa ape. Me wain ge yoi yaigipama upeba den naigimpe. Guwawa Iyakaisiyapama noidauwape inawa danave yaipewa gaibu.

¹⁶Me God muma Ayapan gumbe Isuraeru usitainawa obiren sira bog ompe.

¹⁷Me Eraija guwawa ge yusiwa meuma gumbe Ayapan namive namu aipe. Me mamawaviwa nonowa tobiroriyape usitainawa gumbo. Me ape anoano topai eme igiyawa nonomagowa tobiroriyape anoano oraiwa igiyawa nonomagowa ape. Meve iyayapan waribiya mumpe Ayapan oya.”

¹⁸Jakaraya aneya gumbe singui wane, “Aninin ne oma ane mame yaug anotna? Ne nembo tayawa ana, sira ne vesin tayawa ane.”

¹⁹Aneya garawa wane, “Ne Gebrieru. Ne God namive yokeeniwa. God ne baraunegne genan watan oya, sira gae oraiwa mame diruktan oya onedna.

²⁰Gare mame ge yawa. Gare ge nogwa iyagita sira oma den ane gae wa. Kuiyawa gae neuma gumbe anotumat den ana. Kumiwa uwapewa gae neuma me natawa pawape. Ivi kum uwapewa oma ane gae wa.”

²¹Iyayapan Jakaraya oya amareme, mu pipam muteme divi oya temporu danave yobutatae wakene.

²²Me dauwanewa, me gae den dirumne. Mu yaug anoya me irawa me uyavi minawa temporu danave yaune. Kuiyawa me guwaguwawa aivi, noiwa iyagit wakene.

²³Nau meuma kumiwa wadne onananewa me sira taig gwe aine.

²⁴Ivi mame me biviwa Erisabet bugane, sira dud nanin gambenit me gwe bod wakene.

²⁵Me wane, “Ayapan mame me nenan ane. Gare me anoiviwa toyau negne, sira me ne ubmam neuma aug aine iyayapan gumbo.”

²⁶Dud naningamben desirom danave, God aneyaeba Gebrieru baraune Nasaret aine. Me gwetoimu Gariri danave.

²⁷Otau me apan iviwa Josep autan oya yapapara aya. Josep me Devid dam meuma yaig onnewa. Otau iviwa me Meri.

²⁸Aneya menan aig wane, “Gaun neumawa ge gungap. Ge baigan kokavit auwana! Ayapan ge gungap.”

²⁹Meri anopipanum kokavit ane. Sira anopipanum ane gaun mame natawa divi.

³⁰Megara aneya me gumbe wane, “Meri, a den a. God baigan meuma ge auwana.

³¹Ge bug a, sira ud apan yaipe. Ge iviwa ug yuwa me Iesu.

³²Me iviwa koka ape. Iyayapan wape me Apan Kokawa Painauvitwa Usiwa. Ayapan God me wampe mamawa Devid kin arawa aupe.

³³Me Jekob gweyawa yaibobot amarape viripusiwa onan. Kin at meuma onan den di ape.”

³⁴“Aninin mame ape? Ne apan den yaug anona.” Meri singui wane.

³⁵Aneya garawa wane, “Guwawa Iyakaisiyapama gungap uwape. Apan Kokawa Painauvitwa yusiwa meuma ge um gempe. Meve me yaipewa, iyayapan aib wape, me Apan Iyakaisiyapama, sira me God Usiwa.

³⁶Yawa. Ge evegwa Erisabet aita kumive ud autan aivi. Iyayapan waya me agara ane, megara me dud nanin gamben desirom danave bug aivi.

³⁷Kuiyawa God gumbe oma den anewa onan.”

³⁸Meri wane, “Ne Ayapan nauwawa eniwa. Gae geuma anin wanawa me gunap matatpe.” Meve aneya yankweg aine.

³⁹Me kumive Meri tam yoig at kokawa me tui arawa Judia oya tatevit aine.

⁴⁰Me Jakaraya gweyawa unig aig, me gaun meuma Erisabet wanne.

⁴¹Erisabet Meri gaun meuma anonewa, kikiyan inawa danave tupit dodne. Erisabet me demtawa aune Guwawa Iyakaisiyapama gumbe.

⁴²Noiwa kokavit wane, “Vesin yapowo waribiya genne. Ud inawa danave wakenewa me mina waribiyane.

⁴³Ayapan neuma inawa gunap uwanewa me oya ne anin waten?

⁴⁴Gaun geuma ne naunanap unignewa, dananap ud degadega gumbe tupit dodne.

⁴⁵Vesin me anotumat ane dividivi undag Ayapan wanewa me di matatpewa me di waribiyane.”

⁴⁶Sira Meri wane: “Guwanwa Ayapan waieni,

⁴⁷Guwanwa me God Waita Abnawa neuma gumbe degadega eni,

⁴⁸kuiyawa me ankwatave nau vesinawa ano negne. Gare mame apa utan aipewa, iyayapan undag mu nenan wape waribiya nedne,

⁴⁹kuiyawa Ayapan yusipama me divi kokavit nenan ane. Me iviwa Iyakaisi.

⁵⁰Me ano nunanawa iyayapan mu me gumbe aeba emewa gumbo wateteyamivi. Me kum gare aipe viripusiwa onan.

⁵¹Me naniwa gumbe yusiwa ane. Me iyayapan mu imuwo apanapan eme igiyawa atatai imne.

⁵²Me amareme igiyawa at muma gumbe bog yantene. Megara me mokona igiyawa me owantene.

⁵³Me iyagon igiyawa dividivi oraiwa utamne. Megara tawara obiren igiyawa kwemne ingui amiya.