Lucas 1:67-77

⁶⁷Zacarias, eliodi niɡ̶ijo nigaanigawaanigi one dakatiogi Liwigo Aneotedoɡ̶oji, odaa jiɡ̶idaa dinanatigi me yalaɡ̶ata anodaaɡ̶ee niɡ̶ijo nigaanigawaanigi, mee,

⁶⁸“Joɡ̶eeɡ̶atalo Ǥoniotagodi Aneotedoɡ̶oji, Noenoɡ̶odi loiigi Israel. Igaataɡ̶a enagi midi loiigi me yatamaɡ̶ateetetege libeyaceɡ̶eco.

⁶⁹Niwakateetedoɡ̶owa Ǥonewikatitoɡ̶odi anida nimaweneɡ̶egi, anida aneetege licoɡ̶egi Davi, ane liiɡ̶exegi Aneotedoɡ̶oji.

⁷⁰Jotigide Aneotedoɡ̶oji naɡ̶a ligegi me niwakatee niɡ̶ica Ǥonewikatitoɡ̶odi. Niɡ̶ijo anoyeloɡ̶oditedibece Aneotedoɡ̶oji lowooko, niɡ̶ijo aniniokiniwateda modibatema, oyeloɡ̶odi ane ligegi Aneotedoɡ̶oji.

⁷¹Odaa ligegi me ɡ̶odatamaɡ̶ateetetege ɡ̶odaxakawepodi, codaa me loniciwaɡ̶a niɡ̶ijo ane deɡ̶etiɡ̶odemaa.

⁷²Codaa ligegi me iwikode ɡ̶odaamipi, codaa nalaɡ̶atigilo niɡ̶ijo ane dinilakidetetege, leeɡ̶odi aixomaɡ̶atice ane ligegi.

⁷³Akaa ligegiteta ɡ̶onelokodi Abraão me ɡ̶odatamaɡ̶ateetetege loniciwaɡ̶a ɡ̶odaxakawepodi, eote me jakataɡ̶a me jibaaɡ̶atema me diɡ̶ica ane idoiiɡ̶ata.

⁷⁵Odaa jakataɡ̶a miniokiniwateda me jibaaɡ̶atema, codaa me jakataɡ̶a me jaoɡ̶o inokina ane iɡ̶enaɡ̶a inoatawece nokododi.

⁷⁶Akaami, ionigi, etiɡ̶adadalitigi makaami niɡ̶ina ane yeloɡ̶oditedibece lowooko Aneotedoɡ̶oji anidioka limedi me diiɡ̶enataka. Odaa eloɡ̶oti latematiko Aneotedoɡ̶oji aniɡ̶icatibige daɡ̶a diba Ǥoniotagodi, anenyaɡ̶ati laaleɡ̶enali niɡ̶idi noiigi modinoweditege lanokegi.

⁷⁷Awii loiigi Ǥoniotagodi Aneotedoɡ̶oji moyowooɡ̶odi anodaaɡ̶ee me yewikatidi, niɡ̶ina me napitaɡ̶adi libeyaceɡ̶eco.