Kölfel 7:5-16

⁵mürin, ekewe chon oputaei repwe tapweriei o liapeniei, repwe atatakisiei, repwe nieila o likitieila lepwül.

⁶Ai Samol mi Lapalap, kopwe ütä lon om song, kopwe awenokota o ü ngeni än ekewe chon oputaei lingeringeritiei. Kopwe pwätä o alisiei, ai Kot en mi allük pwe epwe fis pwüng.

⁷Kopwe amwichato chon ekewe mwü ünükum, nge en kopwe nom aser o nemeniir.

⁸En ka apwüngü chon ekewe mwü meinisin. Ai Samol mi Lapalap, lon om kapwüng kopwe pwärätä pwe üa pwüng, pun ka silei pwe esap wor ai tipis.

⁹En ewe Kot mi pwüng, ka etittina ekiekin me tipen aramas. Kopwe aükätiu än ekewe aramasangau föför mi ngau, nge kopwe anüküchara ekewe chon pwüng.

¹⁰Kot a tümwünüei, a amanaua chokewe mi aleasochisi i.

¹¹Kot eman soukapwüng mi pwüng, eman Kot mi apwüngü ekewe aramasangau fansoun meinisin.

¹²Are eman aramas esap mochen ekieksefäl, Kot epwe seimi nöün ketilas, epwe emeia an likapich o änna ngeni.

¹³A amolätä an pisekin maun mi afeiengau, pwal wokun föün esefich mi ngetenget.

¹⁴Nengeni, ekewe aramasangau ra chök ekiekietä mine a ngau, ra chök föri föför esepwüng o eäni kapas chofana.

¹⁵Iwe, ra tuw pwang pwe aramas repwe tup lon, nge ra püsin turulong lon.

¹⁶Ar föför esepwüng epwe püsin ukur chök, nge liwinin ar föförün mwäneson epwe püsin küür.