Kölfel 85:3-7

³Ka aükätiu om lingeringer ngeniir o wes seni om song mi fokun lapalap.

⁴Ai Kot, äm Chon Amanau, kopwe aliwinisefälikem o aükätiu om song ngenikem.

⁵Ifa usun, kopwe song ngenikem tori feilfeilachök? Ifa usun, kopwe chök sopwela le song ngeni ekewe täppin aramas meinisin?

⁶Kose mochen kopwe amanauasefälikem, pwe äm noum kewe aramas aipwe mwareituk.

⁷Ai Samol mi Lapalap, kopwe pwäri ngenikem om we tong ellet o fang ngenikem om manau.