Lom 3

1

2

3

4

5

6

7

8

9

10

11

12

13

14

15

16

¹Adok Yowbad singay bilabeids peinan min-Yudiy ya̱kids, ne? Ikalin nuwan peinan Ebelam nakabivatus wa̱wouds, ne?

²Magen, bo ilabeids youd babaw waseg. Nakabsilamaw waseg, Yowbad nilivnek anilivan min-Yudiy wasigeis.

³Min-Yudiy mwasanin mo isiplaves aygan Yowbad, tage Yowbad nag ibob ansinap didumwal wasigeis ya̱kids.

⁴Nag. Magat babaw gamag bitakapidabs, Yowbad mo bisesuna tadidumwal tonen. Liva̱nen Yowbad nises mamagina: “Amlivan bakanuw mo bakaban amsinap didumwal, o igaw ya̱tal waseg bukutawtoun mo bukutamap yak.”

⁵E, taninuways adsinaps kalbaleb mo takakins Yowbad ansinap didumwal, wankuyeim tabta bitalivans, talansa, “Yowbad takalbaleb, peinan ikawkuneids”? Awoum bitalivans ma̱wan. Livan kalbaleb. Gamag mwasanin asisinap ma̱wan. Kukin Yowbad ansinap bigeg, ta-ma̱wan bikatukin wasigeis gamag yakids.

⁷Tayyaweids mwasanin ilansa, “Pawl inageiguy mamagina, ‘Bayaweid singay mo bitakakins Yowbad ansinap mounid, mapuna bitakavasis. Adok awoum biyateleig peinan agusinap kalbaleb. Kadiloka beivag adsinap kalbaleb va̱gan kid Yowbad ansinap bwanabwein mo bisap.’” Tayyaweids mwasanin idokes gungeiguy ma̱wan. Kadilok Yowbad bikamta̱nis peinan asilivan ma̱wan.

⁹Ama̱wan? Tabta min-Yudiy ya̱kids bitamugwas? Nag. Agulivan mamagina adsinaps kalbaleb, babaw ya̱kids, takinew min-Yudiy, o takinew ven babaw gimgilis tasiyas.

¹⁰Liva̱nen nises mamagina: “Nag kal ansinap didumwal.

¹¹Nag teitan ikakin; nag teitan inineiv Yowbad.

¹²Asibabaw bo ipiyaves inaked, ininounas ked kalbaleb waseg; Nag anmwa̱net gamag ansinap bwanabwein, nag.

¹³Asilivan kalbaleb, wudous ma̱wana alawag, Wudous waseg ikatidavidavs. Mwatet napwa̱tuw yayanen wawudous nises.

¹⁴Wudous bo ika̱lawt bwa̱lat son sinap yayan.

¹⁵Bo iseiw nuwes anwaway gamag.

¹⁶Ininounas, igugweileks youd babaw.

¹⁷Niwal inaked nag ikakins.

¹⁸Nag bikakins Yowbad; nag bigoulus, nag.”

¹⁹Bukitab anilivan towen silma̱nin tasiyas wanuwan Moses nakaleiwag, va̱gan Yowbad bibob adilivans, o ven babaw ya̱kids mo bitakakins adsinaps kalbaleb.

²⁰Nag kadilokeid bitakanow Moses nakaleiwag va̱gan bitasesuna wamatan Yowbad tadidumwal ya̱kid, nag. Kaleiwag towen bikatimlakeid mo takakin adsinap kalbaleb.

²¹Tut towen takakins didumwa̱lun Yowbad inaked kweitan. Moses nakaleiwag nag ma̱wana ked towen, nag; tage liva̱nen ked towen nises Moses nakaleiwag waseg, o tasiyas palopit sikalelel waseg.

²²Ked towen, bitasimounid waseg Yeisuw Kelis, mo Yowbad bisekeid didumwal tonen. Gamag babaw ya̱kids idakeds katanok-wan.

²³Babaw ya̱kids adsinaps kalbaleb; Yowbad nakamnat bo ilisaweids.

²⁴Nasiwa̱youb mo ikatinabweids Yeisuw Kelis waseg, mo tamlavags tadidumwals ya̱kids.

²⁵Yowbad bo itam Yeisuw mamagina lun bulukwan buya̱vin biwid adsinaps kalbaleb, magat bitasimounids waseg. Lun towen waseg, Yowbad ikamtilakeids ansinap didumwal, peinan bo ikaltuwen adsinap kweiboug kalbaleb.

²⁶Bo ikapatul wasigeis ya̱kids mo takakins ansinap didumwal, tut towen ikidumwa̱luds ansinap didumwal waseg, peinan tasimounids waseg Yeisuw.

²⁷Tabta bitakaypamwes adsinaps waseg? Adok nag. Aveiyag wawun? Adsinaps waseg nag bitamlavags tadidumwals; misinaka bitasimounids waseg Yeisuw mo bitamlavags tadidumwals ya̱kids.

²⁸Mapuna takakins misinaka bitasimounids waseg Yeisuw mo bitamlavags tadidumwals; sinapun Moses nakaleiwag waseg nag aveiyag bitaba̱nes.

²⁹Tabta Yowbad misinaka min-Yudiy daYowbads? o adok vena babaw siYowbad? Mounid vena babaw siYowbad.

³⁰Magen, Yowbad anmwa̱net, mapuna bikidumwa̱luds min-Yudiy ya̱kids peinan tasimounids Yeisuw waseg, o bikidumwa̱lus vena babaw gimgilis peinan isimounids Yeisuw waseg.

³¹Tabta bitasimounid waseg Yeisuw mo bitagulekwes Moses nakaleiwag? Nag. Bitakatimweisis mo bitawtoun.