Lucas 3:10-36

¹⁰januxun yudabun Juan jaskai ninkatan yuka ikin: —Jaskakenan, Dios daewakinan, ¿jaska waxanpa?— akeakeabu

¹¹Juanen jatu yuikin: —Dios daewakinan, min tadi dabeyadan, ja nuitapai tadiuma man betsa inantiduki. Ja inun, min pitiyadan, yuda betsa piti jayama man betsa inantiduki— iwanan, jatu yuikubainaya

¹²jabun romano gobierno pei bixunmisbudi jau eadi nashimanun ika bexun yukakin: —Yusinaan, ¿nukukain, nun jaskatidumen?— akabu

¹³Juanen jabudi yuikin: —Gobierno pei bixunkin man ichawaxunmisdan, janu kesua besti xanen ibun matu yunua bixunkubainxankanwen, ana jatu padanmadan— jatu waya

¹⁴januxundi soldadobundi yukakin: —Nukukain, yusinaan, shinan betsa watan mia unanmakatsidan, ¿nun jaskaxanai?— akabu Juanen jabudi yuikin: —Matudan, matun shinanen ichakanikakin jatun jamapai mebinyamakubainxankanwen. Ja inun, chani chakakin yuda betsan pei padantan mebinyamakanwen. Jakia matun daya pei besti bi benimakubainxankanwen— jatu waya

¹⁵ninkatan ichapabu jawen janchawen benimakin jabun medabenan manakin Juankidi shinain yuka iki yuinamekin: “Diosun yubani nukun Mesías Cristodan, ¿jamenkain?” ikaibu

¹⁶jaskaibu Juanen jatun shinan unankin dasibi jatu nemakin yuikin: —Chanima, eanan jawen matu unanmati wakin jenewen besti en matu nashimakubainaii. Jakia ja man jakidi shinainan, kushipajaidatun ea binuan chipu juikiki. Kushipajaida mesetun ea binujaidawen taexun en jawen jawaumajaidatun jaska waxun jawen bichi tae mexpun pekakin medabewakin jawen dayadu itsakin kushipa midintun en axuntidumaki. Jakia jatun matu pepawakin Diosun Yushin Pepa matu inantan bika matu tenemakin matun chakabu buakin yamawa keska waxanikiki, jawada chakabu bechipaiama chiwen kua keska wakinan.

¹⁷Jaska inun, xekiwan bimi ta keyuxun pepa aduti anu adutan jawen xepa man kuamis keska wakin dasibi jawenabuma danankin jawa chi nukaisma anu udenxun kuanun, iwanan, manakubainikiki— iwanan,

¹⁸januxun jancha ichapawen jatu nemakin yusinkin jatun shinan jatu betsa wamakin kakape Juanen jatu yusinkubainaya

¹⁹januxun judiobun xanen ibu Herodesin jawen betsa Filipon ain Herodías mebinshina inun chakabu betsa betsapa wakubainai ninkakubainkin uintan yudabu jakidi yuishinxun Juanen nemakin jawen chakabu jenemanun, iwanan, betsabun ninkaibun Juanen Herodes nemakin ja ashianwen taexun

²⁰Herodes jaki sinatakin Juan jau ana jakidi janchayamanun, iwanan, jawen soldadobu jatu bichimanikiaki.

²¹Juan bichidiabuma yuda ichapabu nashimakubainkin Jesúsdi Juanen nashima jawen Epa Diosbe janchaya nai baxnei

²²Diosun Yushin Pepa deiwan keska jui jamamaki butuaya nai anuxun jawen Epan yuikin: —Miadan, min en bakeki. En mia bechipaijaidakin katunidan, en miwen benimajaidaii— anikiaki.

²³Jabiatiandi Jesús 30 badiya jawen Epa Dios dayaxunkin taewaya Josén yumewaimawen taexun yudabun yuikin: “Jesúsun epadan, Joséki”, iwanan, yuikubainibukiaki. Jawen xenipabukidi mia yuinun ninkawe. Josén epadan, Elíkiaki.

²⁴Elín epadan, Matat inikiaki. Matatin epadan, Leví inikiaki. Levín epadan, Melquí inikiaki. Melquín epadan, Janai inikiaki. Janain epadan, José inikiaki.

²⁵Josén epadan, Matatías inikiaki. Matatíasin epadan, Amós inikiaki. Amósin epadan, Nahúm inikiaki. Nahúmnen epadan, Eslí inikiaki. Eslín epadan, Nagai inikiaki.

²⁶Nagain epadan, Máhat inikiaki. Máhatin epadan, Matatías inikiaki. Matatíasin epadan, Semeí inikiaki. Semeín epadan, Josec inikiaki. Josecin epadan, Joiadá inikiaki.

²⁷Joiadán epadan, Johanán inikiaki. Johanánen epadan, Resá inikiaki. Resán epadan, Zorobabel inikiaki. Zorobabelin epadan, Salatiel inikiaki. Salatielin epadan, Nerí inikiaki.

²⁸Nerín epadan, Melquí inikiaki. Melquín epadan, Adí inikiaki. Adín epadan, Cosam inikiaki. Cosamnen epadan, Elmadam inikiaki. Elmadamnen epadan, Er inikiaki.

²⁹Erin epadan, Josué inikiaki. Josuén epadan, Eliézer inikiaki. Eliézerin epadan, Jorim inikiaki. Jorimnen epadan, Matat inikiaki. Matatin epadan, Leví inikiaki.

³⁰Levín epadan, Simeón inikiaki. Simeónen epadan, Judá inikiaki. Judán epadan, José inikiaki. Josén epadan, Jonam inikiaki. Jonamnen epadan, Eliaquim inikiaki.

³¹Eliaquimnen epadan, Meleá inikiaki. Meleán epadan, Mená inikiaki. Menán epadan, Matatá inikiaki. Matatán epadan, Natán inikiaki.

³²Natánen epadan, David inikiaki. Davidin epadan, Jesé inikiaki. Jesén epadan, Obed inikiaki. Obedin epadan, Booz inikiaki. Boozin epadan, Sélah inikiaki. Sélahn epadan, Nahasón inikiaki.

³³Nahasónen epadan, Aminadab inikiaki. Aminadabin epadan, Admín inikiaki. Admínen epadan, Arní inikiaki. Arnín epadan, Hesrón inikiaki. Hesrónen epadan Fares inikiaki. Faresin epadan, Judá inikiaki.

³⁴Judán epadan, Jacob inikiaki. Jacobun epadan, Isaac inikiaki. Isaacun epadan, Abraham inikiaki Abrahamnen epadan, Térah inikiaki. Térahn epadan, Nahor inikiaki.

³⁵Nahorin epadan, Serug inikiaki. Serugin epadan, Ragau inikiaki. Ragaun epadan, Péleg inikiaki. Pélegin epadan, Éber inikiaki. Éberin epadan, Sélah inikiaki.

³⁶Sélahn epadan, Cainán inikiaki. Cainánen epadan, Arfaxad inikiaki. Arfaxadin epadan, Sem inikiaki. Semin epadan, Noé inikiaki. Noén epadan, Lámec inikiaki.