Kölfel 66:3-16

³Oupwe apasa ngeni Kot, “Om kewe föför ra fokun amwarar. Om kewe manaman ra kon lapalap, pwe chon oputok ra chapetiu me mwom fän niuokus.

⁴Chon fanüfan meinisin ra fel ngonuk, ra kölün mwareituk, ra kölün mwareiti itom.”

⁵Oupwe feito o nenengeni mine Kot a föri. An kewe föför me lein aramas ra fokun amwarar.

⁶A awili matau ngeni fanüpwas. Äm kewe lewo ra fetal lon ewe chanpupu won pecher. Ikenan äm aia pwapwa ren mine Kot a föri.

⁷A nemenem ren an manaman tori feilfeilachök, mesan ra mamasa ekewe mwü. Ekewe aramas mi ü ngeni Kot resap tongeni atekiaretä.

⁸Ämi chon ekewe mwü, oupwe mwareiti ach we Kot. Aramas repwe rong ngingin ämi mwareiti i.

⁹I a amwöchü manauach, nge esap mwüt ngenikich pwe sipwe turula.

¹⁰Pun en äm Kot, ka sotunikem, ka limetikem usun aramas ra limeti silifer.

¹¹Ka atolongakem lon fötek. Ka anomu won sökürüm och wosochou,

¹²ka mwüt ngeni aramas pwe repwe purikem. Äm aia pwerelong lon ekkei me koluk, nge en ka emwenikeemiwu o atolongakem lon eu leni mi mürina.

¹³Üpwe feila lon imwom fän asoren kek o apwönüetä ai kewe pwon ngonuk.

¹⁴Üpwe uwato reöm mine üa pwon ngonuk, lupwen üa nom lon weires.

¹⁵Üpwe eäni asoren kek ngonuk seni man mi öümanau. Üpwe eäni asor ätemwänin sip, pwal ätemwänin kow me kuuch, pwe ötüötün ekewe asor epwe ötütä.

¹⁶Oupwe feito o rongorong, ämi meinisin mi asamolu Kot, üpwe apworausa ngenikemi mine Kot a föri fän itei.