Luk 3:10-36

¹⁰Ose ulahonɨngki hofɨko Jounɨmo ulohonɨmentohofi, Oso hungkuno nalohino hisoꞌno nakwo pipi yanehwono.

¹¹Ose ulahonɨngkofi kako ulɨmento, Hwe manjiꞌmofo hufaꞌuꞌnjo sohwo kako hwe fihwo manjiꞌmofoꞌneꞌno umofonyo inyo sohumo angaꞌno uyono. Oso paꞌnyoso aꞌamu wosopayo woꞌnnyo sohwo kako nomꞌni hwamo uyono. Ose ulɨmentisofoho.

¹²Aꞌamu hamniyoho hoꞌnasyontɨfe mawoꞌnɨngkohofo aꞌamu fehohnjo sohwa mijo wokiyonemano lontɨfi Jounɨmo uꞌmantɨfi ulɨmentohofi, Nakwoe Lonetɨhwayo sohwosi nakwo sohwonaꞌni pipi yanehwono.

¹³Ose ulahonɨngkofi ulɨmento, Aꞌamu nakwoe hwaho mokosyohumayo sohwa hamniyoho mayoꞌne hungkuno yano sejapɨwoꞌnɨngkohofo soponohini aꞌamu mtaꞌni mapmno. Sekwo nomꞌne hamniyoho nakwoꞌne womano ose syafɨsyɨkutoho.

¹⁴Aꞌamu itokusoꞌnjo fehohnjo sohwa Jounɨmo ulɨmentohofi, I, nakwo pipilo. Nakwo peho uyantanto. Ose ulahonɨngkofi kako ulɨmento, Sekwo aꞌamu mtaꞌni hamniyoho mayoꞌne hwasyo hungkuno mjɨlɨkutoho. Sekwo aꞌamu somo siki ikujoho ufonjɨkutoho. Sekwoe hwe engo sohwo hamniyoho sejapɨwoꞌnɨngkiso somneꞌnohini sekwo sɨmeho wopɨngo wasemoꞌnono. Nomꞌne hamniyoho soꞌneꞌno jomo ulɨkutoho. Ose ulɨmentisofoho.

¹⁵Aꞌamuso Jounɨye hungkunomo upaꞌnontɨfi hofɨko hofɨkoe hi ulɨkofahonɨngki huno piꞌnɨngo syafɨsyontɨfi ole hnnɨmentohofi, Olo hwe lohwo Anɨtu olo hwaho loponeꞌno uhwatɨmo lɨmentiso sohwolɨkeno.

¹⁶Ose hnnɨngkahonɨngkofi Joun ulɨmento, Ngko sekumo mijoꞌnohini kiyosemawoꞌnɨngkohono. Hwangku hwe nomꞌne fihwo kakoe yokumpohnꞌnyoso nje yokumpohnꞌnyomo yakoloꞌnnyo sohwo wapmmontonoho. Ngko sohwoꞌni oso hwe huhwo sohwoe yofe engo soꞌno ngko kakimo momayo ulohofiyo hwoꞌnyoho. Kako nopɨhwosi kako sekumo mijoꞌnohini makiyosemanehoho. Oꞌo, kako Anɨtuye Towahuno Wopɨngo sohwoꞌnji tohoꞌnji wokiyosemaꞌmontonoho.

¹⁷Kako hwaho mno ijiyoꞌneso mokosyohumunyo hweho. Kako hwaho mno ijɨhwosi wosopayoso ijomahwosi pahoso wae yaofɨhwosi wosopayo neso kakoe angomo wohoꞌnahumontonoho. Pahoso toho masɨmpeꞌnyo neꞌno sijɨwoꞌnɨngkiso somo wohoꞌnaeꞌmontonoho.

¹⁸Oso pahnnɨmo hungkuno ulonto kako nomꞌne hungkuno piꞌnɨngo engo oso paꞌnyoso aꞌamufe hunomo ufohotofoꞌne Anɨtuye hungkuno wopɨngoso lutɨhwamojo hweho.

¹⁹Tɨfi noꞌmo nomꞌne sɨkuno somo hwe yofe engoꞌnjo Helout kako hwaho mokosyohumayo sohwo kako konɨngkwaꞌwehwoe ape Heloutiyasɨmo hufo maꞌmentiso soꞌnji nomꞌne honɨngkano wonyo piꞌnɨngo engo imentiso soꞌntnneꞌno Joun kako Heloutɨmo yoka hungkuno ulɨmentisofoho.

²⁰Oso hisoꞌno Helout kako nomꞌne wonyo engo imentisoso olenoho. Kako Jounɨmo impoꞌangomo impe intofahumentisofoho.

²¹Sɨkuno fihwi hwe moyaꞌmi piꞌnɨngo engo somo Joun kako mijo nto kiyomanto humohumantohofofoho. Osohonta Jisas kako Jounɨmo uꞌmahonɨngki Joun Jisasɨmo mijo kiyomaꞌmentisofoho. Moiꞌwo nto kiyomahonɨngki Jisas kako Mpohumo jomo ulontanɨngki ahwomo mtampoꞌmentisofoho.

²²Ahwomo nomtompeehonɨngki Anɨtuye Towahuno Wopɨngo sohwo yɨhufo ntolofiyo hopa ponto Jisasɨmo wekehumapmmentisofoho. Oso hohosohonta ahwomo mtaꞌni ole hoꞌnɨmento, Kɨko nje Hwomu sohwohnneꞌno ngko sɨmeho wopɨngo mɨkunɨmposo kijopalokweno. Kɨko yoꞌmayo wopɨngo iwoꞌnɨngkino soꞌno nje sɨmeho wopɨngo nɨmoꞌnantofoho.

