Kölfel 35:1-24

¹Echö än Tafit köl. Ai Samol mi Lapalap, kopwe ü ngeni chokewe mi ü ngeniei, kopwe fiu ngeni chokewe mi fiu ngeniei.

²Kopwe angei om kewe tittin maun, ewe mi watte me ewe mi kükün, kopwe feito pwe kopwe alisiei.

³Kopwe öüröürela fän wokum siles me noum kouken maun o ü ngeni ekewe chon tapweriei. Kopwe üreniei, “Ngang om Chon Amanau.”

⁴Amwo chokewe mi mochen nieila repwe kuf o itengau. Amwo chokewe mi rawangauaei repwe kulsefäl o rükö.

⁵Amwo repwe usun chök pön wiich asepwäl a ässala, nge nöün ewe Samol mi Lapalap chon läng epwe asürela.

⁶Amwo aler epwe rochopwak o amitimit, nge nöün ewe Samol mi Lapalap chon läng epwe tapweriir.

⁷Pun ra aopala ar sär pwe repwe liapeniei, ra pwal tuw eu pwang pwe üpwe turulong lon, nge esap wor popun.

⁸Amwo feiengau mi lapalap epwe toriir mwen ar silei. Amwo repwe püsin tup lon ewe sär ra aopala. Amwo repwe turulong lon ewe pwang o fokun feiengau.

⁹Mürin ngang üpwe meseik ren ewe Samol mi Lapalap, üpwe ingemwareiti i pokiten an angasaei.

¹⁰Ngang üpwe apasa ngeni ewe Samol mi Lapalap ren unusen lelukei, “Iö a wewe ngonuk? En ka angasala ewe mi apwangapwang seni ätekewe mi pöchökül seni, ka angasala ewe mi apwangapwang o mwelele seni ätekewe mi eliapa pisekin.”

¹¹Chon pwärätä chofana ra ü ngeniei, ra atipisiei won föför üsap silei.

¹²Ra liwini ngeniei ingau fän iten ai föför mürina. Iwe, üa fokun apilükingau.

¹³Nge lupwen ir ra samau, ngang üa üföüf üf seni tuk, üa ariaföüüei ren ai öchüün, üa pworetiu o iotek,

¹⁴üa pwal letipeta usur usun üa letipeta fän iten chienei ika pwii. Üa pworetiu fän ai lolilen o fetalfeil usun eman mi kechüeiti inan.

¹⁵Nge lupwen üa nom lon weires, ra mwicheto rei o takiriei, ra mwichefengen pwe repwe ü ngeniei. Chon ekis üsap sileer me mwan ra kapasingau usi, nge resap ükütiu.

¹⁶Ra chök alapala ar kapasen turunufas, ra afochofoch ngeniei ren ar oputaei.

¹⁷Ai Samol, ifa ükükün fansoun om kopwe chök nenengeni ei lapalap? Kopwe angasaei seni ar afeiengauaei, kopwe amanauaei seni ekei laion.

¹⁸Mürin üpwe kilisou ngonuk lon ewe mwichelapen noum aramas, üpwe mwareituk me lein ewe mwicheichen aramas.

¹⁹Kosap mwüt ngeni chon palüeniei, nge esap wor popun, pwe repwe takirin ämängauaei, kosap pwal mwüt ngeni chokewe mi oputafatei pwe repwe takiriei ren ai letipeta.

²⁰Iwe, resap eäni kapas pwetete, nge ra eäni kapasen tipitipmwäl ngeni chokewe mi mosonoson lon ewe fanü.

²¹Ra atipisiei fän leüömong o apasa, “Aha, aha, mesem ra küna mine ka föri.”

²²Nge en, ai Samol mi Lapalap, ka küna ei lapalap, kosap fanafanala. Ai Samol, kosap toau seniei.

²³Ai Samol, kopwe amwökütuk o ütä pwe kopwe pwärawu ai pwüng. Kopwe peniei, ai Kot.

²⁴Ai Samol mi Lapalap ai Kot, en ka pwüng, kopwe aletätä ai pwüng, nge kosap mwüt ngeni ekewe chon oputaei pwe repwe takirin ämängauaei.