Lucas 14:9-16

⁹Mʉ́ãrẽ boocóarigʉ ati, mʉʉrẽ “ãnirẽ́ mʉʉ duiró ticoya” jĩĩboqui. Mʉʉpe boborémena niituripĩrõpʉ duigʉ wáabocu.

¹⁰Teero tiigʉ́, mʉʉrẽ boocóri, niituripĩrõpʉ jeanuãña. Mʉʉ teero tiirí ĩñagʉ̃, mʉʉrẽ boocóarigʉ jĩĩboqui: “Yʉʉ menamacʉ̃, ãnosãñúrõpe jeanuãña”. Cʉ̃ʉ̃ teero jĩĩrĩ, niipetira mʉʉmena duirá padeorémena mʉʉrẽ ĩñaãdacua.

¹¹Sĩcʉ̃ cʉ̃ʉ̃ basiro “ãpẽrã́ nemorṍ yʉʉre padeorí booa” jĩĩgʉ̃́ bʉ́ri niigʉ̃́ tiinógʉ̃daqui. Teero jĩĩhẽgʉ̃pereja Cõãmacʉ̃ ãpẽrãrẽ́ padeorí tiigʉ́daqui, jĩĩyigʉ.

¹²Jesús cʉ̃ʉ̃rẽ boocóarigʉre jĩĩyigʉ: —Mʉʉ boseyagʉdʉ, mʉʉ menamacãrãrẽ, mʉʉ sõwʉ̃sʉ̃mʉãrẽ, mʉʉ bairare, mʉʉya wederare, mʉʉya wii pʉto macãrã pee apeyé cʉoráre boocórijãña. Mʉʉ cʉ̃́ãrẽ boocóri, cʉ̃́ãcã mʉʉrẽ boocócãmeãdacua. Cʉ̃́ã teero tiirí, mʉʉ tiiárigue wapatíro tiiróbiro pʉtʉáadacu.

¹³Teero tiiróno tiigʉ́, mʉʉ bosebʉreco tiigʉ́, bóaneõrãrẽ, posarirare, wáamasĩhẽrãrẽ, ĩñahẽrãrẽ boocóya.

¹⁴Cʉ̃́ã mʉʉrẽ wapatímasĩricua. Teero tiigʉ́, Cõãmacʉ̃ mʉʉrẽ bayiró ʉsenire ticogʉdaqui. Basocá diarira ãñurã́ masãri bʉreco niirĩ, ãñuré ñeegʉ̃dacu, jĩĩyigʉ.

¹⁵Sĩcʉ̃ cʉ̃́ãmena duigʉ́ Jesús jĩĩrére tʉogʉ́, jĩĩyigʉ: —Cõãmacʉ̃ Õpʉ̃ niirṍpʉ yaadutigʉ boocónoãrigʉ bayiró ʉsenigʉ̃daqui.

¹⁶Jesús cʉ̃ʉ̃rẽ queorémena wedeyigʉ: —Sĩcʉ̃ basocʉ́ boseyagʉdʉ paʉ basocáre boocóyigʉ.