Karamɔxɔna 3:6-21

⁶Seen fen waxatin na, a tunun waxatin na. Seen namara waxatin na, a rabeɲin waxatin fan na.

⁷Seni bɔ waxatin na, a madɛgɛ waxatin na. Dundu waxatin na, fala ti waxatin fan na.

⁸Marafanna waxatin na, maraɲaxun waxatin fan na. Yɛngɛ waxatin na, bɔɲɛ xunbeli waxatin fan na.

⁹Walikɛɛn tɔnɔn mundun sɔtɔma a wanli?

¹⁰N bata a to Ala bata adamadiine ti ɲaxankata wanla naxan na.

¹¹Ala bata seen birin da alogo e xa lan e waxatin ma. A mɔn yi a ragidi habadan feene xa lu adamadiine bɔɲɛni. Anu, e mi nɔɛ Ala kɛwanle yɛɛ toɛ keli e fɔlɔden ma han e raɲanna.

¹²N yi a kolon fa fala, sese mi fan muxun na fɔ a xa ɲaxan, a fe faɲin liga a dunuɲa yi gidini.

¹³Muxun birin xa a dɛge, a yi a min, a yi hɛrin sɔtɔ a wanli. Ala bata na nan nagidi muxune ma.

¹⁴N na a kolon Alaa wanle birin luma nɛn habadan, sese mi sama a fari, sese mi bama a ra. Ala na feene ligaxi nɛn alogo muxune xa gaxu a yɛɛ ra.

¹⁵Feen naxanye ligama, e nun naxanye fama ligadeni, ne bata yi liga nun. Ala nan fe danguxine raminima dunuɲa yi mɔn.

¹⁶N mɔn fe gbɛtɛ toxi dunuɲa yi. Kiti sa kɛndɛn yi lan dɛnaxan yi, ɲaxuyaan nan mɛnni. Tinxinna yi lan dɛnaxan yi ɲaxuyaan nan mɛnni.

¹⁷N yi a fala n yɛtɛ ma, n naxa, “Ala tinxin muxun nun ɲaxuden makitima nɛn, bayo feen birin nun a waxati saxin na a ra, kɛwanla birin nun a dingiraan na a ra.”

¹⁸N yi a fala n yɛtɛ ma lan adamadiine ma, n naxa, “Ala muxune kɛɲaan nan fɛsɛfɛsɛma alogo e tan yɛtɛɛn xa a kolon a e luxi nɛn alo subene.

¹⁹Bayo muxune nun subene raɲanna birin keden, e birin faxama nɛn. Nii kedenna nan e birin yi. Na kui, muxun mi dangu suben na. Fe fuun nan ne birin na.

²⁰E birin sigama yire kedenna nin. E birin kelixi burunburunna nin, e birin xɛtɛn burunburunna nin.

²¹Nde a kolon xa adamadiine niin tema kore nɛn, subene niin yi godo bɔxɔn bun?”