LUKA 11:37-52

³⁷Pomwe Jezu adamala akhalewalewa, m'falizeu m'bodzi adamucemera kuti akadye naye. Na tenepo iye adayenda acikakhala patsantsali la kudyera.

³⁸Tsono m'falizeuyo adadabwa pomwe adamuwona kuyamba kudya acisaya kusamba m'manja.

³⁹Ndipo Mbuya adamuwuza kuti: “Afalizeumwe mumbatsuka kunja kokha mikombo na ndiro. Tsono mitima yanu nja ndewo na mingululi.

⁴⁰Mapsirumwe! Kodi ule omwe adakondza kunja, ni m'bodzo-bodzi lini omwe adakondza mkati?

⁴¹Tsono tomani kuthandiza anyakusauka na bzinthu bzomwe munabzo. Na tenepo bzinthu bzentsenebzo bzin'dzacena.

⁴²Tsoka kuna imwe afalizeu! Nakuti imwepo mumbateweza mitemo yentse ya Mozeji, mumbapereka kuna Mulungu cacikhumi ca mbeu zentse za m'munda. Tsono mumbayebwa cilungamo na lufoi la Mulungu. Na tenepo citani bzimwebzi mucisaya kuyebwa bzinangobzi.

⁴³Tsoka kuna imwe afalizeu! Nakuti imwepo mumbafuna kukhala m'mipando ya ulemu ya m'nyumba zakupembera na kumbamusidwa m'misika.

⁴⁴Tsoka kuna imwe afalizeu! Nakuti kuteweza mitemo yanu bzidandendemera ninga munthu ali kupita nthenje aciponda nthutu nakusaya kudziwa, uko ni mukho.”

⁴⁵Ndipo m'pfundzisi wa ntemo m'bodzi adamuwza kuti: “Misiri, mafala yamweya muli kutukwana nayo ife-panombo.”

⁴⁶Tsono Jezu adamutawira aciti: “Tsokambo kuna imwepo apfundisi wa ntemomwe. Nakuti mumbanyamuza andzanu mitolo yakulemera kwene-kwene. Tsono imwepo mumbawathandiza lini kuwasendza napo na cala cokha.

⁴⁷Tsoka pomwe kuna imwepo thangwe mumbakondza nthutu za apolofetapolofeta omwe adaphedewa na azibabanu.

⁴⁸Na tenepo imwepo ndimwe mboni thangwe mwatawira bzinthu bzomwe adacita azibabanu. Nakuti iwo adapha apolofetawo ndipo imwepo muli kuwakondzera nthutu.

⁴⁹Na tenepo, Mulungu udziwi bwace adalewa kuti: 'Ine ndin'dzatumiza apolofeta na atumiki, tsono winango an'dzaphedwa na winango an'dzathothedwa.

⁵⁰Na tenepo ntundu omweyu un'dzamangidwa mulandu na thangwe ra kupha apolafetawo, kuyambira pakulengedwa kwa dziko.

⁵¹Ndipo kutomera pakuphedwa kwa Aberi mpaka kwa Zakaliya, iwo omwe adaphedwera pakati pamphatso na mbuto yakucena. Ndikukuuzani cadidi kuti ntundu omweyu un'dzamangidwa mulandu.

⁵²Tsoka pomwe kuna imwe apfundzisi wa ntemo! Nakuti mwatenga mpfunguliso wa ndzeru. Na tenepo imwepo mulibe kupita m'mwemo muciphingizambo pomwe andzanu omwe akhafuna kupita.”