Ekeliziasiti 3:6-21

⁶na totoso pude hata meke na totoso pude muliuṉu, na totoso pude va naqiti meke na totoso pude okipalae,

⁷na totoso pude rikata meke na totoso pude tuvaka, na totoso pude lopu kulu meke na totoso pude zama,

⁸na totoso pude vari tatarue meke na totoso pude vari kanai, na totoso pude varipera meke na totoso pude varibulei.

⁹Na sa si vagia sa tie tavetavete koari nana minabo?

¹⁰Ele dogoria rau sa minamata vekoa sa Tamasa koari na tie.

¹¹Tavete va leleani Sa sari doduru ginugua pa dia totoso. Meke padai Sa sari gineledi rina totoso pa bulo tie; gua, ba lopu boka dogoria na tie sa doduruna sa tinavete te Tamasa pa pinodalaena kamo vina betona.

¹²Gilania rau sapu loketoṉa si leana la koasa tie, ba pude qetuqetu mo meke tavete va leana sipu korapa toa nana.

¹³Pude mani hena na napo sari doduru tie, meke mani qetu ni sari nana minabo pa tinavete, arini si na vinariponi te Tamasa.

¹⁴Gilania rau sapu doduru ginugua pu taveti sa Tamasa si kote koa hola; loketoṉa si boka ta hoda la, meke loketoṉa si boka ta vagi palae koasa. Tavetia sa Tamasa pude va lavatia ri na tie si Asa.

¹⁵Doduru sapu ta evaṉa kamahire si ele ta evaṉa tu pukerane, meke sapu kote ta evaṉa si ele ta evaṉa tu; meke sapu ele ta evaṉa tugo asa si kote va evaṉa pilipule i sa Tamasa.

¹⁶Meke dogoria rau si keketoṉa pule pa kauruna sa rimata: Pa vasina varipitui, si na kinaleana si ele koa nana, pa vasina vari toṉoti, si na kinaleana si ele koa nana.

¹⁷Balabala si rau pa buloqu, “Kote turaṉa lani Tamasa pa vinaripitui saripu toṉoto meke arini pu kaleadi, ura kote koa dia sari hopeke totoso tana doduru vina tana, hopeke dia totoso sari doduru tinavete.”

¹⁸Meke balabala tugo si rau, “Sari tie si podeki sa Tamasa pude di gilania sapu arini si kekeṉoṉo gua mo rina kurukuru ṉame.

¹⁹Sa vina betona sa tinoa tana tie, si gua mo tadi na kurukuru; kekeṉoṉo mo sari karua; pana mate si keke si mate tugo si keke. Sa tinoa tanisa tie si lopu hola nia sapu tanisa kurukuru. Doduru ginugua si loke laedi beto.

²⁰Doduru si la mo pa keke vasina; pa kavuru vura maedi, meke pa kavuru mo pule la.

²¹Lopu ta gilana, be sa maqomaqona sa tie si sage taloa meke sa maqomaqona sa kurukuru ṉame si gore la pa korapa pepeso.”