Text copied!
CopyCompare
A BUK TABU A MAULANA KUNUBU ma A KALAMANA KUNUBU - Rom

Rom 3

Help us?
Click on verse(s) to share them!
1Ba damana, ava ra magit ba ra vuna tarai Iudaia dia manga boina tana; ma ava ra magit i boina ta ra pokakikil?
2Mangoro na magit dia boina tana; ma go ia ra luaina, ba di ga nur tar ra tinata kai God ta diat.
3Ma dave, ona ta ra na ta diat pa dia ga nurnur? Na pak laka tana ra dovotina kai God, tago dia ga ko iba upi ra nurnur?
4Koko muka! Maia pa, boina ba na po rikai ba God i dovot ma ra tarai par dia vaongo; da di ga tumu ia dari: “Upi na po ba i dovot kaum lavur tinata, Ma upi una ongaongor ona u vana ta ra varkurai.”
5Ma ona kada mangamangana ba pa i takodo i vaarike ra mangamangana takodo kai God, ava dat a tatike? Kan God pa i takodo bar, ona na babali na kankan ta dat? (Iau tata da ra mangamangana kai ra tarai.)
6Koko muka! Damana, God na kure davatane ra rakarakan a gunagunan?
7Ma ona ra dovotina kai God i tar manga arikai ma i tar vangala pa kana minamar ta go kaugu vavaongo, ta ra ava di kure mule iau, da iau a tena varpiam?
8Ma pa i dari laka (da di vaongo pa avet, ma di biti ba ave tatatike): Dat a pait ra kaina magit, upi ra bo na magit na arikai tana? Ma ra varkurai na balbali i tadav diat i takodo muka!
9Ava mulai? Da manga boina laka ta ni diat? Patana, vakir ure ta magit; tago lua da ga takun ot pa ra umana Iudaia ma ra umana Elenas bula ma ra varpiam;
10da di ga tumu ia dari: “Pa ta tikai i takodo, vakir ta tikai ka;
11Pa ta tikai matoto, Pa ta tikai i tikan upi God;
12Diat par dia tar vana rara, diat par pa dia boina ure ta magit; Pa ta tikai i pait ta bo na magit, patana, vakir ta tikai ka;
13A kongkong i diat i da ra babang na minat i tapapa; A karamea i diat i tar tatata na vavagu; A taring, da kai ra vui i varvarpidik, i ki ra vavai ra bul na ngie i diat;
14A ngie i diat i buka ma ra varvul ma ra tinata i mapak;
15A kau i diat i vutvut upi ra vardodoko;
16A vinirua ma ra uliran i tur ta kadia lavur nga;
17Ma pa dia ga nunure ra nga i ra malmal;
18Pa ta bunurut ure God i tur ta ra luaina mata i diat.”

19Ma da nunure muka go, ba ra lavur magit par a tinata na varkurai i tatike, i tatike ta diat dia tur ta ra vavai na tinata na varkurai; upi na paum bat ra ngie i diat par, ma upi na arikai ba ra rakarakan a gunagunan i rara parika ta ra mata i God;
20tago ure ra tinorom ta ra tinata na varkurai pa da vatakodo ta tikai ta ra luaina matana; tago ra tinata na varkurai i vakabara dat ure ra varpiam.
21Ma go ra varvatakodo kai God, nina ba pa i vuna ta ra tinata na varkurai, i tar vana rikai, ma ra tinata na varkurai ma ra lavur propet diat tar varvai dovot i tana;
22a varvatakodo kai God iat ta ra nurnur tai Iesu Kristo kadiat par dia nurnur; tago pa dia enana varbaiai;
23tago diat par dia tar varpiam ma dia iba upi ra minamar i God,
24di vatakodo vakuku diat ta kana varmari iat ure ra varkul na varvalaun kai Kristo Iesu;
25nina ba God i ga vaarike tar ia upi a varporong, ure ra nurnur ta ra gapuna, upi na vaarike ra takodo na varkurai kai God, tago i nur vue ke boko ra lavur varpiam dia tar pait ia amana ta ra kini na varvamadudur kai God;
26iau biti upi na vaarike go gori kana takodo na varkurai; upi ia iat na takodo ma na vatakodo bula nina i nurnur tai Iesu.
27Akave la ta magit ba dat a vavagia pa dat i tana? Di tar kure vatukum vue. Ta ra varkurai ava? Ure ra varkurai na papalum vang? Patana; ure ke ra varkurai na nurnur.
28Damana da nuk ot pa ia, ba di vatakodo ra tutana ure kana nurnur ma vakir ta ra papalum i vuna ta ra tinata na varkurai.
29Dave God a God kai ra Iudaia ka laka? Vakir vang a God kai ra lavur Tematana bula?
30Maia, kai ra lavur Tematana bula; tago ia ra kopono God ka ba na vatakodo ra pokakikil ma ra nurnur, ma diat pa dia pokakikil ure ra nurnur.
31Dave bar, da papait na punpun vue laka ra tinata na varkurai ma ra nurnur? Koko muka! Maia pa, da vatur vapadikat ia ka.