SAN LUCAS 3:10-36

¹⁰Juan tsaynog niptinmi runacuna caynog tapupäcorgan: “Tsauraga ¿imatatag rurapäcöman salvacunäpag?”

¹¹Tsaynog tapuptinmi caynog nergan: “Ishcay trucana röpayog carga jucag cag röpayquita goycuy röpaynag cagta. Tsaynogpis micuyniyog carga raquipaycuy micuyniynag cagta.”

¹²Tsaynoglami impuestuta cobragcunapis, bautizacunanpag shamur, caynog tapupäcorgan: “Tayta, nogacunaga ¿imatatag rurapäcöman salvacunäpag?”

¹³Tsauraga Juan caynog nergan: “Cobranayquipag cashganpita mastaga ama cobrapäcunquitsu.”

¹⁴Tsaynoglami taporgan soldäducunapis caynog nir: “Nogacunaga ¿imatatag rurapäcöman salvacunäpag?” Tsaymi Juan caynog nergan: “Ama pipa guellaynintapis guechupäcunquitsu. Tsaynog ama pipagpis manacagtaga tumpanquitsu. Arushgayquipita chasquishgalayquiwan contentacärinqui.”

¹⁵Tsauraga Cristo cay patsaman shamunanpag cashganta shuyarag runacuna yarpachacushpan caynog nergan: “¿Juantsurag Tayta Dios cachamushgan Cristo caycan?”

¹⁶Tsaymi Juan caynog nergan: “Cristoga tsayragmi shamonga. Nogaga yaculawanmi gamcunata bautizä. Tayta Diosnintsi cachamushgan Cristumi itsanga Santu Espirituwan y ninawanpis bautizapäcushunquipag. Nogaga manami paynog munayniyogtsu caycä.

¹⁷Payga jurquëtan aptashgami caycan trïguta wayrananpag. Nircurmi trïgu cagta churanga wayinman. Y punshantana gayconga imaypis mana upeg ninaman tsaycho rupananpag.”

¹⁸Tsaynog parlaparmi Juan yachatsergan Tayta Diosnintsipa wilacuyninta.

¹⁹Tsaynogpis runacunata Juan caynog nergan: “Wauguin Felipipa warminta suwapar rey Herodes jutsatami rurashga. Tsaynoglami más jutsatapis payga ruraycan.”

²⁰Tsaynog parlaycashganta musyarmi Juanta prësu tsarircatsir Herodes wichgatsergan carcilman. Tsaynog wichgatsirmi más jutsayog ricacushga.

²¹Carcilman Juan manarag yaycurmi runacunata bautizaycaptin Jesuspis chayargan bautizacunanpag. Bautizacurcur Tayta Diosta manacuycaptinmi jana patsa quichacäcorgan.

²²Tsaychömi Jesusman Santu Espíritu urämorgan palomanog. Tsaymi ciëlupita mayacämorgan Tayta Dios caynog nimushgan: “Gamga cuyay tsurëmi canqui. Noga munashgänog lapanta cumpliptiquimi cushishga caycä.”

²³Quimsa chunca (30) watayognogna caycar bautizacurcurmi Jesús wilacuyta galaycorgan Tayta Diosnintsipa wilacuyninta. Paypäga runacuna yarpargan Josëpa tsurin cashgantami. Josënami Elïpa tsurin cargan.

²⁴Elïmi cargan Matatpa tsurin. Matatmi cargan Levïpa tsurin. Levïmi cargan Melquipa tsurin. Melquimi cargan Janapa tsurin. Janami cargan Josëpa tsurin.

²⁵Josëmi cargan Matatiaspa tsurin. Matatiasmi cargan Amospa tsurin. Amosmi cargan Nahumpa tsurin. Nahummi cargan Eslipa tsurin. Eslimi cargan Nagaipa tsurin.

²⁶Nagaimi cargan Maatpa tsurin. Maatmi cargan Matatiaspa tsurin. Matatiasmi cargan Semeipa tsurin. Semeimi cargan Josëpa tsurin. Josëmi cargan Judäpa tsurin.

²⁷Judämi cargan Joanapa tsurin. Joanami cargan Resapa tsurin. Resami cargan Zorobabelpa tsurin. Zorobabelmi cargan Salatielpa tsurin. Salatielmi cargan Neripa tsurin.

²⁸Nerimi cargan Melquipa tsurin. Melquimi cargan Adipa tsurin. Adimi cargan Cosampa tsurin. Cosammi cargan Elmodampa tsurin. Elmodammi cargan Erpa tsurin.

²⁹Ermi cargan Josuëpa tsurin. Josuëmi cargan Eliezerpa tsurin. Eliezermi cargan Jorimpa tsurin. Jorimmi cargan Matatpa tsurin.

³⁰Matatmi cargan Levïpa tsurin. Levïmi cargan Simeonpa tsurin. Simeonmi cargan Judäpa tsurin. Judämi cargan Josëpa tsurin. Josëmi cargan Jonanpa tsurin. Jonanmi cargan Eliaquimpa tsurin.

³¹Eliaquimmi cargan Meleapa tsurin. Meleami cargan Mainanpa tsurin. Mainanmi cargan Matatapa tsurin. Matatami cargan Natanpa tsurin.

³²Natanmi cargan Davidpa tsurin. Davidmi cargan Isaïpa tsurin. Isaïmi cargan Obedpa tsurin. Obedmi cargan Boozpa tsurin. Boozmi cargan Salmonpa tsurin. Salmonmi cargan Naasonpa tsurin.

³³Naasonmi cargan Aminadabpa tsurin. Aminadabmi cargan Arampa tsurin. Arammi cargan Esrompa tsurin. Esrommi cargan Farespa tsurin. Faresmi cargan Judäpa tsurin.

³⁴Judämi cargan Jacobpa tsurin. Jacobmi cargan Isaacpa tsurin. Isaacmi cargan Abrahampa tsurin. Abrahammi cargan Tarëpa tsurin. Tarëmi cargan Nacorpa tsurin.

³⁵Nacormi cargan Serugpa tsurin. Serugmi cargan Ragaupa tsurin. Ragaumi cargan Pelegpa tsurin. Pelegmi cargan Heberpa tsurin. Hebermi cargan Salapa tsurin.

³⁶Salami cargan Cainanpa tsurin. Cainanmi cargan Arfaxadpa tsurin. Arfaxadmi cargan Sempa tsurin. Semmi cargan Noëpa tsurin. Noëmi cargan Lamecpa tsurin.