SAN LUCAS 14:9-16

⁹Le' sya, mèn co' mbli convid ryop ned mèna, ñee mèna loo gu': Fta' asient co' ndubl ba' tyub mèn ndxè' loo mes. Sya, mèna xít too gu' loo asient loo mes. Sya, que nzo ne'ñee lezo' gu', yitoo gu' loo asient loo mes par tyub mèna co'te' yitoo gu'. Le' gu' na, nalyat nde'f ro ya tub gu' loo asient co' nziri' axta squin le'n nyòo. ¿Xá lyàai le'n lezo' gu' li mèna tataa loo gu', sya?

¹⁰Ndxe'leque', co'se' li mèn convid gu' par ya thuhua gu' sa lua' gu' co'te' mselya' thìb ned myen', na nii loo gu': Más huen tyub gu' loo asient co' nziri' axta squin le'n nyòo par ñee mèn, co' ngua li convid gu'a loo gu', tyub gu' loo asient co'te' ndxàal más tyu' gu': Amiu, ftub co'te' más ndyu' mèn ba'. Le' sya, tataa mod más tyu' gu' loo mèn co' ndub loo mes.

¹¹Tac mèn co' asendli ndye's, thyon mèna loo Diox. Le' mèn co' ndxàp mod no indlu'de mèna ndye's mèna, Diox li loo mèna le' mèna gàc mèn roo no mèn xèn loo Diox.

¹²Ndxab Jesús loo mbi' co' mbli convid Jesús, ne: ―Co'se' lil thìb yalhua, que naca xhui, que naca rsè, ne'lidel convid mèn co' nac amiu lùu, ne' ne' lil convid mèn co' nac mèn huespe'l, ne' mèn co' nac mèn gulizl, ne' mèn ric co' nac vecinl. Tac mèna lique' convidl cadque' co'se' li mèna yalhua. Chele' lùu ante ndli tataa, sya, ante nda'l gust lezo'l no ndyacl ndxàc con' ndac lool. Per loo Diox ne'yòode cuent cón che'n con' ndlil.

¹³Ndxe'leque', co'se' lil thìb yalhua, bli convid mèn prob, no mèn yíiz, no mèn renc, no mèn sieu.

¹⁴Huen ndal chele' lùu li tataa loo mèna tac mèna ne'gácte quix por con' mda'l nduhua mèna. Le' part cón che'nl na, Diox li anggàc con' ndac lool co'se' gàc huiz co'se' ryo xban mèn co' nac mèn nalì no mèn nambìi loo Diox.

¹⁵Co'se' mbìn thìb mbi' co' nzo làth mèn co' mdub loo mes tataa ndxab Jesús, mbi' ndxab loo Jesús: ―Ndyac lezo' mèn co' hua no U' làth mèn co'te' ñibe'pe' Diox loo mèn.

¹⁶Jesús ndxab loo mbi'a: ―Thìb mbi' mbli convid huax mèn par yi'th mèna loo thìb yalhua co' li nab mbi'.