San Lucas 1:67-77

⁶⁷Ich ag ed agtarr khur nʉʉpai awia jöoi Zacarías gaai Ẽwandam Akhaar phẽs aicheewai Ẽwandam i jaaujem khʉʉn dënjö iekhamamua María chaai igwia magjim anʉm:

⁶⁸“Ẽwandam, ʉ̈uhcha pua pʉch chaain eeg oowia ĩsin chad maar peerdʉ awaagpam. Magua maar onee nʉmgui ajim anʉm.

⁶⁹Warrgar pʉ chog David khakhitarr ag chaain ewagam khʉʉn eemta pua chi jua thierr maar athee pʉ̈ibapʉ̈im, maar peerdʉ aumkhĩir,

⁷⁰ich warrgarwe pʉch i jaaumienau õrag jaaujerrjö.

⁷¹Amau jaauwai mag ‘Pʉchdëu pʉ̈ibarmuata maar peerdʉ auju’ aajeejim, ‘thum maach oomapha aajem khʉʉn jua eemua, maimua ĩchab chi dajãumie maach khũgurwia pekau ee burrpieg ẽkha sĩerraajem jua eemuajã agjö.’ Maagjerr ĩsta ʉ̈u ag ed pabaichëmgui” ajim anʉm.

⁷²“Ẽwandam, pʉchdëu maar jöoin israelnaan dʉ̈i iek deetarr bʉ̈ʉrjã khĩir akhooba, ʉ̈u pua maar dau ee aug khaugbarm.

⁷³Mag iek deetarr ed pua pʉch iiucha jöoi Abranag jaauwai, pua maar peerdʉ auju ajim,

⁷⁴maach oomapham khʉʉn ögkhaba, ni dösãtjã ögkhaba,

⁷⁵ãba pʉch dʉ̈ipai ajapha wënʉrramkhĩir, tag bʉ̈ʉrjã pekau wau wënʉrram ugua.”

⁷⁶Mag nacha Mariaau chaai ooju igwia iekha dichtarr khur jũrr ich chaai igmamuata jöoirau magjim anʉm: “Iewaadam, pʉʉta Cha Ʉ̈gthaa Phuu Nʉm ag i jaaumie a thʉ̈rju. Puata maach Pör maju ee i na õrag, ‘Maach peerdʉajem ya bëeimʉʉ sim’ a jaaumaju, ya mag jaaubarm ũrwia õrau i pierrwai amach thãraucha khõsi i iek ʉ̈khamkhĩir;

⁷⁷maimua amag maach peerdʉajem iek jaaubaawai amach khaibag thumaa ãsie ewag khĩirjuwia Ẽwandamag chugpaapi jëeumkhĩir.