Arúke 3:10-36

¹⁰Yóáanema mirá-timatuwaitata yaímma-wayukama ítama aónaraae: “ketáámá náaraq ónúnataabiyo?” téta ítama aónaraae.

¹¹ánibo Yóáanema maará téna yauwéqma timá yímikaiye: “móra-nakoma kaayaqá kúberai-unamma makénama kanaaráq kúberai-unamma ímo makáína-nakomma mórama amíno. ánibo móra-nakoma taíbaq-aawaqo wáinanama mamá móraiq íno.” téna tiráiye.

¹²yaímma táákiti-moneqa máyáa-kayukagaraq nommá peraínéta iréta tirááe: “yirááti-nako, ketáámá náaraq ónúnataabiyo?” téta Yóáanemma ítama aónaraae.

¹³ánibo Yóáanema timá yímikaiye: “móneqa ókaraq uyátá-maqma íma máyáaro.” téna Yóáanema tiráiye.

¹⁴miráitata yaímma ááiq-i-wayukagaraq Yóáanemma ítama aónaraae: “ketáágáráqá náaraq ónúnataabiyo?” téta tirááe. ánibo Yóáanema timá yímikaiye: “keráwáqtí náápaatabama túma íma mamé uyéraq waayúkati móneqa íma máyáaro. keráwáqá otaa-káyúkámá íma mamá yawááq-umayikeraq móneqa máyáaro. keráwáqtí meyámmá kanaaráq umá máyáaro.” téna tiráiye.

¹⁵aarawaatí yúyánákómá itó-uma akoqnáá itata yemá íyáqnobaq maará téta yúyánámmá kóita-yaita urááe: “Yóáanema Metáíyama yauwéqmataa tiwiraí-nárábí íyabiyo?” téta tirááe.

¹⁶miráitana Yóáanema yauwéqma timá yímikaiye: “kemá nopí nommá péqtikanune. anaaékaqa móra-naqa yínímma wení akoqnáágoma ketí akoqnááma uyátáraiye. kemá íma íráqô-naqa máunaboaq kemá kanaaráq wení aítauq-anaamma íma ayubónúne. wemá iragáráq Áánûqtuni Aokaq-Áágókáráq keráwáqá nommá pétikaniye.

¹⁷wemá wení yáunapo wítima agáqtuwaniye. miráumatuwena wení wíti-naupaq wítima áíkuinimanibo táíq ínnama waráríma aati-aatimá káíq-kaiq in-írábí agatuwániye.” téna tiráiye.

¹⁸Yóáanema yaímma káqon-aikaraq timá yúyánámmá mamá itó kéena mirái-waigoma aarawaabímmá Metáíyaqtaba átê-wataama tiráiye.

¹⁹miráimanibo Yóáanema Érôtimma awááguraiye. yeqtí anó-kamaani-naqanibo Érôtima Erótiatikaq otaa-qtátááríq éna ábâkoni ánáaqa kéyabitena yaímma táí-aaimma tarôq uráiye.

²⁰miráitana Érôtima máqten-otaa-qtataariqo kéenama ókaraq uyátá-maqma anón-otaamma kuyéna Yóáanemma ánná-naupaq ákaraiye.

²¹aarawaamá nommá kéberaawana Îtugaraq nommá pékaiye. ánibo Îtuma nommá pétuwena nunamummá kétena máitana Áánûqtuni márûpaq agaro uráiye.

²²Áánûqtuni Aokaq-Áágómá máaraa umá Îtukaq kukáiye. ánibo Áánûqtunopake móra-aikoma ááyama maará-tiraiye: “emá ketáanimone. eqtábámá kemá timuqá ôriq umá kémaraune. ketíyakoma eqtábámá kanaa kéiye.” téna aagómá Áánûqtuni márûpake ááyama tiráiye.

²³Îtuma wení mayaímá áaimma átáma matáima wení karitimaatimá miráuma kaumo-tíyáákámá uráiye. aarawaamá téta Îtuma Yótêbimma áanikowabiyaa téta tirááe.

²⁴Yótêbima Érimma áanikoe. Érima Máátáátimma áanikoe. Máátáátima Aríbaemma áanikoe. Aríbaema Mérekimma áanikoe. Mérekima Yáánaimma áanikoe.

²⁵Yáánaima Yótêbimma áanikoe. Yótêbima Matáátiatimma áanikoe. Matáátiatima Émotimma áanikoe. Émotima Néamumma áanikoe. Néamuma Étarimma áanikoe. Étarima Náágaemma áanikoe.

²⁶Náágaema Máátimma áanikoe. Máátima Matáátiatimma áanikoe. Matáátiatima Tímíenimma áanikoe. Tímíenima Yótekimma áanikoe. Yótekima Yóramma áanikoe.

²⁷Yórama Yóáánaanimma áanikoe. Yóáánaanima Arétamma áanikoe. Arétama Terúbabeomma áanikoe. Terúbabeoma Téyaatiomma áanikoe. Téyaatioma Nérimma áanikoe.

²⁸Nérima Mérekimma áanikoe. Mérekima Áárimma áanikoe. Áárima Kóutaamma áanikoe. Kóutaama Éramaraamma áanikoe.

²⁹Éramaraama Éramma áanikoe. Érama Yótuamma áanikoe. Yótuama Eriétamma áanikoe. Eriétama Yóraamma áanikoe. Yóraama Máátáátimma áanikoe.

³⁰Máátáátima Aríbaemma áanikoe. Aríbaema Tímionimma áanikoe. Tímionima Yútaamma áanikoe. Yútaama Yótêbimma áanikoe. Yótêbima Yónamumma áanikoe. Yónamuma Irááíakimma áanikoe.

³¹Irááíakima Mériamma áanikoe. Mériama Ménnamma áanikoe. Ménnama Mátáatamma áanikoe. Mátáatama Nétaanimma áanikoe. Nétaanima Tébitimma áanikoe.

³²Tébitima Yétimma áanikoe. Yétima Óbétimma áanikoe. Óbétima Póáatimma áanikoe. Póáatima Tárámonimma áanikoe. Tárámonima Náátonimma áanikoe.

³³Náátonima Aammínataamma áanikoe. Aammínnataama Ááraminimma áanikoe. Ááraminima Ááranimma áanikoe. Ááranima Étaronimma áanikoe. Étaronima Pérêtimma áanikoe. Pérêtima Yútaamma áanikoe.

³⁴Yútaama Yáakobomma áanikoe. Yáakoboma Ááítekimma áanikoe. Ááítekima Áabaraamma áanikoe. Áabaraama Téraamma áanikoe. Téraama Néomma áanikoe.

³⁵Néoma Térúkimma áanikoe. Térúkima Aréumma áanikoe. Aréuma Apéregimma áanikoe. Apéregima Ébérimma áanikoe. Ébérima Tíraamma áanikoe.

³⁶Tíraama Kénaanimma áanikoe. Kénaanima Áárápáqáarimma áanikoe. Áárápáqáarima Têmimma áanikoe. Têmima Nóaamma áanikoe. Nóaama Aráámekimma áanikoe.