Lucas 2:13-51

¹³Pegketà kinità dan se ontò medita anghil lekat te langit timaking kandin. Dimuyun dan te Timanem, kagi dan,

¹⁴“Iduyun tadon den se Timanem doton diatas te langit. Begayan din te kelinaw te pedowan se otaw egkelubahan din dini te tanà.”

¹⁵Peg-olì te menge anghil doton te langit, gayed migpebelaw-belaway se telediyaga, kagi dan, “Domoton kidon den te Bitlihim amon kitaen tadon se neinang seini, sìyan impetaga-taga te Pengolo diyà kenitadon.”

¹⁶Penga niyan, mig-ayas dan doton aw kimità dan ki Maria aw si Jose, aw kinità dan heman se batà impeibat kidoen te kènanan te ayam-ayam.

¹⁷Pegkità dan kandan, in-indan dan se inikagi te anghil tepad te batà sìyan.

¹⁸Nepela se kedita te otaw dimineg te in-indan te menge telediyaga.

¹⁹Meneng si Maria, insawol din se kedita te kagi dan diyà te pedowan din, aw gayed mig-aneng-aneng kenyan.

²⁰Penga niyan, minolì se telediyaga, aw gayed dan induyun se Timanem tandà te kedita te dinineg aw kinità dan, so netoman den se inikagi te anghil kandan.

²¹Pegdateng te ikewalo te aldaw lekat te pegtebaw din, tinolì sikandin aw iningedanan ki Jesus, so yan se ngadan inikagi te anghil te wedà pa peglaman se inay din.

²²Dimateng se aldaw, dimoton si Jose aw si Maria te Jerusalem amon tomolò dan te punù ingkeliwat i Moises tepad te bayi kaling egtebawan. Inibing dan heman se batà si Jesus amon ibegay sikandin diyà te Pengolo,

²³so doen punù impekeliwat te Pengolo te keilangan ibegay diyà te Timanem se batà meama tagnà tomebaw.

²⁴Dimoton dan te dakel simbahan amon memegay dan te ibowang diyà te Timanem, so timolò dan te punù impekeliwat te Pengolo te keilangan ibegay se didowa tokmo aw kenà didowa selepati dedeitek pa.

²⁵Nayan, doen sebad tege Jerusalem si Simeon. Eg-inang sikandin te metòlid, aw egtolò heman te Timanem. Gayed sikandin egpeliman te megpelowà se Timanem te menge bowad-bowad i Israel. Eg-ogpaan sikandin te Espiritu Santo,

²⁶aw impetaga-taga te Espiritu Santo kandin te eked sikandin kematay singed aw onà din kitaen se Misiyas isogò te Pengolo.

²⁷Inibing te Espiritu Santo si Simeon doton te dakel simbahan kidoen te Jerusalem. Aldaw sìyan, inibing heman si Jesus te amay aw inay din doton te dakel simbahan amon tomolò dan te punù ingkeliwat i Moises tepad te deitek batà.

²⁸Pegkità i Simeon kandan, inabat din se batà aw inolid din. Penga niyan, dimuyun sikandin te Timanem, kagi din,

²⁹“Pengolo ko, mepakay den diyà kanak aw meg-etod a aw matay a den, so netoman den se pakang no kanak,

³⁰so ontò a den kimità te insogò no megpelowà kenami.

³¹Sikandin se ipekità no diyà te kedita te otaw.

³²Sikandin se mekelowa te kengitngit kidoen te pedowan te kedita te otaw kenà Judiyo, aw sikandin se megpetaga-taga diyà kenami menge bowad-bowad i Israel pinemallì no te ontò ka melangkaw.”

³³Nayan, se amay aw inay te batà, ontò dan nepela te inikagi i Simeon tepad te batà dan si Jesus.

³⁴Migtawal-tawal si Simeon te ketebangan dan te Timanem, aw minikagi sikandin diyà te inay te batà si Maria, “Na, meinang se batà seini pengilala kitaen te medita bowad-bowad i Israel. Aw komità dan kandin, medita se otaw komulu kandin aw ipelumun dan, meneng medita se doma otaw somalig diyà kandin aw mekelowà dan lekat te pelumun,

³⁵so ipetaga-taga din aw eden se aneng-aneng te kedita te otaw. Pengkey sikona, Maria, ontò ka kelimahan, so iling te dogsengen se posong nikaw.”

³⁶Doen heman bayi egkeliwat te kagi te Timanem kidoen te dakel simbahan ngadan din si Ana. Si Panuel se ngadan te amay din, sakop te pongan iningedanan Aser, so si Aser se kemonaan dan. Nengognan si Ana te pito se omay, aw penga niyan nebalo. Ontò den lokes, so kewelowan teg epat se omay din. Egdoton sikandin te dakel simbahan, so egsimba sikandin te aldaw aw delem, aw migpowasa, aw migtawal-tawal.

³⁸Dalem pa te minikagi si Simeon diyà ki Maria, dimateng si Ana kidoen kandan, aw migpesiontong diyà te Timanem. Mig-indan heman sikandin tepad te batà diyà te kedita te otaw egpeliman te megpelowà se Timanem te menge Judiyo.

³⁹Nayan, pegtoman i Jose aw si Maria te kedita te punù te Pengolo ingkeliwat i Moises tepad te batà kaling timebaw, minolì dan doton te lonsod te Nasarit kidoen te probinsya te Galiliya.

⁴⁰Timilles se batà, aw migketesan, aw migkebiyasa, so egtebangan sikandin te Timanem.

⁴¹Nayan, kelikit te omay, gayed egdoton se amay aw inay i Jesus te Jerusalem amon tomanod dan te Pista te Pegpelowà.

⁴²Sagwa sempolò teg dowa se omay i Jesus, nemista dan doton te Jerusalem, so yan se gayed dan eg-inangen.

⁴³Pegkepenga te pista, minolì dan, meneng mig-ogpà pa si Jesus kidoen te Jerusalem. Meneng wedà iyan ketegahi te amay aw inay din,

⁴⁴so eden dan aw timaking sikandin te menge doma dan kidoen te dalan. Minipanaw dan lamig meapon. Pegkeapon, nengemahà dan kandin kidoen te menge kedomaan dan aw menge doma otaw minipanaw.

⁴⁵Meneng wedà dan kitai. Penga niyan, limikò dan doton te Jerusalem amon mengemahà dan kandin.

⁴⁶Te iketelo te aldaw, kinità dan sikandin kidoen te dakel simbahan doton te Jerusalem. Dimoma sikandin te menge menenoladà, aw nenenalan sikandin diyà kandan aw mig-insà heman diyà kandan.

⁴⁷Nepela se kedita te otaw dimineg te inikagi din, so ontò biyasa, aw mèpiya heman se intaba din.

⁴⁸Pegkità te amay aw inay din kandin, ontò dan nepela. Minikagi se inay din, “Atò, eked kepakay se ininang no diyà kenami, so ontò kay netetana, aw nengemahà kay kamno.”

⁴⁹Minikagi si Jesus, “Nepela a so pinengemahà a niyo. Nepela a so wedà niyo ketegahi te keilangan dini a te balay te Amay ko.”

⁵⁰Meneng wedà dan kelebeti se kedegdagan te inikagi din diyà kandan.

⁵¹Penga niyan, timaking si Jesus kandan aw minolì doton te Nasarit, aw timolò te amay aw inay din. Si Maria, insawol din se kedita niyan diyà te pedowan din aw mig-aneng-aneng kenyan.