Leviticus 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

¹Mibeǥey is Nengazen kayi he menge sulunuzen diyà te ki Moises wey ki Aaron:

²Emun is lundis te sevaha he etew edlevag etawa ebuketur etawa ebmeputìputì, he egkehimu ke edekelà he zaru te lundis, edumahan heini he etew ziyà te ki Aaron he memumuhat etawa sevaha zuen te menge memumuhat he kevuwazan ni Aaron.

³Ne ed-ahaan te memumuhat is bahin te lundis he midtuvuan dutun, emun midlevag haazà is lundis, wey mibmemeputì is bulvul zuen, tutuu he zuen din daru te lundis. Ne segugunà egkeǥiya zuen te memumuhat diyà te menge etew he meremerik haazà is etew.

⁴Iyan, emun haazà is mibmeputìputì diyà te lundis din ne kenà tuus te zaru te lundis wey wazà mebmeputì is bulvul zutun, ne idsivey sikandin dutun te memumuhat puun te menge etew seled te pitu he andew.

⁵Ne zutun te ikepitu he andew ed-umanan edsusiya zuen te memumuhat is lundis duen te etew. Ne emun is egkeehè din iyan ded gihapun su wazà heini medelandap, id-uman sikandin idsivey zutun te memumuhat puun te menge etew seled te selakew en he pitu he andew.

⁶Ne ziyà te ikepitu en maan he andew, ed-umanan sikandin edsusiya zuen te memumuhat. Ne emun midtulak en haazà is diyà te lundis din ne wazà medelandap, ne egkeǥiyen duen te memumuhat diyà te menge etew he lumpiyu haazà is etew su zeisey zà he levag is diyà te lundis din. Ne kegkepasad dutun pìpii zutun te etew is bisti zin, ne ed-isipen en sikandin he lumpiyu.

⁷Iyan, emun edelandap is ebpemuketur ziyà te lundis din dutun te nesusi en sikandin te memumuhat ne ingkepeseyuzan en he lumpiyu sikandin, kinahanglan he ebpeuman sikandin ebpesusi te memumuhat.

⁸Ne emun tutuu he midelandap haazà is dezeisey he menge levag, ne egkeǥiyan dutun te memumuhat diyà te menge etew he meremerik haazà is etew su zuen din daru te lundis.

⁹Is minsan hentei he zuen tuus te zaru te lundis diyà te kandin kinahanglan he edumahan diyà te memumuhat.

¹⁰Emun egkesusi te memumuhat he ebmemeputìputì is levag he iyan hinungdan te kebmemeputì te menge vulvul zuen, ne egkeehè en is sapù,

¹¹ne grabi heini he zaru. Ne ebpesayud is memumuhat he meremerik haazà is etew. Kenè en kinahanglan he idsivey pa sikandin para mepeniizi su keladu en he meremerik sikandin.

¹²Emun iyan ked-ahà zuen te memumuhat he nekeeneb en diyà te lawa zuen te etew haazà is daru,

¹³kinahanglan he ed-umanan sikandin ebpurungi edsusiya zuen te memumuhat. Ne emun tutuu he nekeeneb en diyà te tivuuk he lawa zuen te etew sikan is daru he tenged dutun mibmeputì pudu is tivuuk he lundis din ebpesayud haazà is memumuhat he lumpiyu haazà is etew.

¹⁴Iyan, emun egkesusi zuen te memumuhat he nenggawas en is sapù, ebpesayud sikandin he meremerik haazà is etew su zuen din daru ziyà te lundis. Heini is migawas he sapù ed-isipen he meremerik.

¹⁶Iyan, emun egkeulian su midtulak en, mebpeuman sikandin mebpesusi te memumuhat.

¹⁷Ne emun tutuu he midtulak en ebpesayud haazà is memumuhat he lumpiyu haazà is etew.

