Lucas 4:19-38

¹⁹aw amon megpetaga-taga a te dimateng den se aldaw te ipekità te Pengolo se keido din.”

²⁰Penga te pegbasa din kenyan, linolon din se libro aw in-olì din diyà te egpengibing te simbahan. Penga niyan, nenenoo si Jesus amon megtoladà. Penga niyan, netingen se kedita te otaw aw timengteng dan diyà kandin.

²¹Nayan, migtebò si Jesus migtoladà, kagi din, “Seini aldaw, netoman den se kagi te Timanem dinineg niyo.”

²²Mig-aneng-aneng se kedita te otaw te mèpiya se kagi din, aw nepela dan kenyan so eden dan aw olò sikandin batà i Jose.

²³Minikagi heman si Jesus, “Meibeg kaw besi megpeaneng-aneng kanak te eg-ikegiyen tadon, ‘Aw doktor ka, keilangan ipetaga-taga no iyan pineokit te pegbolong no te kamno pegkeotawun.’ Dinineg niyo den te doen menge kepelahan ininang ko doton te Kapirnaom, aw mikagi kaw besi heman diyà kanak te keilangan inangen ko heman se menge kepelahan dini te kanak probinsya.

²⁴Meneng eneng-enengi niyo se kagi ko seini. Kenà egsegmanen se telekeliwat te kagi te Timanem kidoen te kandin probinsya.

²⁵Seini se kebenalan ipeaneng-aneng ko kenyo. Gebii dalem te pegkeliwat i Elias te kagi te Timanem, wedad palos odan taman te telo se omay aw enem se bolan, aw doen heman ontò medaet bayil dini te kedita te ogpeanan te kemonaan tadon. Pengkey medita se bayi balo nelimahan dini te Judiya,

²⁶meneng kenà dan se sinogoan te Timanem ki Elias, so insogò din si Elias megtabang te bayi balo kenà Judiyo eg-ogpà kidoen te Saripta sakop te Sidon.

²⁷Iling heman kenyan se neinang dalem te pegkeliwat i Eliseo te kagi te Timanem. Pengkey medita se Judiyo pigtompig, meneng kenà dan se pinegolian din, so olò din pinegolian se kenà Judiyo si Naaman sakop te Sirya.”

²⁸Se otaw netipon kidoen, yan se menge Judiyo. Pegdineg dan te egkeidowan te Timanem se menge otaw kenà Judiyo, yan se doun te neopal se kedita dan.

²⁹Penga niyan, timindeg dan aw impelowà dan sikandin lekat te lonsod dan. Kidoen diatas te bontod se lonsod dan. Yan inibing dan si Jesus doton te pangpang niyan amon idagdag dan sikandin.

³⁰Meneng minokit si Jesus diyà te tengà-tengà te otaw netipon, aw nesayo sikandin.

³¹Nayan, dimoton si Jesus te lonsod te Kapirnaom sakop te probinsya te Galiliya. Pegkesebado, migtoladà sikandin.

³²Ontò nepela se kedita te otaw dimineg te intoladà din, so tinekingan si Jesus te tolos.

³³Kidoen te simbahan te Judiyo, doen otaw dinetengan te bosaw. Timawal sikandin aw dakel se kagi din,

³⁴“Tay, Jesus tege Nasarit. Ikà egsamok kenami. Eked kay keibeg aw pegbàtan kay nikaw. Netegahan ko aw sinu ka. Sikona se metòlid otaw insogò te Timanem.”

³⁵Meneng migsagda si Jesus te bosaw, kagi din, “Kepenek ka. Lowà ka den lekat kandin.” Penga niyan, imbontog te bosaw se otaw sìyan aw limowà lekat kandin, meneng wedà elegi se otaw.

³⁶Nepela se kedita te otaw, aw migpebelaw-belaway dan, “Tay law. Sebad se ipegtoladà din. Ontò sikandin metolos, so aw megpelowà sikandin te menge bosaw, egtolò dan kandin.”

³⁷Penga niyan, ontò nedengeg si Jesus kidoen te kedita te ogpeanan medapag doton.

³⁸Pegkesayo i Jesus lekat te simbahan te Judiyo, dimoton sikandin te balay i Simon iningedanan din ki Pedro. Pegdateng din doton, ontò netigdaan se ogangan i Pedro bayi piglegenaw, aw nemoyò dan te tabang din.