LAASUUDEE 3:5-18

⁵Gbɛ̀fãakↄ̃ana gurↄↄ kuu, gbɛ̀kakↄ̃ana gurↄↄ kuu, bↄ̃̀ndagagurↄↄ kuu, à kɛ̃na gurↄↄ kuu.

⁶Pↄ́wɛtɛgurↄↄ kuu, à ↄkpazina gurↄↄ kuu, pↄ́kũna gurↄↄ kuu, à gbarɛna gurↄↄ kuu.

⁷Pↄ́gaakɛ̃gurↄↄ kuu, à nabigurↄↄ kuu, lɛ́kũna gurↄↄ kuu, yã'ona gurↄↄ kuu.

⁸Yenzi gurↄↄ kuu, zangu gurↄↄ kuu, zĩ̀kagurↄↄ kuu, kaɛna aafia gurↄↄ kuu.

⁹Bↄ́ àren zĩkɛri è e nawɛ̃a kɛ̀ à kɛ̀a?

¹⁰Ma zĩi kɛ̀ Ludaa dà gbɛ̃nteenↄnɛ aↄ̃ kɛɛ è.

¹¹Ludaa tò pↄ́ píngi maa a gurↄↄa. À kuuna gurↄ píngi laasuu dà gbɛ̃ntee swɛ̃̀n dↄ, baa kↄ̃n beeeo eé fↄ̃ à yã kɛ̀ Luda e kɛɛ zaa anduna daɛna ai à mìdɛnaa gbá dↄ̃ro.

¹²Má dↄ̃ kɛ̀ pↄ́kee maa kↄ̃n gbɛ̃nteeo dɛ kuuna pↄnnaa guu kↄ̃n maakɛnao à wɛ̃̀ndi lɛ́nlaro.

¹³Tó gbɛ̃ e pↄ́ blee èe í mii èe a zĩ píngi sáabu kpaa, Luda bé à à gbà.

¹⁴Má dↄ̃ kɛ̀ yã kɛ̀ Luda è kɛɛ égↄ̃ kuu gurↄ píngimɛ. Weé fↄ̃ wà pↄ́ke kaaranlo, weé fↄ̃ wà pↄ́ke lagonlo. Ludaa kɛ̀ lɛ, lɛ wàgↄ̃ a vĩa vĩ yãnzimɛ.

¹⁵Pↄ́ kɛ̀ kuu tia gĩakɛ à kuu zaa zi kↄ̀. Pↄ́ kɛ̀ eégↄ̃ kuu zia kuu yã kↄ̀. Luda è yã kɛ̀ wà kɛ̀ yãanↄ gbɛ̀ sísi.

¹⁶Ma yã è anduna guu dↄ, guu kɛ̀ dɛ yãzɛdee gↄ̃ kún, yãzɛsaidee bé à kú gwe, guu kɛ̀ dɛ yã maaa gↄ̃ kún sↄ̃, yã zaaa bé à kú gwe.

¹⁷Ma bè ma swɛ̃̀ guu, Luda é yãkpaɛ kɛ kↄ̃n gbɛ̃ maaanↄ kↄ̃n gbɛ̃ zaaanↄ ń píngi, zaakɛ yãkɛna píngi kↄ̃n a gurↄↄomɛ, bↄkↄ̃tɛ píngi kↄ̃n a kɛgurↄↄo.

¹⁸Ma bè ma swɛ̃̀ guu dↄ, gbɛ̃nteenↄ sↄ̃, Luda è ń yã wɛ́ɛ wɛ̃ńnɛ lɛ aↄ̃ↄ dↄ̃ ń zĩndaa kɛ̀ wà dɛ lán nↄ̀bↄnↄ bàmɛ.