Lúkas 4:19-38

¹⁹Ig awahkisun adahan nah ekkene ku Uhokri gihawkanaprik kuwis danuh adahan ig amnihpiye hiyeg.”

²⁰Pisenwa gipegbohan inakni yuwit, ig Kiyapwiye Jesus sabuk ini kagta ig diyuhkisni ta git kagta akapriwten. Ayteke ig bat ayge gipetunkis hiyeg adahan ig gikannuhtenkis. Igkisme madikte ipeg ta gimkat.

²¹Ig awna ta gitkis hiyeg: ―Ku apim inin inakni yuwit Uhokri gannasan minikweknene metakwa in kahayak amun ini ku aysaw yis timapni.

²²Igkis hiyeg timapni henne, igkis wakaymnibdi gimin. Igkis awna: ―Inakni kibeyne yuwit. Mmahki ig awna inakni yuwit henne? Ka ba yis hiyá ku ner amekene Josénen gikamkayh?

²³Ig hiyapni henne, ig awna gitkis: ―Ay pahat yuwit patuwesbuhka ku pariye wis inpawa awna ku aysaw wis pukuhpaw gibohri pahapwi. Wis awna: “Ku pis igyerwa piyihekeputne, asá piyih pipit kite.” Ku apim inin yis awnanek inakni yuwit nuthu. Yis awna: “Usuh timé pak ku pis keh kaayhsima annut ayhté Kafarnawh ku pariye hiyeg amadgaya inin ka hiyá nikehka. Ku inyerwa pis keh annut ayge, uyá akki wothu pannu ay apit inin piwaxri ku kiney pis aymuhwa.”

²⁴Ayteke ig Kiyapwiye Jesus awna akiw. Giwn: ―Yuma pahapwinama Uhokri gawnepe kiyathaka gapitkis hiyegipiyene ku pariye apitya giwaxriwa. Hennewatbaki in.

²⁵Hennewa in ku samah minikwak ku kapim Uhokri gawnepe amekene Eliyas ay amadga inin. Apim ini muwok ka wayk adahan mpanabu kamukri akak abusku. Nikwe mihetniki danuh atere. Kaayhsima madankunopwi judeyanopwi ayge apit Judeyamnaw.

²⁶Ig amekene Eliyas ig hiyeg judeyene henneme ig ka awahkiska guminkisma norras ku pariye apitya giwaxriwa adahan ig gamnihpitnikis. Kawa. Ig awahkiska gumin pahapu madankuno ku pariye apitya paytwempu Sarepta kennesa arimkat paytwempu Sidoh.

²⁷Hawwata akiw ariwnteke ini, ku kapim Uhokri gawnepe amekene Elisew ay amadga inin, ayge Judeyamnaw kaayhsima hiyeg axpusakare apit busukne. Kameki ig makniwigkisme. Igme pahapwi kane judeyenema giw Naamah, ku pariye apitya Síramnaw, ignewa ku pariye makniwhka.

²⁸Igkis hiyeg agikunepwi ini leglis igkis timapni inakni yuwit henne, igkis kaayhsima dagawne git Kiyapwiye Jesus ku samah ig kinetihwa amin ku samah Uhokri pi kapigsate hiyeg kane judeyenepwima giwkis hiyeg judeyenepwi.

²⁹Igkis awna: ―Uyay umehpig! Ini paytwempu ay apit pahá waxri imuhgipitnene. Ayteke nikwe igkis ipukepri apititak paytwempu. Igkis waxepri ta arit kasebapawnene kahadbe igkis tukuhpig ayteke.

³⁰Igme hiyapni henne, ig mpiye gipuriwkis. Ig tipik giwkis.

³¹Ig danuh ta apitit paytwempu Kafarnawh ayhté Galiléyamnaw. Ayge ig kannuhne hiyeg abet samdi, abet ini hawkri ku pariye hiyeg judeyenepwi kiyatha.

³²Nerras hiyeg aygnenepwi wakaymnibdi gidahan ku samah gikannuhakni. Mmanawa ig kinetihwene akak madikte gikiythani.

³³Ayge agiku ini leglis pahapwi awayg wapityewnipye mbeyepye. Ig kabiman kihhaw. Ig awna git:

³⁴―Aa, Jesus nazaréyene, ka ba kiyimwih usuh. Pariye pikehni ukakhu? Mmah pis ayta pisenwepye uhawkan ku apim inin? Nah hiyaknap ku pis Uhokri gikanyan barewpitye.

³⁵Ig Kiyapwiye Jesus timapni henne, ig himehe ner wapitye. Ig awna git: ―Tinwohaw. Asá pes ayteke gipititak ner awayg. Aynewa ig wapitye nuwiswig. Ig keh ig tuguhe gibetkis hiyeg. Ayteke ig pese gipititak. Ig ka keh mbaynama gikak aynesnima.

³⁶Madikte hiyeg hiyapni henne, igkis wakaymnibdi. Igkis kinetihwenes pawtak. Igkis awna: ―Mmah awitwak git inakni giwn? Ig pekkis wapityempu akak madikte gikiythani akak gidatni. Igkisme pes.

³⁷Ariwnteke ini, inetit gimin Kiyapwiye Jesus ibekhewpi muwwapu apitiw ini waxri.

³⁸Ayteke ig Kiyapwiye Jesus kannikaw pese agikutak ini leglis, ig tipik. Ig danuh ta gipinekut kiyapwiye Simawh Pedru. Ig uté kiyapwiye Simawh Pedru gimatru ayge. Eg nawepyo kaayhsima. Ayteke nerras hiyeg ayge amnihswe git Kiyapwiye Jesus gudahan.