Leviticus 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

¹Midsuǥù te Nengazen si Moises wey si Aaron he keǥiya zan heini ziyà te menge Israilihanen: Egkehimu he egkeenen niw is minsan hengkey he langgam he neuyag kayi te tanà he netevì is sulu zan wey ed-umanan dan edsepaa is kinaan dan.

⁴Piru kenè niw keena is menge langgam he ed-uman edsepà te kinaan dan he wazà metevì is sulu zan, iring te kemilyu, badir, wey rabit. Kenè niw zaan keena is bavuy, su minsan netevì is sulu zin, piru kenà kayi ed-umanan edsepaa is kinaan din. Isipa niw he meremerik heini he menge langgam. Kenè kew kaan te usa kayi wey kenè kew gawed te minatey kandan.

⁹Egkehimu he egkeenen niw is minsan hengkey he neuyag diyà te wahig he zuen din kapey wey hun-ap. Piru kenè niw keena is wazè din kapey wey hun-ap, wey kenè niw zaan gewezi is minatey kandan. Isipa niw he meremerik heini.

¹³Kenè niw keena is menge tagbis iring te kulaǥu, uwak, menge tagbis he edaas te lawa te etew etawa langgam, dapay, ekang, kalamun, menge tagbis he ebpendawi te isdà, tulabung, dugwak, wey kaveg. Isipa niw he meremerik heini he menge tagbis.

²⁰Egkehimu he egkeenen niw is menge dezeizey he keranapranap he edlayang wey ebpenanap he zuen dan menge paa he ibpekeladsik dan iring te terapan, sengug, wey pelaǥà. Piru kenè niw keena is duma pa he menge keranapranap he edlayang wey ebpenanap. Isipa niw he meremerik heini he menge keranapranap.

²⁴Kenè kew ǥawed te minatey he menge langgam he wazà metevì is sulu zan wey kenà ed-uman edsepà te kinaan dan. Kenè kew zaan gawed te minatey he menge langgam he heepat is menge paa zan he igkahis dan is menge sulu zan. Isipa niw he meremerik heini he menge langgam. Is minsan hentei he ebpekesamsam te minatey kandan, kinahanglan he ebpìpian din is bisti zin, ne ed-isipen pa sikandin he meremerik taman te mezukilem.

²⁹Isipa niw he meremerik is menge langgam he ebpenanap iring te rumat, laku, pelesakà, telètà, pelaas, buaya, ivid, wey menge kemilyun. Is minsan hentei he ebpekesamsam te minatey kandan ed-isipen he meremerik taman te mezukilem.

³²Is minsan hengkey he egkeuluǥan te ebpatey kandan egkehimu he meremerik, kayu man heini he mibeelan he azen, manggad, panit, etawa saku. Ne minsan hengkey is egemitan kayi kinahanglan he edlùluan te wahig, piru ed-isipen pa heini he meremerik taman te mezukilem.

³³Emun egkeuluǥan is umuy te minatey kandan, is langun he taǥù kayi egkehimu he meremerik, ne kinahanglan he egevaan heini.

³⁴Is minsan hengkey he keenen he intereb diyà te wahig he taǥù dutun te umuy egkehimu he meremerik. Ne egkehimu zaan he meremerik is minsan hengkey he kelasi te inumen he zutun te seled te umuy.

³⁵Minsan hengkey he egkeuluǥan te minatey kandan egkehimu he meremerik. Emun iyan egkeuluǥan is evuwan etawa kuzen, isipa niw heini he meremerik ne kinahanglan heini he edrupeten.

³⁶Is serebseb etawa vudsi he punduwà te wahig he egkeuluǥan te minatey kandan kenè mulà egkehimu he meremerik, piru is edsamsam dutun te minatey he langgam egkehimu he meremerik.

³⁷Kenà daan egkehimu he meremerik is minsan hengkey he venì he ibpemula he egkeuluǥan dutun.

³⁸Piru emun iyan egkeuluǥan is benì he nehuluman te wahig, ne heini he venì egkehimu he meremerik.

³⁹Emun ebpatey is langgam he egkehimu he egkeenen, is minsan hentei he ebpekesamsam kayi ed-isipen he meremerik taman te mezukilem.

⁴⁰Is minsan hentei he egkuwa etawa egkaan te lawa kayi, kinahanglan he ebpìpian din is bisti zin, piru ed-isipen pa sikandin he meremerik taman te egkesakep.

⁴¹Kenè niw keena is minsan hengkey he keranapranap he ebpenanap su meremerik heini: is minsan hengkey he edula etawa ebpenanap he heepat is paa etawa mahabet is menge paa.

⁴³Kenè niw remeriki is keugelingen niw pinaaǥi te kegkaan te minsan hendei kayi he menge langgam, su iyan a, is Nengazen, Megbevayè niw. Umbe iviza niw is keugelingen niw para kediey, ne mebpekesegradu kew su waǥas a.

⁴⁵Iyan a Nengazen he mibpeǥawas keniyu puun te Ehipto su wey a mehimu he Megbevayè niw. Umbe mebpekesegradu kew su waǥas a.

⁴⁶Pinaaǥi kayi he sulunuzen te mehitenged te langun he kelasi te menge langgam,

⁴⁷egketuenan niw ke hendei kandan is lumpiyu wey is meremerik, is egkehimu he egkeenen wey is kenà egkehimu he egkeenen.