Ruka 4:19-38

¹⁹Tonehpose roropa ywy ynara kase ipoetory tomo a, ‘Seroae opynanohtorỹko Ritonõpo mana,’” tykase Jezu, Izaja nymerohpyry tysekeremase eya.

²⁰Morotoino pape totapuruse ropa eya isekeremaxĩpo. Mame tokarose ropa orutua a, atamorepatoh erase akorehmane a. Mame typorohse ropa ynororo kohrame. Mame tonese eya xine tỹme.

²¹Mame tõturupitose eya xine. Ynara tykase, —Seromaroro sero ynysekeremahpyry ypoko kynako. Onetahpyrykõ morararo ypoko kynako, tykase Jezu eya xine.

²²Mame tõsenuruhkase toto, —To! Mose nysekeremahpyry hxo reh kure kynako, tykase. Imehnõ roropa ynara tykase, —Joze mũkuruhxo tã mosero roropa, tykase toto.

²³Mame ynara tykase Jezu eya xine, —Ynara katopõpyryae ro matose ynara ãko ya, “Opi warõme awahtao ãmoreme osepinohko,” katopõpyryae ro, morara ãko matose ya. “Kapanaũ po Ritonõpo jamitunuru tonepose oya imehnõ neneryme. Moro sã tyriko taro, oesary nymyry po,” ãko roropa matose ya, tykase Jezu eya xine.

²⁴—Yrome ynara ãko ase oya xine, urutõkõ eahmãko imehnõ mã repe. Yrome esarypõkõ mã oneahmara mã toto. (Ritonõpo omiry ekarone omiry etary se pyra imarõkõ mana.)

²⁵Etatoko pahne, zae rokẽ ynara ãko ase oya xine. Pake Eria maro tuhke pytỹpo tõ kynexine Izyraeu tomo, konopo oehpyra toehse ahtao. Oseruao jeimamyry motye taropose konopo oehpyra. Moromeĩpo tỹkyryneke pyra toehse toto Izyraeu tõ esary po. Tuhke pytỹpo tõ toetuarimase.

²⁶Yrome eya xine Eria onenyohpyra Ritonõpo kynexine. Imepỹ pytỹpo a rokẽ tonyohse, Saretapono a rokẽ tonyohse ynororo Ritonõpo a, akorehmase. Juteukara a tonyohse ynororo Xitõ rãnaõpono a.

²⁷Mame tuhke roropa ipũ imotatyã moroto Izyraeu tomo Eriseu maro. Yrome toto onukurãkara tokurehse Eriseu. Naamã rokẽ tukurãkase eya. Xiriapõ roropa mokyro kynexine juteukara, tykase Jezu eya xine.

²⁸Morarame morara kary etaryke tyya xine tyekĩtapãse toto, atamorepatohtaõkomo.

²⁹Towõse roropa toto. Jezu tapoise eya xine. Tarose roropa pata poe eya xine kaetoko exikety jakanamãka Jezu ematohme repe tyya xine. Japery epoe kynexine pata. Moro poe Jezu emapory se toh kynexine repe.

³⁰Yrome imoihmãkõ rãtakuroko toytose ropa Jezu. Mame toytose ropa rahkene. Enara.

³¹Morotoino Kapanaũ pona toytose Jezu, Karirea rãnaka. Moroto ahno tamorepase eya oserematohae rokene.

³²Mame tõsenuruhkase toto Jezu omiry etaryke tyya xine. Orẽpyra tamorepase toexirykõke eya. —Zae mose omiry, tykase toto.

³³Moro tao atamorepatoh tao jorokohpe exikety kynexine. Tykohkohtase ynororo opore, jorokohpe toexiryke.

³⁴—Jezu Nazarepono, oty se hma yna a? Oty kase moehno? Yna enahkapose? Yna irumekako. Awaro ase. Ritonõpo mũkurume oexiry waro ase. Inenehpohpyry kurã mase, tykase jorokohpã Jezu a.

³⁵Mame ynara tykase Jezu joroko a, —Mynyhme rokẽ exiko. Mose ae otũtako ropa, tykase eya. Mame mokyro jorokohpã tomapose joroko a nono pona repe. Yrome onyryhmara. Moromeĩpo tutũtase ropa rahkene mokyro ae. Morarame toekurãkase ropa.

³⁶Mame tõsenuruhkase toto, morotaõkõ emero. Ynara tykase toto oseya, —Otãto puhko keh mose omiry nae? Joroko tõ tũtanohpõko ropa nae, tõmiry ke rokene. Orẽpyra toexiryke, aomiry jamihme nase, tykase toto.

³⁷Mame Jezu tokãtose eya xine pata tõ punero, Karirea zomye, enara.

³⁸Morotoino atamorepatoh tae toytose ropa Jezu Ximão tapyĩ taka. Ximão merenoty oxirohnõko kynexine itamurume. Mokyro kure pyra exiry tokarose Jezu a imarõkomo a. —Mokyro ikurãkako ropa, tykase toto.