²³Jisas kakoe soswo teti (30) uyakolofahonɨngki kako kakoe syoho neso emaꞌmentisofoho. Hwe moyaꞌmi hofɨko huno ole syafɨhuꞌmentohofofoho. Jisas kako Jousepɨye hwomu hweho. Ose syafɨhuꞌmentohofofoho. Jousepɨye kanɨngkwohwoe yofeso Heliyoho.

²⁴Heliye kanɨngkwohwo sohwo Motatɨyoho. Motatɨye kanɨngkwohwo sohwo Lifaiyoho. Lifaiye kanɨngkwohwo sohwo Melɨkiyoho. Melɨkiye kanɨngkwohwo sohwo Janaiyoho. Janaiye kanɨngkwohwo sohwo Jousepɨyoho.

²⁵Jousepɨye kanɨngkwohwo sohwo Mototiyasɨyoho. Mototiyasɨye kanɨngkwohwo sohwo Amousɨyoho. Amousɨye kanɨngkwohwo sohwo Nahomɨyoho. Nahomɨye kanɨngkwohwo sohwo Esɨliyoho. Esɨliye kanɨngkwohwo sohwo Nakaiyoho.

²⁶Nakaiye kanɨngkwohwo sohwo Matɨyoho. Matɨye kanɨngkwohwo sohwo Mototiyasɨyoho. Mototiyasɨye kanɨngkwohwo sohwo Semenɨyoho Semenɨye kanɨngkwohwo sohwo Jousekɨyoho. Jousekɨye kanɨngkwohwo sohwo Joutafoho

²⁷Joutafe kanɨngkwohwo sohwo Jouananyoho. Jouananye kanɨngkwohwo sohwo Lesafoho. Lesafe kanɨngkwohwo sohwo Selepapelɨyoho. Selepapelɨye kanɨngkwohwo sohwo Siyalɨtiyelɨyoho. Siyalɨtiyelɨye kanɨngkwohwo sohwo Neliyoho.

²⁸Neliye kanɨngkwohwo sohwo Melɨkiyoho. Melɨkiye kanɨngkwohwo sohwo Atiyoho. Atiye kanɨngkwohwo sohwo Kousamɨyoho. Kousamɨye kanɨngkwohwo sohwo Elɨmotamɨyoho. Elɨmotamɨye kanɨngkwohwo sohwo Elɨfoho.

²⁹Elɨfe kanɨngkwohwo sohwo Jousyɨwafoho. Jousyɨwafe kanɨngkwohwo sohwo Eliyesafoho. Eliyesafe kanɨngkwohwo sohwo Joulimɨyoho. Joulimɨye kanɨngkwohwo sohwo Matatɨyoho. Matatɨye kanɨngkwohwo sohwo Lifaiyoho.

³⁰Lifaiye kanɨngkwohwo sohwo Simeyounyoho. Simeyounɨye kanɨngkwohwo sohwo Jutafoho. Jutafe kanɨngkwohwo sohwo Jousepɨyoho. Jousepɨye kanɨngkwohwo sohwo Jounamɨyoho. Jounamɨye kanɨngkwohwo sohwo Elaiyakimɨyoho.

³¹Elaiyakimɨye kanɨngkwohwo sohwo Meleyafoho. Meleyafe kanɨngkwohwo sohwo Menafoho. Menafe kanɨngkwohwo sohwo Matotafoho. Matotafe kanɨngkwohwo sohwo Natanɨyoho. Natanɨye kanɨngkwohwo sohwo Ntefitɨyoho.

³²Ntefitɨye kanɨngkwohwo sohwo Jesiyoho. Jesiye kanɨngkwohwo sohwo Oupetɨyoho. Oupetɨye kanɨngkwohwo sohwo Mpouasɨyoho. Mpouasɨye kanɨngkwohwo sohwo Salɨmounɨyoho. Salɨmounɨye kanɨngkwohwo sohwo Nasounyoho.

³³Nasounɨye kanɨngkwohwo sohwo Aminotapɨyoho. Aminotapɨye kanɨngkwohwo sohwo Atɨminɨyoho. Atɨminɨye kanɨngkwohwo sohwo Aniyoho. Aniye kanɨngkwohwo sohwo Hesɨlounɨyoho. Hesɨlounɨye kanɨngkwohwo sohwo Pelesɨyoho. Pelesɨye kanɨngkwohwo sohwo Jutafoho.

³⁴Jutafe kanɨngkwohwo sohwo Jekoupɨyoho. Jekoupɨye kanɨngkwohwo sohwo Aisakɨyoho. Aisakɨye kanɨngkwohwo sohwo Apɨlohamɨyoho. Apɨlohamɨye kanɨngkwohwo sohwo Tilafoho. Tilafe kanɨngkwohwo sohwo Nahoulɨyoho.

³⁵Nahoulɨye kanɨngkwohwo sohwo Selokɨyoho. Selokɨye kanɨngkwohwo sohwo Leuyoho. Leuye kanɨngkwohwo sohwo Pelekɨyoho. Pelekɨye kanɨngkwohwo sohwo Epafoho. Epafe kanɨngkwohwo sohwo Syelafoho.

³⁶Syelafe kanɨngkwohwo sohwo Kainanɨyoho. Kainanɨye kanɨngkwohwo sohwo Apakɨsatɨyoho. Apakɨsatɨye kanɨngkwohwo sohwo Syemɨyoho. Syemɨye kanɨngkwohwo sohwo Nɨwafoho. Nɨwafe kanɨngkwohwo sohwo Lamekɨyoho.