¹⁸Emun duen etew he zuen din levag he neulian,

¹⁹iyan, duen en maan mid-uman mebuketur zutun te neulian he malù meputìputì etawa meriǥàriǥà, kinahanglan he ibpesusi zin heini te memumuhat.

²⁰Ne emun edlevag haazà is mibuketur zutun te lundis ne tuus heeyan te zaru te lundis ne ebmemeputì daan is menge vulvul kayi, ne ebpesayud is memumuhat he meremerik haazà he etew, su zuen din daru te lundis he mibpuunà pinaaǥi te levag.

²¹Iyan, emun egkesusi te memumuhat he kenà haazà tuus te zaru te lundis wey wazà daan mebmeputì is bulvul kayi, ne henduen te edtulak en, idsivey sikandin dutun te memumuhat puun te menge etew seled te pitu he andew.

²²Emun edelandap heini ziyà te zuma he vahin te lundis, ebpesayud is memumuhat he meremerik haazà he etew.

²³Iyan, emun wazà heini medelandap, tulak dà heini te levag, ne ebpesayud is memumuhat he lumpiyu en haazà he etew.

²⁴Emun netutung is sevaha he etew ne mibmeputìputì haazà etawa mibmeriǥàriǥà,

²⁵kinahanglan he ibpesusi heini te memumuhat. Ne emun tuus heini te zaru te lundis wey mibmeputì is menge vulvul kayi, ne zuen din daru te lundis he mibpuun pinaaǥi te kegketutung. Ne ebpesayud is memumuhat he meremerik haazà he etew.

²⁶Iyan, emun nesusi te memumuhat he kenà haazà tuus te zaru te lundis wey wazà daan mebmeputì is menge vulvul zutun, ne henduen te midtulak en, idsivey sikandin te memumuhat puun te menge etew seled te pitu he andew.

²⁷Ne ikepitu he andew ed-umanan sikandin edsusiya te memumuhat. Ne emun midelandap heini ziyà te zuma he vahin te lundis, ebpesayud haazà is memumuhat he meremerik haazà is etew, su zuen din daru te lundis.

²⁸Iyan, emun wazà heini medelandap su midtulak en, ne levag dà heini tenged te kegketutung. Ne ebpesayud is memumuhat he lumpiyu haazà is etew.

²⁹Emun duen keriskis diyà te ulu etawa vakà te sevaha he etew,

³⁰kinahanglan he ibpesusi zin heini te memumuhat. Emun tuus heini te zaru te lundis wey mibmekelawag is menge vulvul etawa sumpà kayi wey mibmenipis, ebpesayud is memumuhat he meremerik haazà he etew, su zuen mezeǥes he zaru te lundis din he midtuvù diyà te ulu etawa vakà.

³¹Iyan, emun egkesusi te memumuhat he haazà is keriskis kenà tuus te zaru te lundis piru wazà meitem he vulvul etawa sumpà kayi, idsivey sikandin duen te memumuhat puun te menge etew seled te pitu he andew.

³²Ne ikepitu he andew, ed-umanan edsusiya te memumuhat haazà is mezeǥes. Ne emun wazà heini medelandap wey kena tuus te zaru te lundis, wey wazà mebmekelawag is menge vulvul etawa sumpà kayi,

³³kinahanglan he ebpevangul sikandin wey ebpemarbas piru kenè din iragkes sikan is duen duen mezeǥes. Ne id-uman sikandin idsivey te memumuhat seled te selakew en he pitu he andew.

³⁴Dutun te ikepitu he andew, ed-umanan edsusiya zuen te memumuhat sikan is mezeǥes. Ne emun wazà heini medelandap wey kenà tuus te zaru te lundis, ebpesayud haazà is memumuhat he lumpiyu haazà is etew. Ne ebpìpian dutun te etew is bisti zin, ne ed-isipen sikandin he lumpiyu.

