Luk 3:10-36

¹⁰Mewö jiiga ambazip kambuŋi kambuŋi yeŋön kewö qesiba jiget, “Mewögöra nini mönö denöwö ahinga dop kölma?”

¹¹Qesiba jigetka kewö meleŋnök, “Kunŋan maluku yahöt memba maljawi, yaŋön mönö mietköreŋök kun mi malukuŋi qahö i waŋgima aka denike yeŋön neneŋinambuk maljei, yeŋön mönö mewöyök neneŋini qahö yeŋgöra mendeŋ eŋgime.”

¹²Takis meme azi tosatŋan mewöyök o melun mem eŋgimapkö kaba qesim waŋgiget, “Böhi, neŋön mönö denöwö ahinga dop kölma?”

¹³Qesim waŋgigetka jii mötket, “Gawmanöŋ takisgö jim kutum eŋgii ahözawi, dop mi mönö qahö oŋgita meme.”

¹⁴Yarö azi tosatŋan mewöyök qesim waŋgiget, “Niniato? Neŋön denöwö ahinga dop kölma?” Qesim waŋgigetka kewö jii mötket, “Kungöreŋ moneŋgöra kuŋguba upetkupet aka kiom kude kölmemö, nanŋini töwaŋini memakzei, miambuk mönö urumohok aka ösöŋ malme.”

¹⁵Ambazip pakpak yeŋön “Jonöŋ Amötqeqe Toŋi Kraist akapuk,” jiba uruŋinan mewö mötmöriget. Miaŋgö könaŋi mötpingö kezapŋini köröpŋi aket.

¹⁶Mewö aketka Jonöŋ körek yeŋgöra kewö jiyök, “Nöŋön o töhönöŋ melun mem eŋgizalmö, azi kukösumŋi köhöikŋi kun kama. Yaŋgö kukösumŋi öŋgöŋgöŋan mönö nöŋgöreŋ oŋgitma. Yaŋön azi öŋgöŋgöŋi akŋawaŋgöra nöŋön yaŋgö köna esuŋaŋgö kösöŋi bauköba pösatmamgö qötötaŋgömam. Yaŋön mönö Uŋa Töröŋi uruŋine ali könöp bölamŋan köl könjörat eŋgiiga mewö miaŋön melun mem eŋgima.

¹⁷Yaŋön ölŋi aka kamböŋi mendeŋ etkimamgö sapakŋi memba kaŋgota uba qöröreŋgöba kewötma. Kewöta wit kötŋi tokoba köweŋe almapmö, kamböŋi aka gwaugulapŋi mi mönö usuŋniga könöpnöŋ geba teteköŋi qahö jema.”

¹⁸Keu mewöŋi mewöŋi gwötpuk toroqeba jiba uruŋini kuŋguba Ölöwak Buŋa ambazip kambu yeŋgöra jim asariba malök.

¹⁹Malökmö, gölme bahöŋaŋgö kiŋ Herod yaŋön datŋaŋgö anömŋi qetŋi Herodias mi ölöŋ meyök aka bölöŋi könaŋi könaŋi aka malöhi, miaŋgö sapŋi Jonöŋ qeba munjurariga jim waŋgiyök.

²⁰Jim waŋgiba bölöŋamŋi kun toroqeba aka Jongöreŋ nupŋi tözöpköba suahö galömŋi jii Jon memba kösö mire alget. Mewö.

²¹Jonöŋ ambazip pakpak o melun mem eŋgiba Jisös mewöyök o melun mem waŋgiyök. Mem waŋgii köuluköiga miaŋgöreŋök Suepnöŋ aŋaŋiyök.

²²Aŋaŋiiga Uŋa Töröŋan meleŋda kembö nei ewö aka Jisösgö qakŋe erök. Mewö eriga Suepnöhök qet kun kewö asuhuyök, “Göŋön mönö nani wölböt nahöna aknöŋga köröni ölöwahiga geknahöm ak gihizal.” Mewö.

²³Jonöŋ Jisös o melun mem waŋgiiga yambu (yara)ŋi 30 miaŋgö dop aiga amötqeqe nupŋi könahiba memba malök. Memba maliga Josefgö nahönŋa akzawi, ambazipnöŋ mewö mötmöriget. Jisös iwiŋi Josef, asaŋi qetŋi Heli.

²⁴Jisös amböŋi qetŋi Matat, sukumŋi qetŋi Liwai. Liwai iwiŋi Melki, asaŋi Janai, amböŋi Josef,

²⁵sukumŋi Matatias. Matatias iwiŋi Amos, asaŋi Nahum, amböŋi Esli, sukumŋi Nagai.

²⁶Nagai iwiŋi Mat, asaŋi Matatias, amböŋi Semen, sukumŋi Josek. Josek iwiŋi Joda,

²⁷asaŋi Joanan, amböŋi Resa, sukumŋi Zerubabel. Zerubabel iwiŋi Sealtiel, asaŋi Neri,

²⁸amböŋi Melki, sukumŋi Adi. Adi iwiŋi Kosam, asaŋi Elmadam, amböŋi Er,

²⁹sukumŋi Josua. Josua iwiŋi Eliezer, asaŋi Jorim, amböŋi Matat, sukumŋi Liwai.

³⁰Liwai iwiŋi Simeon, asaŋi Juda, amböŋi Josef, sukumŋi Jonam. Jonam iwiŋi Eliakim,

³¹asaŋi Melea, amböŋi Menna, sukumŋi Matata. Matata iwiŋi Neitan, asaŋi Deiwid,

³²amböŋi Jesi, sukumŋi Obed. Obed iwiŋi Boaz, asaŋi Salmon, amböŋi Nason,

³³sukumŋi Aminadab. Aminadab iwiŋi Admin, asaŋi Arni, amböŋi Hezron, sukumŋi Perez. Perez iwiŋi Juda,

³⁴asaŋi Jeikob, amböŋi Aisak, sukumŋi Abraham. Abraham iwiŋi Tera, asaŋi Nahor,

³⁵amböŋi Serug, sukumŋi Reu. Reu iwiŋi Peleg, asaŋi Eber, amböŋi Sela,

³⁶sukumŋi Kainan. Kainan iwiŋi Arpaksad, asaŋi Siem, amböŋi Noa, sukumŋi Lamek.