Rom 3

1

2

3

4

5

6

7

8

9

10

11

12

13

14

15

16

¹Te dongah Judah hlang kah a banhman a te balae? yahvinrhetnah kah a phu tah balae?

²A longim boeih ah a phu muep om. Pathen kah olrhuh te lamhma la amih Judah rhoek a paek ngawn coeng.

³Te dongah hlangvang loh a hnalval uh atah metlamlae? Amih kah hnalvalnah loh Pathen taengkah tangnah te hmil tang mahnim?

⁴Om mahpawh, om cakhaw Pathen tah thuem. Tedae a daek tangtae bangla hlang boeih he laithae ni. Te daengah ni na ol neh na tang vetih na laitloek vaengah na noeng eh.

⁵Tedae mamih kah boethae loh Pathen kah duengnah a tueng sak atah balae n'thui eh? Kosi aka hong Pathen tah halang pawt nim? Hlang vanbangla ka thui lah eh.

⁶Te tlam te om mahpawh, om koinih metla Pathen loh diklai he lai a tloek eh?

⁷Tedae kai boethae he Pathen kah oltak loh a thangpomnah te a pungtai sak atah, balae hlangtholh bangla lai ka thui pueng?

⁸Tedae mamih ah hlangvang loh, “Boethae saii sih, te daengah ni a then ha pawk eh,” a ti uh bangla soehsal uh boel sih. Laitloeknah tah amih ham a om pah pai saeh.

⁹Te koinih n'rhoei uh a te? Rhoei loeng loeng mahpawh. Judah khaw, Greek khaw, tholh hmuiah boeih om tila n'cawh coeng.

¹⁰A daek tangtae vanbangla aka dueng om pawh, khat khaw om pawh.

¹¹Aka hmuhming te om pawh, Pathen aka tlap om pawh.

¹²Boeih taengphael uh tih rhenten poci uh coeng, boethen aka saii te om pawh. Pakhat khaw om pawh.

¹³Amih kah olrhong te hlan bangla ah tih a lai neh thailat uh. A hmui dongah rhulthae kah sue om.

¹⁴A ka te thaephoeinah neh olkhaa bae.

¹⁵A kho loh thii long sak ham thui.

¹⁶A longpuei ah pocinah neh ngaidaengnah om.

¹⁷Te dongah ngaimongnah longpuei te ming uh pawh.

¹⁸Amih mik ah Pathen rhihnah om pawh.

¹⁹Tedae olkhueng loh olkhueng hmuikah rhoek a voek te m'ming uh. Te dongah a ka te boeih khuem saeh lamtah diklai pum tah Pathen kah khotoh khobah la om ve.

²⁰Olkhueng kah bibi loh amah hmaiah pumsa boeih tang sak mahpawh. Olkhueng lamloh ni tholh mingnah la om.

²¹Tedae olkhueng neh tonghma rhoek lamloh a phong Pathen kah duengnah tah olkhueng voel ah phoe coeng.

²²Pathen kah duengnah tah Jesuh Khrih kah tangnah lamloh aka tangnah rhoek boeih taengah hlihloehnah a om moenih.

²³Hlang boeih he tholh uh tih Pathen kah thangpomnah te a phavawt uh.

²⁴Jesuh Khrih ah tlannah rhangneh a lungvatnah loh a yoeyap la n'tang sak.

²⁵Anih te Pathen loh a duengnah mingphanah la a thii dongkah tangnah rhangneh dawthnah la a hmoel.

²⁶Pathen kah uehnah dongah tholhsainah rhuem te hmilhnah la, tahae tue vaengah a duengnah te mingphanah la, Jesuh tangnah dongkah rhoek te aka dueng neh aka tang la aka om sak la om.

²⁷Te koinih hoemdamnah tah melam a khoe, ba olkhueng nen lae? mekah khoboe nen lae? Moenih, tangnah kah olkhueng nen dae ni.

²⁸Olkhueng kah khoboe voelah hlang he tangnah loh a tang sak ni m'poek uh.

²⁹Te phoeiah Pathen tah Judah rhoek bueng kah a? Namtom rhoek kah van moenih a? Ue namtom rhoek kah van ta.

³⁰A tangtang atah tangnah neh yahvinrhetnah khaw, tangnah neh pumdul khaw Pathen pakhat long ni a tang sak eh.

³¹Te dongah tangnah lamloh olkhueng te m'hmil uh pawn a? A hmil pawt dongah olkhueng ni lat m'pai puei uh.