Kölfel 65:4-13

⁴Feiöchün chokewe ka filiretä o emwenireto pwe repwe nom lon leniom mi pin. Äm aipwe üren feiöch ren ekewe mettoch mi mürina me lon imwom we mi pin.

⁵Ai Kot äm Chon Amanau, ka pälüenikem fän pwüng ren föför mi amwarar. En ewe chon fanüfan meinisin pwal chon ekewe fanü toau mi nom lematau ra eänuk apilükülük.

⁶Ren om pöchökül ka anüküchara ekewe chuk, pun ka pwärala om manaman.

⁷Ka aükätiu ötötün ekewe matau, pwal püngüpüngün ekewe no me akürangen chon ekewe mwü,

⁸pwe chokewe mi nonom lesopun fanüfan repwe niuokus ren om kewe manaman. Ka föri pwe chon ekewe fanüen ötiu tori chon ekewe fanüen lotou ra mweireir fän pwapwa ren om kewe föför.

⁹Ka tümwünü fanüfan o achöchönü, ka föri pwe a pwülüöch o fanüeräs. Ka aurala ekewe chanpupu ren koluk. Ka ngeni chon fanüfan ener mongö. Iei usun mine ka föri ngeni fanüfan:

¹⁰Ka fokun achöchönü ekewe warawar lon ekewe tanipi, ka asosonöchü o apwetetei ewe pwül ren üt o afeiöchü mine a märitä.

¹¹Ka awora iteiten ier räs mi fokun somwola. Ekis meinisin ia ka fetal ie a wor räsimong.

¹²Ekewe mälämäl lon fanüapö a märitä chomong fetil wor, nge ekewe chuk ra pwölüla ren pwapwa.

¹³Ekewe maasies ra ur ren pwiin sip, nge ekewe lemol ra ur ren wiich. Aramas meinisin ra mweireir o kölfengen fän pwapwa.