LEVITIKO 3:4-11

⁴nadinadi, mai edia digara ibounai, bona asena ena vamu namona.

⁵Inai vamu ibounai be hahelagaia taudia ese boubou patana ena lahi dekenai do idia gabua, idia gabua ore boubouna edia latanai. Inai vamu idia gabua neganai, ena bonana be namo herea Lohiabada dekenai.

⁶“Bema tau ta ia ura iena mamoe o nanigosi do ia henia, Lohiabada danu maino do ia karaia totona, ia ese mamoe o nanigosi tau o hahine, bero o toto lasi gauna sibona do ia henia.

⁷Bema tau ta ese mamoe ia henia gwauraia, inai boubou be Lohiabada ena vairanai do ia atoa.

⁸Unai tau ese iena imana be mamoe ena kwarana latanai do ia atoa, bona do ia alaia mase Palai Dubu ena vairanai. Hahelagaia taudia ese mamoe ena rarana be boubou patana ena kahana 4 dekenai do idia negea.

⁹Bona idia ese mamoe ena tauanina kahana haida Lohiabada dekenai aniani boubouna totona do idia henia, kahadia be inai: Mamoe ena digara, iena iuna badana ela bona doruna ena turia, bona bogarauna ena digara ibounai,

¹⁰nadinadi ibounai, mai edia digara danu, bona asena ena kahana badana danu.

¹¹Hahelagaia tauna ese inai vamu ibounai do ia gabua ore. Inai be aniani boubouna, Lohiabada ena.