³⁵Iyan, emun midelandap haazà is mezeǥes diyà te lundis din dutun te ingkepetuenan en duen te memumuhat he lumpiyu haazà he etew,

³⁶ed-umanan sikandin edsusiya zutun te memumuhat. Ne emun tutuu he midelandap haazà is mezeǥes diyà te lundis din, ne kenè en kinahanglan he edsusiyen pa zuen te memumuhat ke zuen be vulvul etawa sumpà he mibmekelawag su keladu en he meremerik sikandin.

³⁷Iyan, emun egkesusi zuen te memumuhat he wazà heini medelandap ne zuen en meitem he vulvul etawa sumpà he midtuvù, neulian en heini. Ne ebpesayud haazà is memumuhat he lumpiyu haazà is etew.

³⁸Emun duen ebmeputìputì diyà te lundis te etew,

³⁹kinahanglan he ibpesusi heini te memumuhat. Iyan, emun haazà is mibmeputìputì ne kenà utew egketuusan is keputì din, mezeǥes dà heini he migawas diyà te lundis. Haazà he etew ed-isipen he lumpiyu.

⁴⁰Emun is etew neupew zapit te vuked etawa dapit te purù, lumpiyu sikandin.

⁴²Iyan, emun duen ebmeriǥàriǥà he levag dutun te upew zin, kinahanglan he ibpesusi zin heini te memumuhat. Ne emun haazà is meriǥàriǥà he levag henduen te zaru te lundis he egkaahà diyà te lawa, ebpesayud is memumuhat he meremerik haazà he etew.

⁴⁵Is etew he zuen din daru te lundis kinahanglan he mebivisti te vindas he visti, kenà mebpenuwat te vulvul zin, ne tembuni zin is dizalem he vahin te zagwey zin ne mebensag sikandin te, “Meremerik a! Meremerik a!”

⁴⁶Ed-isipen sikandin he meremerik dutun te ziyè pa te kandin sikan is daru. Ne kinahanglan he ziyà sikandin med-ubpà te ǥawas te kampu he sebsevaha zin.

⁴⁷Emun midhab-ung is manggad he welin etawa linu etawa minsan hengkey he azen he lundis is mibeelan, kinahanglan he ibpesusi heini te memumuhat. Ne emun egkesusi en te memumuhat, isivey zin heini seled te pitu he andew.

⁵¹Dutun te ikepitu he andew ed-umanan heini edsusiya te memumuhat. Ne emun midelandap haazà is hab-ung ne ed-isipen heini he meremerik, ne kinahanglan he ebinsulan heini su ed-iseg pa haazà is hab-ung.

⁵³Iyan, emun egkesusi te memumuhat he wazà medelandap haazà is hab-ung

⁵⁴ne medsuǥù sikandin he ebpìpian etawa edlùluan haazà is manggad etawa lundis, wey idsivey pa seled te selakew en he pitu he andew.

⁵⁵Ne kegketapus dutun ne ed-umanan heini edsusiya te memumuhat. Ne emun wazà medheva haazà is hab-ung, ed-isipen heini he meremerik minsan wazà medelandap haazà is hab-ung. Umbe kinahanglan he ebinsulan heini minsan divaluy zà is midhab-ung.

⁵⁶Iyan, emun egkesusi zuen te memumuhat he midheva haazà is hab-ung, ne iawè din sikan is bahin he nepikitan te hab-ung duen te manggad etawa lundis.

⁵⁷Iyan, emun edlikù haazà is hab-ung ne edelandap, kinahanglan he ebinsulan en haazà is manggad etawa lundis.

⁵⁸Ne emun egkaawà haazà is hab-ung dutun te nepìpian en haazà is manggad etawa lundis ne ed-umanan heini ebpìpii ne egkehimu en heini he lumpiyu.

⁵⁹Iyan heini menge sulunuzen para metueni ke lumpiyu etawa meremerik is midhab-ung he manggad he welin etawa linu etawa minsan hengkey he azen he lundis is mibeelan he midhab-ung.