Luca 14:9-16

⁹Mãwãra djibariba bʌ́a jaraya: “Ãyã wãdua. Za b̶ʌ ẽberãda nama chũmeya.” Mãwã obʌrʌd̶e bʌra bio quĩrã peraya dji ed̶aara b̶ea ume chũmei bẽrã.

¹⁰Maʌ̃ bẽrã bʌda ed̶od̶ibʌrʌ dji ed̶aara b̶eama chũmedua. Mãwãra bʌ ed̶od̶aba unubʌrʌd̶e nocod̶aa trʌ̃ped̶a jaraya: “Zedua, nama dji dromarã ume chũmedua.” Mãwã bʌ ed̶od̶aba jũma dji chũmea quĩrãpita bʌra dji dromada unubiya.

¹¹Bariduada dji dromaara b̶a quĩrĩã b̶ʌbʌrʌ Ãcõrẽba ed̶aara b̶ʌya. Ab̶aʌba ara idjida ed̶aara b̶ʌibʌrʌ Ãcõrẽba dji dromaara b̶ʌya.–

¹²Maʌ̃be Jesuba idji ed̶od̶aa nãwã jarasia: –Bʌa ẽberãrã ne cod̶e trʌ̃bʌrʌd̶e bʌ dji biarãda, bʌ djabarãda, bʌ ẽberãrã sid̶a trʌ̃rãdua. Ne bara b̶ea bʌ caita panabada sid̶a trʌ̃rãdua. Ãdjirãda trʌ̃ibʌrʌ dewara ewarid̶e ãdjia ẽberãrã trʌ̃bʌdad̶e bʌ sid̶a trʌ̃nia. Mãwã bʌa od̶abari ne edaya.

¹³Maʌ̃ bẽrã bʌa ẽberãrã trʌ̃bʌrʌd̶e biara dji ne neẽ́ b̶eada, dji nʌcanʌca b̶eada, jĩrũ biẽ́ b̶eada, daub̶errea b̶ea sid̶a trʌ̃cuadua.

¹⁴Mãwãbʌrʌ wãrãda bʌra bio bia b̶aya. Ãdjia ni cãrẽ sid̶a bʌ́a poya diad̶aẽ́ bẽrã, dji jipa b̶ea ʌ̃rẽbabʌda ewarid̶e Ãcõrẽba bʌ́a nebiada diaya.–

¹⁵Jesu ume chũpanʌba maʌ̃ ũrĩsid̶ad̶e ab̶aʌba jarasia: –Ãcõrẽ purud̶e ne cobʌda ẽberãra bio bia b̶ead̶ia.–

¹⁶Maʌ̃ carea Jesuba idjía jarasia: –Ewari ab̶a ẽberãba ãbaa ne cod̶i waib̶ʌada obʌrʌ bẽrã zocãrãa jarasia ãbaa ne cod̶ida.