Leviticus 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

¹Midtawag te Nengazen si Moises ne midlelaǥan din diyà te Tulda he Edtelevukaayan. Midsuǥù din si Moises te kegkaǥi kayi ziyà te menge Israilihanen: Emun duen keniyu ebpemuhat te uyaǥen diyà te Nengazen, ne mebpemuhat sikandin te vaka, kerehidu, etawa kambing.

³Emun baka is ibpemuhat din he iyan pemuhat he edtutungen, kinahanglan he meemahan heini he wazè din sazir, ne ipemuhat din heini ziyà te ǥemawan te Tulda he Edtelevukaayan, su para zewata sikandin te Nengazen.

⁴Izampè din is belad din diyà te ulu zuen te vaka he ibpemuhat din, ne edewaten heini te Nengazen su wey melibri sikandin puun te menge salè din.

⁵Ne lepaa zin haazà he uyaǥen diyà te etuvangan te Nengazen. Ne is lengesa kayi ibpirik te menge memumuhat he menge kevuwazan ni Aaron peliǥuy zuen te pemuhatà he ziyà te ǥemawan te Tulda he Edtelevukaayan.

⁶Ne enisi zin haazà is uyaǥen wey sepùa.

⁷Kegkepasad dutun, medtetavun is menge memumuhat he menge kevuwazan ni Aaron diyà te pemuhatà ne tevuni zan haazà te menge kayu he ibpurung ibpenavuk.

⁸Ne isavuk dan duen te hapuy sikan is mibpenggetad dan he vahin duen te uyaǥen, ragkes is ulu wey is menge tavà.

⁹Kinahanglan he lùlui duen te nemuhat is menge vahin he ziyà te seled te ǥetek wey is menge paa zuen te vaka. Ne kegkepasad, iyan en is memumuhat edtutung kayi te langun diyà te pemuhatà, iyan heini pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat te Nengazen.

¹⁰Emun kerehidu etawa kambing is ibpemuhat te etew he iyan pemuhat he edtutungen, kinahanglan he meemahan heini he wazè din sazir.

¹¹Lepaa zin heini ziyà te etuvangan te Nengazen diyà te egkezizaya te pemuhatà. Ne is lengesa kayi ibpirik te menge memumuhat he menge kevuwazan ni Aaron diyà te peliǥuy zuen te pemuhatà.

¹²Emun egkepenggetad en heini zuen te nemuhat, ibpelastar heini te memumuhat diyà te hapuy, ragkes is ulu wey is menge tavà.

¹³Kinahanglan he lùlui zuen te nemuhat is menge vahin he ziyà te seled te ǥetek wey is menge paa kayi. Ne iyan en haazà is memumuhat edtutung dutun te langun diyà te pemuhatà te pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat te Nengazen.

¹⁴Emun tagbis is ibpemuhat te etew he iyan pemuhat he edtutungen, kinahanglan he merepatik heini etawa limuken.

¹⁵Ed-uwiten heini te memumuhat diyà te pemuhatà. Egurivizen din is lieg kayi taman te egketamped, ne ibpetiǥis din is lengesa duen te kilid te pemuhatà. Ne edtutungen din is ulu kayi ziyà te pemuhatà.

¹⁶Ne kegkepasad dutun, id-awè din is evenan ragkes is taǥù din he kinaan kayi ne idtimbag din diyà te zapit te edsilaan duen te pemuhatà he zutun idsavuk is avu.

¹⁷Baasa zin haazà is tagbis pinaaǥi te keguyud te menge pakpak kayi he kenè din daan ebpitasen. Ne tutunga zin haazà is tagbis diyà te pemuhatà he iyan en pemuhat he edtutungen. Is kehemut kayi he pemuhat te pinaaǥi te hapuy ne ebpekepenunuat te Nengazen!