Luk 1:67-77

⁶⁷Ruwwin ta Buŋdi miiniig Zakariya takan̰ mic-aka, ŋa teestu kaawe ar nabiin̰ce aman :

⁶⁸« Oziliika ɗo Rabbine, Buŋ ka Israyeel asaan ŋa mogiig geen̰ji ho ŋa jiliigu.

⁶⁹Ŋa imilte Gay Jilindi kaak gin gudurre min ɗo tamba ta gay riyoy Dawuud.

⁷⁰An ko kaaw taat min awalle Buŋ kaawiico ɗo nabiinnay kuuk ŋa doɓtu ho ŋuur gay kaawiit ɗo geemir.

⁷¹Kaaw-at, taar ko taat Buŋ ɗiytu a ŋaate jilinte min ɗo adinte ho min ɗo pise ka gee kuuk elgitenno.

⁷²Ŋa tal amindaw ta aginiyte ho ŋa bal rawtin jamuwiy taat taɓ ŋa obtu iŋ ŋuura.

⁷³Jamaw-at, taar ko taat Buŋ togiltu ɗo tatte Ibraayim

⁷⁴a ŋaate jilinte min ɗo adinte ho gii abdiyin̰ji bal kolaw.

⁷⁵Ampaa ko, gii gine sellen̰ ho *cawar ɗo uŋji, ɗo menuwte kuuk ŋa beriite ɗo duniiner. »

⁷⁶Zakariya kaawtu pey ɗo roŋji Yaaya aman : « Gem kol roŋji, ƴiriy rakki, ŋu asaan̰ kole a ki nabiin̰ce ka Buŋ ka kuwa, asaan kii ogire ɗo Rabbiner ho kiiji siyin botiliy.

⁷⁷Kiico gaare ɗo geen̰ji maman ŋuu gase jile ho zunuubinnico, ŋuuco saamiyin̰co.