San Lucas 4:19-38

¹⁹Para jusaganñaejon y guaeyayon na año y Señot.

²⁰Ya jajuchom y leblo ya anae janatalo y ministro, matachong; ya todo y mangaegue gui guimayuus, güiyaja manatan.

²¹Ya jatutujon sumangane sija: Pago esta macumple este na tinigue gui talanganmiyo.

²²Ya todoja manmannae testimonio ya esta ninafanmanman nu minauleg sinangan ni manjujuyong, gui pachotña; ya ilegñija: Ti güiya ini y lajin José.

²³Ya ilegña nu sija: Magajet insanganeyo nu este na sinangan: Medico, amte namaesajaoja: todo sija injingog na unfatinas guiya Capernaum, fatinas locue güine gui tanomo.

²⁴Ya ilegña: Magajet na jusangane jamyo, na ni un profeta guaegayon gui tanoña.

²⁵Lao magajet jusangane jamyo: Megae na biuda sija guaja gui Israel gui jaanin Elias, anae y langet majuchom tres años yan saes mesas, anae guaja dangculo na ñinalang gui todo y tano;

²⁶Lao ni uno guiya sija nae, esta matago si Elias, na as Sarepta, guiya tanon Sidon, guiya un palaoan biuda.

²⁷Ya megae na ategtog locue guaja guiya Israel gui tiempon y profeta Eliseo; lao taya guiya sija esta magasgas, na si Naaman taotao Siro.

²⁸Ayo nae todo y taotao gui guimayuus manbula y linalalo, anae jajungog estesija;

²⁹Ya mangajulo, ya chumulegüe gui sanjiyong y siuda, ya macone asta gui sanjilo y egso, anae esta maplanta y siudañija, para ufanyute gui papa.

³⁰Lao güiya, malofan gui entaloñija, ya mapos.

³¹Ya mato papa guiya Capernaum, siudan Galilea, ya ayo nae mamananagüe gui sabado na jaane:

³²Ya sija ninafanmanman nu y finanagüeña; sa y sinanganña gaeninasiña.

³³Ya gaegue gui guimayuus un taotao na guaja anite ináplacha; ya umagang dangculo na inagang.

³⁴Jei! pelojam! para jafajam nu jago, Jesus Nasareno? Matojao para unyulangjam? jutungojao jayejao; jago ayo na Santos gui as Yuus!

³⁵Ya si Jesus jalalatde ya ilegña: Pacaca ya maela juyong guiya güiya. Ya anae y anite mayute güe gui entaloñija, jumuyong guiya güiya; ya taya ninalamen.

³⁶Ya minamanman mato gui jilo todo sija, ya manadingan uno yan otro, ilegñija: Jafa na cuentos este? Sa nu y gobietnaña yan y ninasiñaña jatago y áplacha na anite sija ya unfanjuyong?

³⁷Ya y famaña masanganñaejon todo y lugat sija gui oriyaña ayona.

³⁸Ya jacajulo jumanao juyong gui guimayuus ya jumalom gui guiman Simon; ya y suegran Simon esta umaason, malingo nu y dangculo na calenturaña; ya matayuyutgüe pot güiya.