SAM 7:5-16

⁵Ayok, gata iwana kapewi na nawake tanggaganutnong. Na take nainggamuke natane gupma yainggamutake tasiwan kepdakane moo peke maiwik.

⁶Anutu, natane iwanata musiptou amau nae tasinangge yakaing. Siwan gata waaminde musiptou natayamuke na gatangami meya dua kawit. Anutuna, ga nomana akngaekan nataayak. Unzingge gata enake waamindane amak wamna katak usanziyo. Usanzike kepi noman takngakan tawake na gatangamuyo.

⁷Aminu apu unekan yuaingu gae wesim apuke takumbasinong. Siwan gata enane siknga yuke waaminu kayuyo.

⁸Buyambam tapa, gata aminu dongu kuupbam usanzikgayak. Buyambam tapa, ga umanda kopsa siknga apanin. Gata na usanzike nandupi nata kepi noman takngaat gatu take siknga akngaat nganggan tasinggat taknga kake na usanzike take ngang naniyo.

⁹Anutu, ga nomana sikngaapa. Gata aminbamda natdetdetnane gatu musiane nataaing kaknga usanzikgayak. Unzingge gata wai amindane musiptok natake wai tasikaing taknganane apasiwi wena sinong. Siwan gata noman aminu gatayami waaminu kekeknga yutnong.

¹⁰Siwan natane tuyunggu Anutu unin. Ita nae kuyana tasinggak kapanin. Ita aminu ie wam natake tawakaingu papan takekan yutnong.

¹¹Anututa wamu noman gan usanzike wamu noman gan yanggak kapanin. Siwan gunzit bam asinggan ita waiaknga tasiya aminde musia toknga siknga natake yaipakepunggak.

¹²Sike wai aminda musia dua tapan tekwambanu Anututa bainatna yasiwan tokngaaning. Siwan gatu kweemna mitake amak tasinangge tandakngawik.

¹³Ita sanga amak tasike amin yapan kumningge gwa pandakngakut. Itane sakuu katapna kaya kaikgauni. Ita sakuu waapa apa wai amin yapan kumningge gwa pandakngakut.

¹⁴Dasingge, wai aminda waiakngakan tasinangge natake natdetdetna gwa natapan yuaing. Ita sanga wai takngatu takngatu tasinangge tandakngake tasiwawa buyana asaawik. Buyana asaawan waaminda wai siknga meya buyak yutning.

¹⁵Siakan. Aminu gapma buyambamu dakatu kwaiwa aminu kundu undang pukuwa papikge kwaikuu gapma wandakaatangu ina pimake pukuwik.

¹⁶Ngan, gutonga ina tasinggak kakngata ina usukwatapik. Siwan amak wamu aminu kundue tasinangge yawik kakngata tapan tekwamban ina tasiwan maiwik.