LAASUUDEE 5:3-17

³Lán yãbↄkↄ̃tɛ parii è mↄ́ kↄ̃n nana'onao nà, lɛn yã pari bↄɛna è mↄ́ kↄ̃n yↄ̃nkↄyão lɛ.

⁴Tó n lù sɛ̀ Ludanɛ, ǹton à papana gurↄ gágaro. Ǹ à papa, zaakɛ yↄ̃nkↄↄnↄ yã è kánɛro.

⁵Lùsɛna Ludanɛ sai maa dɛ n lù sɛ̀nɛ papana saila.

⁶Ǹton tó n lɛ́ n da yãnlo. Ǹton o sa'orinɛ n bè n sã lùsɛna yãnlo. Ń yezi Luda pↄ fɛ̃nzi n yã pì yãnzi à zĩi kɛ̀ nɛ́ɛ kɛɛ kaatɛn yↄ́?

⁷Nana pari ona kↄ̃n yã pari bↄɛnao è mↄ́ kↄ̃n yã pãaomɛ. Beee yãnzi ǹgↄ̃ Luda vĩa vĩ.

⁸Tó ń è wèe gbãa mↄↄ takaasideenↄnɛ gukea, wèe giińnɛ kↄ̃n yãzɛdeeo wèe yã gↄ̃gↄ̃ↄńnɛ a zɛ́aro, ǹton tó yã pì bↄ n saɛro, zaakɛ bùsu pì gbãadeenↄↄ e wɛ́ɛ dↄↄkↄ̃nɛ, ben aↄ̃ gbɛ̃nsinↄↄ e wɛ́ɛ dↄↄńnɛ dↄ.

⁹Aↄ̃ píngi è bùsu pì baka blemɛ, zaakɛ kína bé à buraanↄ vĩ.

¹⁰Gbɛ̃ kɛ̀ ye ↄↄzi è kɛ̃sãa, gbɛ̃ kɛ̀ ye auzikizi àre è mↄ́aro. Beee nɛ́ yã pãamɛ dↄ.

¹¹Tó auziki e kaara, à blèrinↄ ègↄ̃ kaaramɛ. Bↄ́ àren à vĩ a diinɛ? À wɛ́ɛ biia baasiro.

¹²Zĩgbãakɛri è i nnaa o, baa tó à pↄ́ blè féte ke bíta. Auzikidee sↄ̃ pↄ́ parii è tó à ii oro.

¹³Ma nↄ̀sɛyakayã pãsĩ è anduna guu, gbɛ̃ke zɛ́ tàta a ↄↄdaalɛ à a zĩnda kari kɛ̀,

¹⁴ben à bↄkↄ̃tɛ zaaa kɛ̀o, à auziki kàatɛ píngi. Kɛ̀ à nɛ́gↄ̃gbɛ̃ ì, à pↄ́ke vĩ kɛ̀ à tónɛro.

¹⁵Gbɛ̃ntee è bↄ a da gbɛɛɛn bũumɛ. Lán à mↄ̀ nà lɛn è liara à tá lɛ dↄ, è a zĩ àre ke e à sɛ́ à na a ↄzĩ à táoro.

¹⁶Yã kɛ̀kii nɛ́ nↄ̀sɛyakayã pãsĩmɛ dↄ. Lán gbɛ̃ mↄ̀ nà lɛn è liara à tá lɛ dↄ. À ísimma gà à kpà à pɛ̀ gukoria pã, bↄ́ bé à gↄ̃̀nɛ?

¹⁷Beee gbɛra à a gurↄ dɛ̀ gusiaan kↄ̃n nↄ̀sɛyakana bítao kↄ̃n gyãao kↄ̃n pↄfɛ̃o.