Psalms 35:1-24

¹MAIN, kom kotin pei on ir, me kin pei on ia; o kotin palian on ir, me kin u on ia.

²Re kotin ale pere o tatan mauin ap kotida, pwen jauaja ia.

³Napekida katieu jauaja ia on ai imwintiti kan. Kotin majan don nen i: Nai jauaj pam!

⁴Me men kame ia la, en namenokala o kankaururala; o me men wia jued on ia, en pure wei o jarodi.

⁵Ren wiala dueta dip en kijin war akan mon kijinian, o tounlan en Ieowa jikin irail wei.

⁶Al arail en rotorotala o kitentel la, o tounlan en Ieowa en kotin pakipaki irail.

⁷Pwe re injenjara ia, pwen kame ia la, ap jota karepa, o re wia por on ia, a jota karepa.

⁸A en jejeinlek lodi on kalokolok; o injar me a wiadar, pein i en lodi on; o mela en lel on i waja o.

⁹A nen i en perenki Ieowa o polauleki a kotin jauaja ia.

¹⁰Kokon ai kan karoj pan inda: Main, ij me rajon komui? Pwe kom kotin jauaja me luet o on me a jota itar on, o kom kotin jauaja me luet o jamama on me lolap akan.

¹¹Jaunkadede likam kai u on ia, kalelapok re i, me i jota aja due.

¹²Re kin depukki me mau me jued, pwen kainjenjuede kin ia.

¹³A nai, ni ar jomau, i puri on nan tuk en likau, o kaloke pein nai ni ai kaijejol, o kapakap jan monion i.

¹⁴Nai wiai on ir dueta on kompoke pa i o udan ri ai; nai injenjued dueta amen, me kin loleitki in a.

¹⁵A irail peren kida ai jikilikel o pokon pena. Men lalaue pokon penan ia o jon en aramaj, me i jaja, kin lalaue ia anjau karoj.

¹⁶Re ni tete on ia, irail, me kin janjalmau o lalaue pweki kijin mana.

¹⁷Main, arai da, me kom pan kotin majani mepukat? Dorela nen i jan arail mejued, o maur ta ieu jan laien pulepul akan.

¹⁸I pan kapina komui nan momodijou laud, o nan pun en aramaj toto i pan danke komui.

¹⁹Der mueid on ai imwintiti nin jokarepa, ren peren kin ia, o me kin kailon kin ia nin jokarepa, ren der lalaue ia ki maj arail.

²⁰Pwe ar lokaia jota kin kareda popol, o re kin madamadaua, en dipi on me lelapok kan nan jap o.

²¹O re jar pajan au arail on ia indada: Io io, pein kit kilaner.

²²Main, kom kotin mani mepukat, kom der kotin nenenla, Main, kom der doo jan ia!

²³Kotin opala waja o kipada, pwen kapun ia la o ai dodok, ai Kot o ai Kaun.

²⁴Main, ai Kot, kotin kapun ia la duen omui pun, pwe ren der peren kin ia.