Lucas 12:4-21

⁴Jesus aguely myani: — Ârinmo kâdytadaundâ; igadopyrymo âdaunloenlâ adaindânry tyân-hoem ton-honremba mawânkâ. Tâwâlâ lelâlâ wâne inagazedylymo. Ton-honremba olâ Satanás eydâ atoram ogonosemo.

⁵Deus anhekyly xytadaungâ. Awâkâ kulelâ mawânkâ âigueduomo, Satanás eydâ atoram ogonosemo ton-honreim. Augueondyly xirâ: Deus lelâ xytadaungâ. Xirâ mâuntudyzemo kuru wato, yataen-hodo.

⁶— Idânârâ tâense awâkâ Deus. Imâem tâwâentuneba konopio. Azagâ moeda imeimbyry tâwâensenrygue, cinco konopio tanâse lelâ kurâ. Deus olâ koendâ edyly nimopa.

⁷Nhetâmo lâpylâ Deus. Koendâ kehoem tutuze, angahumo wâgâ âdara angahudumo awyly. Awylygue tâseguâdâzeba itaungâ. Deus konopio tâense, âmaemoma kuru nhesemo lâpylâ. Xurâem, âmaemo tywyneim kuru, konopio modo takaze — kely Jesus.

⁸Wakely myani Jesus: — Tâjiduay, “Jesus eynynonro urâ” myguelymo-ro watay, “Ynynonrolâ asaemo” keze lâpylâ urâ. Pabai, anju domodo warâ enado ise auguely: “Ynynonrolâ akaemo” uguely. Xirâ mâuntudyzemo kuru wato.

⁹Tâjiduay, “Jesus eynynonro keba urâ” myguelymo-ro watay olâ, Pabai Deus, anju domodo warâ enado, “Ynynonro mâkeba asaemo” keze lâpylâ urâ.

¹⁰Urâ Uguondo Kaynâpa âetyby izepa wato amânhedylymo, amyguelymo warâ watay, idânârâ awârâ inakai modo xygakeze Deus, mâenkadylymo watay. Deus Ispiritury ewanu wâgâ inakanhe kulâ amyguehomobyry olâ ise Deus nygakeba.

¹¹Âizepanromo, pymâ modo enadoram, âtâ tâdâtâdyguyho odaji pymâdo enadoram warâ adylymo ise, iwentâdomoem. Myarâ madahoduomo, tadahulizeba itaungâ. “Kâsemagueho peba ise aze. Âdara uguely kâuntuba urâ pymâdo enanaym nhewentâduomo” tâkezeba itaungâ.

¹²Deus Ispiriturylâ ise mârâ ume amyguehomoem inomerymo xudunri — kely Jesus.

¹³Kurâdo duano ewy uguondo aguely myani Jesusram: — Pabai tyigueduo, idânârâ niâm paigoem, urâem warâ, Konomedâni. Paigoram aguekâ: “Âukono agâ unwâm xurâpyry epajigâgâ” kekâ — kely mâkâ uguondo.

¹⁴Aituo myani Jesus aguely: — Unwâm isejiguybyry ânguy xurâ awyly agueim mâkeba urâ. Âmâ, âwaigoru warâ xurâ wâgâ auguewâpyra ise urâ — kely Jesus eyam.

¹⁵Aituo myani Jesus tonlo modoram aguely: — Auguely idataungâ; tâmaynelâ itaungâ. Idânârâ âdydo imeom sodoem lelâ waypa itaungâ. Toenzepa âdype tadawyly kulâ aunloenlâ kuomazeândaymba, aunloenlâ kitoem aguyetaymba warâ — kely Jesus.

¹⁶Aituo Jesusram unâgue âzenomedâolymo: — Tâlâ myani uguondo toenzepa âdydo imeom sodo. Idânârâ ipi ezay etâdaymby modo koendâ kehoem ago itaynly. Eagâ tâwanuneim modo toenzepa kehoem nhekaunâdylymo.

¹⁷Toenzepa kehoem tientuo, mâkâ âdydo imeom sodo aguely tyangahu oday: “Toenzepa kehoem xirâ tâkaunâzeim. Ekanâdoem ejidy peba urâ. Âdara kukeanra ise agânhedyly” kely.

¹⁸Tyangahu oday tâwâlâ myani xunâgu: “Ah, xutuagui. Âdydo imeom etadâdo imeimbyry modo ise yagâ tâwanuneim modo nhakalaguely, imâsedo tintâdomoem.

¹⁹Tâwâlâ ise auguely. ‘Tâlâ urâ idânârâ ize wato iweâpa iniem. Âdygue kâseguâdâbyra ise urâ. Iekobyzeguely ise. Kâwinduadyly, kadakuily warâ. Tuomare ise urâ warâ’ ” kely mâkâ uguondo tâwâlâ tyangahu oday.

²⁰Aituo myani eyam Deus aguely: “Tuândy âmâ! Xirâ kopaelâ ise âiguely. Âkelo ise mâenkanâdyby sodo, âmâ mâkeba” kely. Arâ myani mâkâ âdydo imeom sodo iguely. Tâlâ atobyry modo idânârâ âxiânly.

²¹— Auguely xirâ âyanmo. Adâise lâpylâ mâkâ âdydo imeom toenzepa turâem ekanânibyry modo. “Âdypeom xina” warâ aguelymo. Deus xurâem olâ âdypeom keba mâkâ agueim — kely Jesus.