ሉቃሴ 4:19-38

¹⁹ዬያጉዲ ሓሣ ጎዳ ፔ ዴሮ'' ዻቂሻንዳ ዎዳ'' ሃማታሢ ታ ኬኤዛንዳጉዲ ታና ዳኬኔ።»

²⁰ዬሱሴ ማፃኣፔሎ ጳንጪ ቤርታ ዔቄ ዓሢም ዒንጋዖ ዴዓዛ ዓይሁዶ ዓሶኮ ቡኪንቶ ቤዛ ዓኣ ዓሳ ጊዥ ጌይ ዒዛ ዛጊሢ ዓርቄኔ፤

²¹ዒዚያ፦ «ሓይ ሓሢ ናባቢንታንቴ ዒንሢ ዋይዜ ማፃኣፖ ቃኣላ'' ሓኖ'' ኩሜኔ!» ዔያቶም ጌዔኔ።

²²ቢያሢ ዒዛ ኮሺ ማሂ ጌስታኔ፤ ዒ ኬኤዛ ኮዦ ቃኣሎ''ናኣ ዲቃቲ ሄርሻዖ፦ «ሓይ ዮሴፔ ናዓሢቱዋዓዳ?» ጌዔኔ።

²³ዬሱሴ ዔያቶም ማሃዖ፦ « ‹ሓይ ኔ ዼኤሾ ዔራሢ ሂንዳ ኔና ዻቂሼ› ጌይንታ ኮኦኪንሦ ታጊዳ ዒንሢ ኬኤዛንዳሢ ታ ዔራኔ፤ ዬያጉዲ ‹ቂፒርናሆሜይዳ ኔ ማዼኔ ዓሳ ጋዓንቴ ኑ ዋይዜሢ ቢያ ሃይካ ኔ ዓጮ''ይዳኣ ማዼ› ዒንሢ ታና ጋዓንዳኔ» ጌዔኔ።

²⁴ጎኔ ታ ዒንሢም ጋዓኔ፦ «ፆኦሲ ማሊሢ ኬኤዛ ዓሲ ፔ ዓጮ'' ዓሶ ኮይላ'' ቦንቺንቱዋሴ፤

²⁵«ዋይዙዋቴ! ጎኔ ታ ዒንሢም ኬኤዞም፤ ፆኦሲ ማሊፆ ኬኤዛ ዔኤሊያሴ ዎዶ''ና ሃይሦ ሌዔና ላሆ'' ዓጊኒና ዒርዚ ዋርቂባኣሢሮ ዓጮ'' ቢያይዳ ዼኤፒ ናይዚ ኬስኬኔ፤ ዬኖ ዎዶ''ና ዒስራዔኤሌ ዓጮ''ይዳ ዜኤሪንዶ ማዔ ሚርጌ ላኣሊ ዓኣንቴ፥

²⁶ዔኤሊያሴ ሲዶና ጌይንታ ዓጮ''ይዳ ሴራጲታ ጌይንታ ጉርዴሎይዳ ዓኣ ፔቴ'' ዜኤሪንዴስኬኖ ኮይላ'' ሌሊ ዳኪንቴያፓዓቴም ሜሌ'' ዖ ኮይላ''ኣ ዳኪንቲባኣሴ።

²⁷ዬያጉዲ ሃሣ ፆኦሲ ማሊፆ ኬኤዛ ዔልሳዒ ዎዶ''ና ዑሢዳ ኬስካ ዶርዖና ዓርቂንቴ ዓሲ ዒስራዔኤሌ ዓጮ''ይዳ ሚርጌ ዓኣንቴ ሶኦሪያ ዓጮ'' ዓሢ ኒዒማኔፓ ዓታዛ ዔያቶይዳፓ ፔቴ''ታዖ ዻቂባኣሴ» ጌዔኔ።

²⁸ዓይሁዶ ዓሶኮ ቡኪንቶ ቤዛ ዓኣ ዓሳ ቢያ ዬያ ዋይዛዖ ዻጋዺ፥

²⁹ዬሱሴ ጎቺ ዔኪ ካታማፓ ዙሎ'' ኬሴ''ኔ፤ ዬና ካታሜላ ማዢንቴሢ ዹኬ ዑስካታሢሮ ዒዛ ዔያታ ጎኦቦ'' ሂዒ ዳካኒ ኮዒ ዔኪ ዓኣዼኔ።

³⁰ዒዚ ጋዓንቴ ዔያቶኮ ባኣኪና ቶሊ'' ዴንዴኔ።

³¹ዬካፓ ዬሱሴ ጌሊላ ዓጮ''ይዳ ዓኣ፥ ቂፒርናሆሜ ካታሜሎ ዴንዲ ዒኢካ ዴሮ'' ዓይሁዶ ዓሶኮ ሓውሾ ኬሎ''ና ዔርዛኔ።

³²ዒዚ ቢታንቶና ኬኤዛሢሮ ቢያሢ ዒዛኮ ዔርዚፆና ዲቃቲ ሄርሻኔ።

³³ዒኢካ ዓይሁዶ ዓሶኮ ቡኪንቶ ቤዛ ፑርታ ዓያና ዓርቄ ዓሲ ዓኣኔ፤ ዒዚ ዼኤፒ ዑኡሲና ሂዚ ጌዒ ዒላቴኔ፦

³⁴«ናዚሬቶ ዬሱሴ! ኑኡኮ ኔኤና ዎላ'' ዓይጎ ካኣሚሢ ዓኣይ? ኑና ኔ ባይዛኒ ሙኪያ? ኔ ዖና ማዔቴያ ታ ኔና ዔራኔ፤ ኔኤኒ ዱማዼያ ፆኦሲ ናይኬ!»

³⁵ዬሱሴያ ማሃዖ ፑርቶ ዓያናሢ፦ «ዚቲ ጌዒ፥ ሃያ ዓሢፓ ኬስኬ!» ጌዒ ጎራ''ዛ፥ ፑርቶ ዓያናሢ ዓሢ ዴሮ''ኮ ቤርታ ሎንሤስካፓ ፔቴ''ታዖ ዔኤቢ ዎኦቱዋዖ ኬስኬኔ።

³⁶ቢያሢ ዲቃቲ ሄርሻዖ ዎሊ ኮይላ''፦ «ሃይ ዎዚጉዴ ባኣዚ''ዳይ? ቢታንቶና ሓሣ ዎልቄና ፑርቶ ዓያኖ ዒዚ ዓይሣኔ፤ ዔያታኣ ዒዛም ዓይሢንቲ ኬስካኔ» ጌዔኔ።

³⁷ዬሱሴኮ ሱ'ንፃ ዬኖ ዓጬ''ሎ ኮይሎ''ይዳ ቢያ ዋይዚንቴኔ።

³⁸ዬሱሴ ዓይሁዶ ዓሳ ቡኪንታ ቤዛፓ ዔቂ ሲሞኦኔ ማኣሪ ዓኣዼኔ፤ ዒኢካ ሲሞኦኔኮ ባይሳ ሚርጌና ቆፂንቲ ላሂ ዓኣኔ፤ ዬያሮ ዒዞ ዒ ፓሣንዳጉዲ ዬሱሴ ዔያታ ሺኢቄኔ።