Romu 3

1

2

3

4

5

6

7

8

9

10

11

12

13

14

15

16

¹Jiu vaherema nehazana, nankna knare'za eriforera nehaze? Hifi oku'a tavufgama tgahu tavutava zampintira na'a taza hu'zana enerune?

²Anampina rama'a tamaza hu'za me'negeta enerize! Ese zana Anumzamofo oku me'nea ke'a Jiu vaheku antahiramino eri'ama hu'ne.

³Ana hanigeno mago'amo'zama zamentintima osanageno'a, ana zamentintima osnazazamo'a, Anumzamo'ma huvempa hu'nea ke'a rufutagigahifi?

⁴I'o, Anumzamoke fatgo hu'neanki, maka vahe'mota havige vahe mani'none. Avontafepima krente'neana Kema hananana vahe'mo'za tamage hu'za nehnagenka kegagare kavrentesazana zamageteregahane hu'ne. (Sam-Zga 51:4)

⁵Hianagi tagri fatgo osu tavu'tavazamo'ma, Anumzamofo fatgo avu'avazama eri fore'ma nehanigeta, tagra na'ane huta hugahune? Anumzamo'ma rimpaheranteno knazama tamisiana, e'i fatgo avu'ava hugahifi? (Vahe'mota antahintahire, ama'ina kea nehue.)

⁶I'o, Anumzamo'ma fatgoma osu'nesuno'a mopafi vahe'ene mikozana refko huga osu'neankino, inankna huno refko hugahie?

⁷Nagri havigemo'ma Anumzamofo fatgo avu'avazampine masa'afima eama hanigeno'a, na'ante Anumzamo'a kumi vahe mani'nane huno hugahie?

⁸Hagi mago'amo'za tananke nekafriankna hu'za kegaga zamifintira kea nehu'za, mago'ane kumira nehanunkeno knare'za efore hanie hu'za nehaze. Iza'o e'inahukna nanekema nehanimofona kna erinogu nehie.

⁹Na'ane huta hugahune, tagra Jiu vahe'mota mago'a nagara zamagetereta knare hu'none hugahumpi? I'o, na'ankure tagra ko ana miko Jiu vahero, megi'a vahera kumimofo hankavemo refitezmantenegeta zamageta antahita hu'none. Hagi Jiu vahe'mota ru vahera zmageterenompi?

¹⁰Avontafepi krentenena, Magora fatgo vahera omanine. Magore huno omnitfa hu'ne.

¹¹Magore huno amanahu antahizane vahera omanine. Mago'mo'e huno anumzamofonkura nohakre.

¹²Miko vahe'mo'za zamagena hunemi'za, ana miko'mo'za haviza nehaze. Magore huno knare'za nehia vahera omanine. Magore huno omanitfa hu'ne. (Sam-Zga 14:1-3)

¹³Zamagerumo'a neginagi huno mati kerigamo hagaro huriankna nehie. Zamagefunafina havigemo avite'ne. Ha' osifavemofo avuatga zama'amo zamagitera me'ne. (Sam-Zga 5:9)

¹⁴Zamagitera vahema sifinama huntezane, aka kegagamo avite'ne. (Sam-Zga 10:7)

¹⁵Vahe'ma zamahe fri zantera ame'ama nehaze.

¹⁶Inantego vazana vahe'ma zamazeri haviza hu'zane vahe'mofoma knama amizamo nezmavararie.

¹⁷Inankna hu'za zamarimpa frua erigahaze zamagra ontahinaze. (Ais 59:7-8)

¹⁸Anumzamofonku koro hu'zana nomane. (Sam-Zga 36:1)

¹⁹Tagra antahi'none kasegama krente'nea kemo'a kasegema eri'naza vahe nezmasamie. Ana hanigeno mago'mo'a huno nagra ftago vahe mni'noe huno osugahie. I'o miko mopafi vahe'mota Anumzamofo avurera hazenketi me'nea vahe mni'none.

²⁰Na'ankure kasegemo'ma hu'neazama avarari zampintira, Anumzamofo avufina mago vahe'mo'a fatgo vahe mani'noe huno osugahie. Na'ankure kasegemo, kumimofo keno antahino huzana erifore nehie.

²¹Hu'neanagi menina Anumzamofo fatgozana, kasege amage'ante zantetirompage, kasefa ka taveri hu'ne. Korapama Mosese'ma krente'nea avompima huvempa nehigeno, kasnampa vahe'mo'za hu'naza kante efore nehie.

²²Tagrama fatgo huta Anumzamofonte manisune hanuta, Jisas Kraisinte tamentintia hanunkeno, Anumzamo'a ftago vahe mni'naze huno hurantegahie. Mago kana omnetfa hu'ne. I'o.

²³Na'ankure maka'mota kumi huta Anumzamofo hanave'ane kumapina umanigara osuta, atupa hu'nonane.

²⁴Anumzamo'a knare erizama asuragiranteno Kraisimpi eri'nea zanteti, tamagra fatgo vahe mani'naze hu'ne. Agra e'i anazana Kraisimpi miza seranteno katufegeta, kumipintira fru huta mani'none.

²⁵Anumzamo'a, Jisasina tamigeno kumitimofo nona huno korama'a tagino, kumitia apaserante'nea zamo'a Anumzamo'a agru huno ftago huneankita, Agritema tamentinti hanuta Anumzamofontera egahune. Anumzamo'ma e'inahu hu'neazamo, Anumzamo'a fatgo hu'ne nehie. Ko'ma kumi hu'naza vahe'ma akoheno mni'neno kumizmia atrezmante'nea zamo'a eama hu'ne. E'ina zamo'enena eriama huno Jisasimpima zamentintima haza vahe'ma nezmavrea zamo'a taveri huno Anumzamo'a fatgo hu'ne nehie.

²⁶Na'ankure e'i anazama hiazanteti, Agra'a fatgozana meni knafina eriama hu'ne. Hanigeno kumi vahe'mo'za fatgo vahe mni'naze haniana, e'i Jisasi Kraisimpima zmentinti hanaza vaheku Anumzamo'a fatgo vahere huno huzmantegahie.

²⁷Tagra naza hunonkeno Anumzamo'a tavrenegu tavufga erisaga hugahune? Kasegema amage'ma ante avu'avazamopi? Knare erizama e'nerunazamo'o? I'o. Tamentintima hu'zamo tavufama erisga hu'zana agaterene.

²⁸Tagri'ma tazeri knarema higeta Anumzamofo avure'ma fatgo hunonana kasegema amage'ante zampitiro'ompge tamentitima hunkeno tazeri fatgo hu'ne.

²⁹Agra, Jiu vahe'mokizimi Anumzanke mani'nefi? Agra megi'a vahe'mokizimi Anumzanke maninefi? I'o, Agra ana mikomota Anumza mani'ne.

³⁰Zamufga taga hu'naza vahe'ene, zamufa taga osu vahe'mofona, Magoke Anumzanke mani'neankino, zamentintima haza vaheku fatgo vahe mani'naze nehie.

³¹Hagi tagra tamentintiguke nehuta, kasegegura amnezane hugahumpi? I'o, tagrama tamentintima hanuta kasegemofona tamage huta avariri fatgo hugahune.