Kölfel 78:33-69

³³Iei mine Kot a föri pwe ränin manauer a wesila usun chök enienin asepwäl, nge ierin manauer a chök sopolong lon niuokus watte.

³⁴Nge lupwen Kot a niela ekoch me leir, ekewe mi chüen manau ra kütta i. Ra ekieksefäl o tiliken le iotek ngeni.

³⁵Ra chechemeni pwe Kot ar achau, pwe ewe Kot mi Unusen Tekia ar Chon Amanau.

³⁶Nge ar kewe kapas resap pwüng, meinisin mine ra apasa a chök mwakel.

³⁷Leluker esap wenechar ngeni, resap pwal allükülük won an we pwon.

³⁸Nge Kot a tongeer, a amusala ar tipis, esap pwal aroserela, Fän chomong a amwöchü an song, nge esap amüchawu an lingeringer ngeniir.

³⁹A chechemeni pwe ir aramas echök, ra usun chök asepwäl mi enila, nge esap chüen enito.

⁴⁰Fän chomong ra ü ngeni i me lon ewe fanüapö o achouu me lon ewe fanüpwas.

⁴¹Ra sotuni Kot fän chomong o asonga Ewe mi Pin me lon Israel.

⁴²Resap chechemeni an manaman ika ewe rän, lupwen a amanaueer seni chon oputeer,

⁴³resap pwal chechemeni an kewe föför mi amwarar me an kewe manaman a föri lon Isip me lon ewe maasiesin Soan.

⁴⁴Iwe, Kot a awili lölön ekewe chanpupu ngeni cha, pwe ekewe chon Isip resap tongeni ün seniir.

⁴⁵Kot a tinato pwiin nikken leir pwe repwe küür, pwal kairü mi ataela irän fanüer.

⁴⁶A amongöü ngeni ekewe müün fotar irä, nge ekewe lifichimas ra eni uän ar tanipi.

⁴⁷A ataela ar tanipin wain ren ütten fau me ar irä sikamor ren patapat.

⁴⁸A niela nöür pwiin kow ren ütten fau, pwal nöür pwiin sip ren inefi.

⁴⁹Ren an song mi fokun watte ngeniir, ren an lingeringer me an koput a esen ngeniir pwe repwe tolong lon riaföü. Ei a usun chök eu mwichen chon läng mi feito o afeiengaueer.

⁵⁰Esap chüen engila lon an song, esap pwal achika manauer seni mäla, nge a asechirela pwe repwe mäla ren mätter.

⁵¹A niela ekewe mwänichi meinisin lon Isip, ir mwen pöchökülen mwirimwirin Ham me lon ewe fanü.

⁵²Mürin, Kot a emwenawu nöün aramas usun eman chon mas a emweni nöün pwiin sip, o emweniir lon ewe fanüapö.

⁵³A emwenirela fän kinamwe pwe resap niuokus, nge ewe matau a pwölüela ekewe chon oputeer.

⁵⁴Iwe, a emwenirela ngeni fanüan we mi pin, ngeni ewe chuk püsin i a liapeni.

⁵⁵A asüela chon ekewe mwü me mwer. A aineti ngeni ekewe ainangen Israel fanüer pwe repwe fanüeni o ngeniir imwer.

⁵⁶Nge ir ra sotuni ewe Kot mi Unusen Tekia o ü ngeni. Resap aleasochisi an kewe allük,

⁵⁷nge ra tokola seni Kot o kirikiringau usun chök semelaper kewe, ra lomotongau usun chök efoch esefich mi pwor.

⁵⁸Pun ra asonga Kot ren ar lenien fel won ekewe leni tekia, ra pwal föri pwe a lingeringeritiir ren ar kewe uluulun anü mi fal.

⁵⁹Iwe, lupwen Kot a küna ei, a fokun song o wesewesen pöütala chon Israel.

⁶⁰A likitala lenian me lon Silo, ewe imw mangaku ia Kot a nom ie me lein ekewe aramas.

⁶¹A föri pwe ewe pworofel, asisilen an manaman me ling, epwe oolong lepöün chon oputeer.

⁶²A lingeringeriti nöün aramas o mwüt ngeni chon oputeer pwe repwe nirela ren ketilas.

⁶³Nöür alüal ra mäla lon maun. Esap chüen wor alüal repwe pwüpwülü ngeni nöür föpwül.

⁶⁴Nöür souasor ra mäla ren ketilas, nge nöür fefin mi mä pwülüer resap tongeni ngüngüres.

⁶⁵Mürin, ewe Samol a pwök usun eman a pwök me annut. A usun eman mwän mi pöchökül a akkapwas pokiten an ün wain.

⁶⁶Iwe, a akufu chon oputan pwe ra sü o asäweer ren säw esemüch.

⁶⁷Mürin, Kot a pöütala ekewe mwirimwirin Josef, esap filätä ewe ainangen Efraim.

⁶⁸Nge a filätä ewe ainangen Juta, pwal ewe chuk Sion a efich.

⁶⁹Ikenan a aüetä imwan mi pin o tekia usun tekian ekewe läng, a pwal anüküchara usun fanüfan pwe epwe nom tori feilfeilachök.